Adei Siu Thuý, bac tal 6A, Sang bac Tieu hoc saong THCS Chư Đăng Ya, xa Biển Hồ tinh Gia Lai (xa Chư Đăng Ya, huyen Chư Pảh klak) bahrau meng blaoh mbang pakacah meteh tukvak bac akaok meti dalam thun bac 2025-2026. Thúy brei thau, 5 thun danak tuk bac tieu hoc adei jeng mek hu xuat sac, nan oh mboh kan kandah dalam mbang pakacah ini. Dalam nan, di labik gam bac gam daok meteh harei, hu gru pato buh abih hatai tian pato megru, nan adei Thúy mboh sahnang hatai, kham merat bac krah:

“Gru pato di sang bac buh ba abih hatai tian saong sangka tal khol adei. Khol adei brei kham merat jang, piah oh ngak duh hatai amaik ame saong gru pato.”

Gam haong bruk paglaong taong abih ka ndap nda kaya dom pakat sang bac, asar siam ka bruk pato megru di bhum urang bangsa takik tinh Gia Lai hu paglaong tantu. Adei Rmah H’ý, anek saih tal 5B, Sang bac Tieu hoc - THCS Chư Đăng Ya brei thau, tuk halei jeng hu bruk daong di gru pato saong sang bac dalam luac jalan bac magru. Oh lac pato kadha bac ka mbuan thau, pato megru abih hatai tian, gru pato daok bhian sangka, duah thau ka baoh sang dom adei piah hu dom bruk daong prein, daong dil samu. Patui di nan, daong adei dak harei dak siam lagaih ralo jang.

“Gru pato jeng biak sangka tal khol adei, tuk halei jeng daong prein khol adei. Tuk khol adei gaok kan kandah ye gru pato daong. Meng nan, bruk bac megru di khol adei siam lagaih tagok jang rilo. Caong takre di adei lac jeng Kong an.”

Ong Nguyễn Chiến Thắng, Akaok Sang bac Tieu hoc – THCS Chư Đăng Ya brei thau, sang bac hu 90% dalam taong abih jaik 500 anek saih lac urang bangsa takik, rilo meg lac bangsa Jrai. Dom sarak lagaih, daong brei di Karja brei ka anek saih saong gru pato di bhum 3, hu daong asar siam pato saong bac megru di sang bac dak harei dak hu paglaong:

“Kayua bruk sangka, dom sarak di Ndang, Karja yau nan, meng ilamo di amaik ame saong anek saih bhian thau lac thun hadei tuk halei jeng glaong jang dut saong thun dahlau. Rahra sahnang payua anek bik ka sang bac, abih di nyu nan lac amaik ame hu sangka, yaom lac kan kandah yau habar jeng brei ka anek bik nao bac hu ginup. Sang bac jeng jie tame, meng yau nan, dom o tra ilamo dalam rahra hu glaong tagok, siam jang rilo”.

Tui ong Nguyễn Đăng Quang, Akaok UB Bhap bini xa Gào, tinh Gia Lai lac labik hu 65% rahra lac urang bangsa takik, jak jeng di dom sarak pato megru ngan haong bhum bangsa takik dalam rilo thun hu paglaong ilamo rahra. Tapa di nan, bruk pandar ilamo ky thuat tame ngak mbang dak harei dak hu siam lagaih, raidiuk di mikva hu siam tantu. Abih di nyu nan lac, dom anek bik dalam mbon palei hu tame dai hoc, cao dang atau nao bac megru bruk ngak dak harei dak rilo. Meng nan, ngak jeng sa kapul urang ngak bruk hu ilamo glaong, duh ka bruk patagok kinh te, xa hoi di bhum palei.

“Bruk sangka tal pato megru di Ndang, Karja negar drei biak njauk, dalam nan mboh cambaic di nyu nan hu lac di bhum atah bayah. Ilamo dak harei dak hu paglaong, dom kamuan bac dai hoc biak rilo. Daok gah bhum palei ye khol dahlak padang kapul urang jakar di labik, taduan dom kamuan bac dai hoc mai piah padang kapul urang ngak bruk ka harei hadei di bhum palei.”

Dom sarak njauk ngak jeng bruk salih khang ka pato megru bhum urang bangsa takik di tinh Gia Lai saong dalam negar. Anek saih hu kein lagaih dalam bruk mbang bac, gru pato sahnang hatai piah ngak bruk di drei, ndap nda kaya dak harei dak salah blaoh. Meng nan, asar siam pato saong bac megru hu paglaong tantu, ilamo rahra dak harei dak hu pasiam yaok thun. Ini lac bruk hu makna piah hu urang ngak bruk di labik, daong jhul tagok karo kajap bhum atah bayah, bhum urang bangsa takik./.