Sa-ai Kim Anh, tuai jirah mai meng Dong Nai brei thau, oh lac bilan pandiak blaoh yaok harei raya, harei tet atau puac adit, baoh sang sa-ai jeng ruah dom labik di tapen tasik Ba Ria – Vung Tau jeng yau Vung Tau, Long Hải, Hồ Tràm… piah padeih padei saong menei tasik. Tui sa-ai kamei Kim Anh, langiu bruk mbang kaya ikan tasik that bangi, menei ia tasik tuk halei jeng hu brei caik dahlau tuk mai tal ini. Hadei nan lac nao rivang me-in di labik danei angan yau ye ceik Praong, ceik Sit di phuong Vung Tau, palei ngak bruk nao tasik Long Hải ahau maong iek tasik raok angin di Hồ Tràm. Sa-ai mboh lac, oh lac dui pachreih ngan haong dom baoh sang, dom tasik menei di gah Pur Ban raya Ho Chi Minh daok hu prein dui pachreih gam song anek ranaih meng tasik atah, gheih, ia jangaih la-an saong labik hacih sa-at.

“Dahlak sahaneng lac bilan halei nao tasik jeng mat la-an, dom labik menei di Vung Tau rahra di ini biak gheih ghang, jirah rivang daok patagok, biak lagaih saong baoh sang. Bruk mat laneing lanoi di tasik saong glai lac kein lagaih piah uranaih hu mai me-in”.

Dahlau tuk ngak ramik pataom kabat karja, ban Vung Tau (klak) hu 3 mbang danak gauk mek hu hadiah ban Medin Jirah rivang Hacih ASEAN thun 2020-2024, tapa di nan ngak jeng bruk randap ka “jirah rivang hacih sa-at – siam mekre” dalam bhap bini. Ini hu maong yau lac bruk hu makna piah ka phuong Vung tau patui veik paasiam thaik thaot, pasiam hatai je di tuai damuai saong dom gah buh jien tame ngak.

Ong Vũ Hồng Thuấn, Akaok UB Bhap bini phuong Vung Tau brei thau, ngan haong dom jalan pambuak hu makna yau: jalan raya peih samar Ban raya Ho Chi Minh – Long Thành – Dầu Giây, jalan peih samar Bến Lức – Vung Tau, phuong Vung Tau caong takre lac jeng sa labik mai jirah rivang lagaih dalam bhum.

Dalam labik patagok bahrau, phuong brei peih praong dom labik bhap bini rahra tapen tasik, khik kajap labik menei siam karo– hacih sa-at gheih ghang; jhul khang pandar taka so dalam bruk pasang iek; padang majam danak dak tasik – pahat padhih – raya tui bilan; gam haong nan khik tani tanat jalan patagok jirah rivang hacih hijao pagam haong jalan ngak Net Zero di Ban raya Ho Chi Minh. Langiu di nan, phuong pataom tame khik ramik, padang tabiak saong pakajap dom danak dak, harei raya ilamo, inem mek sajarah. Cambaih laih lac, Adat raok Ikan Ong Thắng Tam brei hu patagok piah meda hu ngak bhian salih ka bruk ngak tui bilan yau dahlau diah, plaih palai pajua saong ngak pabak veik ndap nda ilamo karei duh ka tuai damuai. Ong Thuấn brei thau:

“Phuong Vung Tau hu ceik, tasik biak gheih. Anak meta khol dahlak brei khik ramik alam langik tasik di labik ini. Mboh di nyu nan hu lac, tuk Bein bangu Thùy Vân – Labik menei gah likuk ba tame raok tuai damuai brei hu biak rilo ndap nda, jitvu ngak labik ini jeng ban medin malam, peih dom danak dak ilamo – pahat padhih praong. Daok di tasik ye yaok bilan brei hu meng 3-4 danak dak yau ye kacah gilai, tachak kapal, par dù…rah tabiak luac thun, yau nan tuai damuai mai tal Vung Tau brei hu rilo danak dak piah me-in”.

Akaok UB Bhap bini xa Hồ Tràm, ong Huỳnh Phi Khánh brei thau jalan patagok kinh te di bhum palei brei pataom tame 2 gang pasak: jirah rivang siam glaong saong ngak nong ilamo ngak kong glaong pagam haong jirah rivang. Raok labik pataok bahrau, xa hu caik 5 labik taneh ngan haong taong abih labaih 180ha taneh hu quy hoach ka jitvu – jirah rivang, pamaong tal ngak jeng dom labik jirah rivang tapen tasik saong asar siam glaong dalam tukvak anak tal.

“Dalam bruk pamaong meng anak mai tal, 5 labik taneh ini brei pataom tame dom jitvu, ndap nda duh ka jirah rivang piah dui pachreih tuai damuai, langyah hatai caong rivang me-in, padeih padei di rahra, tuai damuai oh lac di dalam bhum bo daok dui pachreih tuai damuai.”

Pasiam ha tang jirah rivang tapen tasik, peih praong labik bhap bini rahra, padang thaik thaot labik menei hacih sa-at, salamat, patagok dom janih pahat padhih tasik saong parilo ndap nda jirah rivang pagam haong ilamo – kaya mbang – raya adat… daok lac dom jalan patagok hu makna di dom bhum palei tapen tasik dalam Ban raya Ho Chi Minh. Pandar lagaih bruk rivang me-in dalam labik patagok bahrau, dom bhum palei daok patui buh jien tame padang dom ndap nda karei, hu prein pambak tabiak saong hu prein meraik glaong, pamaong tal pabak hu hatai caong dak harei dak glaong di tuai damuai, abih di nyu nan lac hu tanut buh jien tabiak glaong./.,