Palei Gia Xiêng di tapen nagar xa Rờ Kơi, huyen Sa Thầy, tinh Kon Tum hu jaik 300 baoh sang saong 1.000 urang rahra, ralo abih di nyu ieu lac urang bangsa Xơ Đăng. Sa-ai A Thể, Bi thu Chi bo – Akaok palei Gia Xiêng, brei thau, hadei di tuk salah blaoh nyom raya Chi bo, 14 urang ndang di Chi bo hu brei parabha bruk cambaih laih piah kuhria jak ba dom baoh sang pasiam bein apuh pakak saong daong 8 baoh sang kathaot daok veik di palei brei patagok bruk ngak mbang dalam sang:

“Chi bo ba tabiak sarak blaoh biai saong rahra ka njauk hatai tame ngak saong gauk, kuhria ka kinh te sangka dom phun pala athur raong. Jak ba mikva daok ngak di taneh jhak brei salih janih phun pala, pasiam bein puh cakak pataom tapa pala durian, macca saong dom janih phun pala karei. Baoh sang kan kandah blaoh oh hu urang pambak ye pataom daong iek ka baoh sang urang nan. Praong di nyu mboh lac rahra sa hatai saong chi bo”.

Ndang bo tapen negar xa Rờ Kơi, huyen Sa Thầy, tinh Kon Tum hu 13 chi bo hu 176 urang ndang, dalam nan hu 6 chi bo palei urang bangsa takik. Hadei tuk dom chi bo jak jeng blaoh mbang nyaom raya, Ndang bo xa Rờ Kơi peih ngak jak jeng mbang Nyaom raya mbang ka 18, tukvak 2025-2030.

Sarak mbang nyaom raya Ndang bo xa Rờ Kơi brei mboh masa bahrau cakrok patagok kinh te kuhria rah tapa yaok thun mek hu 14%; dom baoh sang kathaot yaok thun hu trun meng 5-6%; tal thun 2030 xa mek hu kuhria rah tapa yaok urang lac 68 trieu dong;…Ong Mai Nhữ Nam, Phaok Bi thu Ndang uy, Akaok UB Bhap bini xa Rờ Kơi, brei thau, hadei di tuk peih mbang nyaom raya, Ndang uy xa samar drah peih ngak dom jalan langyah piah ngak dom bruk kuhria patagok kinh te – xa hoi:

“Mbang Thuong vu Ndang uy xa peih samar bruk ba tabiak dom asal kadha sarak di mbang nyaom raya oh luai suai. Jao bruk ka dom chi bo blaoh peih ngak grauk abih trun ala labik dalam nan lac rah piah ka rahra thau tani tanat sarak karjar. Ngak tui sarak pasiam bein puh cakak, brei oh daok baoh sang taik tahak salih phun pala meng phun panak harei tal tapa phun atah harei”.

Amuk Y Sâm, Phaok Bi thu bhian hu mbaok di Huyen uy, Akaok HĐ Bhap bini huyen Sa Thầy, tinh Kon Tum brei thau, ngak tui kadha tamat Ket luan taka 127, harei 28/2/2025 di Mentri Chinh tri, Mbang Bi thu, Ndang bo huyen Sa Thầy brei dang padeih peih ngak nyaom biai, oh daok hatai dang pang, cang maong eik bruk dak ramik peih ngak karja he thong chinh tri blaoh jeng kham merat patui ngak dom bruk tui jalan patagok:

“Khol dahlak hulin paglaong kein lagaih di bhum palei. Dom danak dak siam lagaih daok patui ngak. Langiu di nan ieu dom gah rik daong buh jien tame padang patagok huyen. Brei ka bruk padang Ndang khol dahlak hulin pataom tame ka bruk padang kapul ndang khang kajap saong sangka tal bruk pato pakei, pato pakai kapul urang jakar meng pakat huyen tal labik piah ka ngak siam bruk bahrau”.

Ndang bo huyen Sa Thầy hu pakat Tinh uy Kon Tum ruah piah peih nyaom raya dalam bilan 6 – 2025. Kayua yau nan ye tal harei 27/2 bahrau tapa abih 11 xa, ban sit di dalam huyen hu salah blaoh bruk peih mbang Nyaom raya ndang bo tukvak 2025-2030. Mbang Nyaom raya biai hu ruah 160 pakat uy vien, 55 urang Uy vien Mbang Thuong vu Ndang uy, 11 Bi thu Ndang uy saong 22 urang Phaok Bi thu Ndang uy. Bruk peih ngak, ngak dom bruk kuhria patagok daok hu ngak samar drah saong oh daok cang caong pang, cang maong bruk dak ramik kapul karja he thong chinh tri./.