Thun 2022, hadei tuk padeih huu meng bruk ngak Akaok Kapul urang Ngak nong xa Quảng Trực, ong Điểu Dray patui veik hu pilih ruah ngak Phaok Bi thu chi bo, Akaok mbon Bu Prăng 1, gam ngak Phaok Kapul Ta-eng pasang iek jalan tapen negar. Di yaok bruk ngak halei, ong jeng paglaong hatai ngak bruk, abih hatai tian ka bhap bini.

Dalam bruk ngak mbang, ong taha palei Điểu Dray lac urang ba drei ngak dahlau dalam bruk salih jalan pala phun, pasiam bein taneh, ba mai siam lagaih kinh te glaong. Thun 2010, Danak dak pachreih ngak nong pakat negar ba phun macca mai pala di bhum tapen negar Quảng Trực. Dalam tuk rilo baoh sang daok kanda, ye baoh sang ong Điểu Drây pala labaih 1ha macca. Hu jak jeng akaok meti, baoh sang ong gam gam peih praong taneh pala macca pablak haong kophi, amraik talu. Ong taha palei Điểu Dray brei thau:

“Urak ini, taong abih taneh macca di baoh sang dahlak hulin lac 8 ha, dalam nan hu 1,5 ha daok brei paik baoh, 1 thun paik dua mbang, yaok mbang hu labaih 2 tan, yaom pablei labaih 70 trieu dong/tan patui bilan karei (bilan3-4), daok bilan di nyu ye (bilan 9-10) yaom glaong jang.”

Piah ngak karo kajap, baoh sang ong Điểu Dray hu mbaok tame HTX ngak nong di bhum palei. Ong kham merat bac megru paglaong ilamo ky thuat, jalan raong pala, paik baoh, ngak kaya nong tui jalan karo kajap. Ong jeng jak ba mikva hu mbaok tame hop tac xa piah pambuak patagok kinh te tani tanat. Tal ini, xa Quảng Trực, tinh Lam Dong hu labaih 1.500 ha macca, peih tabiak kein lagaih ngak mada ka urang ngak nong, rilo meng lac mikva urang bangsa takik. Di mbon Bu Prăng 1, hu yaok pluh baoh sang pala macca; rilo baoh sang hu jien mek tame tani tanat yaok thun yaok rituh trieu dong.

Oh lac nao dahlau dalam bruk ngak mbang, ong taha palei Điểu Dray daok sangka khik ramik saong patagok ilamo bangsa M’Nông. Bahrau blaoh, hadei tuk salah blaoh bilan pala, urang M'nông daok di Quảng Trực peih raya uan bilan yuak kuak dalam sap kong caing sameng. Ong taha palei Điểu Dray naih gheih dalam khan ao jih dalah dang akaok kapul taong caing Bu Prăng 1. Amuk Thị Sư, urang jakar Bilik Ilamo – Xa hoi xa Quảng Trực, brei thau: ong taha palei Điểu Dray gam haong kapul kong caing mek hu rilo jak jeng di dom mbang pakacah, me-in adaoh tamia bhap bini.

“Ong biak buh abih hatai tian dalam dom danak dak di mbon, lac urang dang akaok bruk jak ba mikva khik ramik adat cambat. Lac akaok kapul me-in kong caing, ong peih bruk parang iek dalam bingun raya adat, daok tapak pato ka rairah sit thun umo bac saong khik ramik ilamo bangsa.”

Ong Điểu Minh Nhật, Phaok Akaok Uy mban mat tran Negar, Bi thu Kapul Dam dara Cong san Ho Chi Minh xa Quảng Trực brei thau, Ong taha palei Điểu Dray daok lac urang naih gheih ka rairah harei hadei ngak tui.

“Kapul ndoan xa pambuak haong dom mbon, kapul pacang khik jalan tapen negar gam haong Balai Bien phong khik ramik siam mekre bhum tapen negar. Ong taha palei Dray daok pambuak haong kapul Dam dara peih bruk me-in kong caing, pathau khan dam dara khik ramik ilamo, ngak tui hukum, khik glai, oh pang panuac plue nao ngak bruk suan hukum…”

Dom kham merat karo kajap di ong taha palei Điểu Dray hu daong mbon Bu Prăng 1, xa tapen negar Quảng Trực, tinh aLam Dong khik kajap an ninh siam mekre, patagok kinh te, khik ramik ilamo. Ta-eng ong taha palei jeng rilo mbang hu dom pakat karja saong bol lin bien phong pok meyaom kayua bruk ngak jak jeng dalam bruk jak ba bhap bini, padang palei pala bahrau saong khik an ninh tapen negar./.