Tuk ilamo kong nghe saong salih taka so oh daok lac atah bayah, bo hu jeng bruk daong biak lagaih, rilo urang kumei bangsa takik thau taduan dom bruk lagaih nan. Meng bruk hadah krah,  jak gheih, urang oh lac ngak kaya meda ka baoh sang di drei bo daok pambak praong ilamo biak gheih di bangsa drei, rik tame ngak hu jeng biak dom bruk di Danak dak 8 “ Ngak tui hukum samu gauk saong langyah dom bruk samar chip ka urang kumei saong uranaih” di Danak dak pakat negar patagok kinh te xa hoi bhum urang bangsa takik saong bhum ceik.

Sa dalam dom dalikan patua veik pachreih ka urang karei nan lac bruk ngak di Khà Thị Hạnh, kumei dara bangsa Thái mai meng Lai Châu. Praong tagok di bhum glong, Hạnh thau tantu cambaic laic dom janih jru jaik taphia drei. Mboh y hoc di bangsa dak harei dak takik thei thau, anai kham merat bac megru tani tanat di Sang bac Y Duoc Lê Hữu Trác. Hu ilamo dalam ralo, Hạnh  oh lac tahu dom meta jru di muk kei bo daok thau ngak tui ilamo birau piah ngak tabiak dom pandap meng phun jru hu mbuan pandar jang.

Thau pambak tame bruk samar drah di TikTok, Khà Hạnh padang kenh “ Tay Bac TV”. Dom video biak mbuan mbiah, biak biai brei ka urang hu thau bruk roh duah, paik  mek, ngak jeng jru gam khan brei urang mbuan thau ka bruk pandar jru pachreih biak rilo urang tame iek, ngak brei jru gai Tay Bac hu rilo urang thau tal.

“ Tuk ba tagok kenh online Tây Bắc TV ye camereip khol dahlak padang ngak sa kenh dahlau. Hadei tukvak katut panak, khol dahlak brei mboh labik dang di drei saong pablei hu biak ralo dom kaya nong, jru phun glai. Dahlak mboh lac, meyah ta-eng khol dahlak ngak hu ye daok mikva karei ye habar? Meng nan khol dahlak peih tabiak veik rilo kenh saong tacei pato ka biak rilo adei sa-ai di bhum atah bayah jeng yau po di kaya OCOP piah thau ngak habar ba kaya kan drei tagok pablei di online."

Camereip, Khà Hạnh caong khin klak rabha ilamo. Min dom panuac khan veik di urang blei, dom dalikan ka ndap kaya  di drei  hu daong ka urang prein yawa karo jang lac pachreih ka anai kham ngak veik. Hạnh mboh lac:

“ Dahlak mboh anek manuac salih karei saong xa hoi salih birau. Meyah doanh nghiep di drei bo oh salih tui samu ye drei kadun likuh. Mbluak jang Lai Châu lac sa bhum taneh hu biak ralo kaya nong bingi, abih di nyu lac jru karei krih. Min meyah drei daok cang tuai mai sirah rivang tal labik ye biak kan kandah, bruk pablei biak suai ralo. Dahlak mboh tuai angaok mang online ye tuai pak halei drei hu mbaok pak nan.”

Dalikan di Khà Hạnh lac brei mboh ka bruk diuk rai sami samar di sa urang kumei bangsa takik meda pambuak bruk di muk kei saong bruk jaman birau piah ba mai makna ka bhap bini rahra. Meng bruk eng drei ngak po kenh "Tây Bắc TV" saong pablei kaya nong hu lagaih, jru tavao, anai daok peih tabiak rilo kenh karei di gauk, pamong tal bruk adei sa-ai di bhum atah bayah saong dom po pandap OCOP jalan ba pandap tagok online.

Viet Nam daok jhul pasamar pandar taka so saong bruk cakrok patagok khang kajap. Bruk bac megru ilamo piah ngak kinh te taka so saong kinh te payeng ka urang bangsa takik oh lac bruk caong khin likei kumei samu yau gauk bo daok pagap yau radak piah kandeik brei cakrok patagok kinh te- xa hoi, patrun kathaot rilo gah.

Thau cambaic laic ka dom kan kandah saong lagaih nan, Rajaei brei ngak catang bruk. Danak dak 8 dalam Danak dak pakat negar lac sa bruk yau brei mboh di meta cambaic laic. Akok Kapol Urang kumei Viet Nam Nguyễn Thị Tuyến brei mboh: “Bruk kham ngak bahu di Danak dak 8 lac paglong jalan sahaneng, salih bruk parabha likei atau kumei, sangka ka raidiuk, jalan sahaneng, khik caga, iek glang urang kumei saong uranaih, ngak tui bruk ba tabiak lilei atau kumei sumu yau gauk saong patagok bruk ngak di urang kumei  dalam bruk patagok kinh te - xa hoi”.

Buh prein buh jien tame bac ngak kinh te taka so saong kinh te tuan hoan ka urang kumei bangsa takik oh njauk lac sa paok jien buh ta biak ngak pahala, bo lac sa paok jien ngak mbang suai lavik ka bruk cakrok patagok khang kajap di taneh ia. Yaok urang kumei bangsa takik hu jao brei “gah vah” ilamo saong  jalan ngak, urang oh lac tapa truh kathaot ka baoh sang di drei bo daok hu jeng dom urang pambak praong bruk salih birau, rik tame padang ngak bhum urang bangsa bhum ceik hu jeng “ bhum taphia negar” khang kajap saong lac prein khang pachreih bruk patagok di taneh ia./.