Adei Võ Thị Như Ngọc, Bi thu Kapul dam dara Komunik tal bac 12A1, THPT Lê Quí Đôn, ban Buôn Ma Thuột, tinh Dak Lak ieu lac sa urang anek saih hu angan brei tame Ndang tuk umur bahrau ganap 18 thun. Nyu jeng brei mboh njauk di dalam bruk kham marat di dalam bac saong magru di adei dalam ralo thun. Như Ngọc khan brei thau lac:

“Dahlak biak mboh hadah mbaok. Nyu jeng yau hu jalan brei ka akau bac magru pabak ilamo ka drei jeng ye brei pacambak bruk siam makre, kham marat di drei tal grauk ayut vil taom dar dalam sang bac”.

Tui ong Nguyễn Tiến Dũng, Bi thu Chi bo, Akaok sang bac THPT Võ Nguyên Giáp, hu padang di thun 2021, sang bac hu 27 urang ndang. Tapak tame harei bahrau brei padang, Chi bo biak caik hatai tal bruk ngak paralo urang ndang. Oh sa janih duah urang dah krah di dom jakar, gru pato, manuac ngak bruk, blaoh sang bac daok caik hatai tal brei paralo urang ndang di dalam anek saih dah krah. Thun bac 2023- 2024, sang bac patame hu 6 urang ndang bahrau di anek saih bac magru. Piah duah, pilih ruah urang siam dah, langiu bruk bac magru ilamo, dom adei anek saih daok pachreih tame bruk bruk ngak, bruk rahra xa hoi piah brei pasram, pahat chinh tri. Ong Nguyễn Tiến Dũng, khan lac:

“Labik ralo abih di nyu mai meng urang kapul Ndoan sang bac, iek glang jalan bac magru kham marat bruk buh prein yava klak rup di dom dei. Labik yang ka dua mai meng gru pato pan tal bac, dom gru pato bac pan kajap ilamu bac magru di dom adei hu darah ngak bruk kapul dam dara. Gam saong hu siam dalam bac magru, dalam pasram pahat piah mek tanut siam brei paralo urang Ndang”.

Meng thun 2020 tal ini, dalam abih tinh Dak Lak brei patame hu 368 urang ndang ieu lac anek saih dam dara; tapak dalam thun 2024 hu 200 anek saih hu patame Ndang. Tui ông Đỗ Tường Hiệp, Phaok Yam ndok Sơ Pato Magru tinh Dak Lak, hu dom janih chreih yau ini mai meng yaom siam piah dom sang bac bac magru brei paralo urang Đảng di dalam damdara anek saih bac. Bruk gam bac siam, gam tame bruk piah pahat pasram ilamu politik chinh tri jeng sa bruk njauk ngak di dom adei. Masa meng anak, So Pato Magu njauk daok brei pambuak bruk saong dom pakat uy Ndang, sang bac piah daong sa labik kien lagaih brei pasram ilamu siam gheih ka dom saih bac. Ong Đỗ Tường Hiệp, brei thau:

“Bruk ngak paralo urang ndang dalam sang bac hu brei caik hatai. Mboh dalam nan hu ralo di dalam kapul anek saih. Dom urang kapul ndoan dam dara dah krah dalam sang bac THPT hu brei pabak ilamu patagok glo saneng ka gah chính trị, akaok hadah krah dom baoh caong khin jalan katmang piah pabak ilamu saong patame ndang piah dom adei hu jalan kham marat meng aval ka hadei di nan paralo dalam harei hadei”.

Bruk ba saih bac patame Ndang oh sa janih brei sambai ka rup eng blaoh nyu daok brei mboh bruk dam dara Dak Lak di dalam bruk padang saong patagok taneh ia, nagar. Dom urang ndang dam dara pabam dalam sang bac yau ye asal pajaih merah bhong, hatai caong khin ka anek kamuan pambuak drei saong patagok di Ndang dalam harei hadei./.