Xã Phương Thạnh, Huyền Hội, huyện Càng Long, labik hu rilo bhap bani Khmer daok, harei ini hu salih bahrau mbaok meta. Jalan nhựa, bê tông nao mai mbuan lagaih, dom baoh sang bahrau salih ka dom baoh sang krem la-a taik tahak dahlau diah. Ong Thạch Ngọc Phương Thi, urang kak kajap haong bhum taneh ini meng sit mai brei thau: dahlau di harei peih paha labik ini kan kandah rilo, yaom lac oh ka tal 20km min caong khin nao tagok darak tỉnh njauk lahik abih meteh harei. Min urak ini, dalam 20 minit lac nao tal labik saong nao tuk halei jeng hu kayua jalan mbak nao mai mbuan lagaih saong tuk melam hu gom truac hadah. “Dahlau di harei taneh aia peih paha ye rai diuk bhap bani kan kandah rilo. Daok harei ini ala bruk sangka ba jalan di Đảng saong Karja, rai diuk di bhap bani salih bahrau biak rilo. Abih di nyu lac mikva Khmer urak ini oh daok dalam baoh sang kreim la-a taik tahak tra”.

Oh lac dom labik hu buh pren yava ka cách mạng hu  Đảng, Karja sangka, bo dom labik karei hu rai diuk cuang kandah jeng hu mbang tui sarak. Pagap yau xã Đa Lộc, huyện Châu Thành, sa dalam dom  xã biak kan kandah urak ini jeng mek hu angan palei pala bahrau. Urak ini, jien mek tame kurhia tui akaok menuac di xã hu labaih 53 triệu đồng sa thun. Hu yau nan, sa binah mai meng ilamu ngak mbang di mikva labik ini hu glaong tagok.

Taphia dom sarak daong palagaih piah cak rok patagok kinh tế, dom kapul nyaom  chính trị, xã hội, ba akaok nao dahlau lac Mặt trận negar tuk halei jeng kham merat pathau khan, ieu pataom bruk gul pataom taong abih bangsa. Tapa nan, bhol bhap rahra tuk halei jeng daong gauk meng bruk ngak mbang cak rok patagok kinh tế baoh sang tal dom bruk ngak di puk palei.

Meng sa labik hu jaik meteh bhap bani lac sang kan kathaot dalam dom thun camereip bahrau padang veik tỉnh di thun 1992, harei ini baoh sang kathaot trun daok 0,56%; jien mek tame kuhria rah tapa sa urang mek hu labaih 63 triệu đồng sa thun. Tal harei ini, dalam tỉnh hu 80 dalam 85 xã mek hu angan palei pala bahrau, 6 jabat pakat huyện mek hu chuẩn saong ngak salah blaoh bruk padang ngak palei pala bahrau. Hu yau ini, lac meng hu bruk pan akaok ba jalan di Đảng, bhap bani dom bangsa di Trà Vinh tuk halei jeng patagok bruk gun pataom, cak rok ilamu anh hùng dalam jaman mesruh metak, harei melam kham merat padang rai diuk bahrau. Ong Phạm Tiết Cường, Phaok akaok UBMTTQ Việt Nam tỉnh Trà Vinh brei thau:  “Tapa dom jaman cách mạng, bhap bani dom bangsa, dom ngành dom gah, hu ngak jeng pren khang jum pataom. Bruk gun pataom taong abih bangsa hu jeng bruk ngak gam gam di đảng bộ saong bhap bani tỉnh Trà Vinh. Dalam tukvak dak padang taneh aia, mặt trận saong dom kapul nyaom chính trị, xã hội dom pakat, kham merat pambuak bruk peih ngak, pasang iek dom danak dak, rik daong dak padang bruk gul pataom  abih bangsa”

Meng pren khang gun pataom urang lin haong rahra, gun pataom bangsa hu cak rok patagok, bruk daok pamaong tal nan lac tal thun 2030, patagok kinh tế kuhria rah tapa bhum urang bangsa takik di Trà Vinh mek hu takik abih meng  6% sa thun tagok. Jien mek tame kuhria rah tapa yaok urang bangsa takik jaik samu haong yaom jien mek tame kuhria tui akaok menuac dalam tỉnh; trun baoh sang kathaot daok ala 3%. Hu 70% xã bhum urang bangsa takik mek hu tanut chuẩn palei pala bahrau paglaong. Piah mek hu dom tanut ba tabiak ini, langiu di jien padai pren khang buh tame ngak di dom gah, tỉnh meda salih bahrau bruk ngak saong paglaong siam mekre khik iek karja ka bruk ngak gah bangsa; dak padang saong peih ngak dom đề án, danak dak, sarak peih ngak Chiến lược bruk ngak bangsa. Ong Hà Thanh Sơn, Phaok Mban bangsa tỉnh Trà Vinh brei thau:  “Dalam tukvak anak tal khaol dahlak pataom tame pathau khan piah daong ka mikva drei mboh hu labik dang di drei dalam cak rok patagok KT-XH, piah ka rai diuk hu cak rok patagok. Kadua, khaol dahlak daok pambuak bruk haong dom sở, ngành peih ngak siam dom bruk, meng palih ruah, taong yaom tal  pasang iek piah patagok jak jeng, siam mekre”./.