Di bhum taneh bahrau, mikva jeng daok khik tamo hu rilo ilamo meng kan ngan haong dom baoh sang tuan meng kan. Kadha vak “Palei ilamo Nùng An di bhum taneh Tây Nguyên” di urang vak H Xíu, daok di Tây Nguyên.

Di kreih bein phun kafe hijao, baoh sang ton di ong Nông Văn Minh, daok di palei Quảng Hòa, puk Tam Điền, xã Ea Tam, huyện Krông Năng biak chreih chrai, siam makre sambo bhong marah di tabung kriak bahrau. Ong bui sambai chreih chrai brei thau lac: sang ini bahrau hu pasiam ngak abih yaok ratuh trieu jien ndong. Sang hu rami ramik padang gang sang danaok tui adat cambat meng kan di urang bangsa Nùng. Sang ong Minh meng Cao Bằng tame tal Đăk Lăk meng di thun 1987. Di bhum palei bahrau, langik tasik taneh riya lagaih haong rilo janih phun pala, kham marat tai tareng ngak mbang, ye nan ye jien mek tame dak harei dak kaya tani tanat:

“Tame labik ini ngak mbang jeng tani tanat jang di bhum palei klak, drei jeng pala hu dom janih phun atah thun. Maong dalam sang jeng ye mikva dalam palei mboh thei jeng ngak mbang hu jang rilo. Rup drei jeng khik hu dom adat cambat, ilamo di urang bangsa Nùng An. Daok di sang ton di ini mboh lanieng lanoi jang, adat cambat di bangsa drei lac oh klak hu. Dahlak hulin jeng caong dom rai rah hadei anek tacao jeng daok khik hu dom ilamo nan”.

Atah di sang ong Minh dom bein kafe ieu lac baoh sang 2 pakat biak khang kadang yau madin di saai Hoàng Đình Tân, Bí thư chi bộ palei Tam Điền. Saai brei thau lac: sang hu sa baoh sang ton meng kan bahrau hu pasiam ngak veik piah ka amaik ame daok, daok saai padang ngak veik baoh sang jaik 2 tỷ jien đồng piah daok karei.

Tui saai Tân, daok di palei Quảng Hòa urak ini hu jaik 60 baoh sang ye di dalam nan hu labaih 50 baoh sang ton yau meng kan dalau. Sang halei jeng hu dua klau héc ta taneh, pala phun kafe saong rilo janih phun hu yaom jien glaong yau ye phun baoh durain, mắc ca, mbe. Kinh tế ekonomi hu tagok, raidiuk tani tanatr, rahra kham marat rik prein tame padang ngak palei pala bahrau. Dalam nan mboh ieu lac mada daok atah palei lavik thun, min tapi mikva bangsa di ini jeng daok khik asal tamo ilamo meng kan di bangsa Nùng.

“Jeng daok khik hu dom ilamo siam gheih di bangsa dalam bruk ngak ndam lakhah blaoh bruk ndam metai. Urak ini dom rai ranaih, blaoh dom anek kamuan ye thei jeng thau ndem mayai sap bangsa drei. Dalam puk palei ye jeng daok khik ramik biak siam baoh sang tuan, dalam palei urak ini njauk daok dua baoh sang bahrau min, daok veik abih tih jeng lac sang tuan”.

 Amuk La Bế Thủy Trang, Phó akaok UBND xã Ea Tam, brei thau lac, dalam xa urak ini hu 19 bangsa gam daok haong gauk, dalam nan urang Tày – Nùng ralo jaik 90%. Tukvak masa mblaoh tapa, xa tuk halei jeng paglaong bruk cak rok patagok kinh tế - xã hội nao gam haong bruk khik ramik, patagok dom ilamo dom bangsa. Mboh lac palei Quảng Hòa jeng daok khik ramik dom baoh sang ton, bruk jhik manyim khan bai di urang Nùng saong daok pasiam veik ilamo meng kan yau kadha daoh hèo phườn, daok hu ieu lac daoh lượn, daoh nao mai di likei saong kumei. Ini lac ilamo meng kan biak gheih makre, ndung bak ilamo piah daong tal bruk patagok bruk du lich jirah rahra.

"Langiu di bruk khik ramik saong patagok dom yaom glaong ilamo bangsa ye rahra miuk wa di dalam palei Quảng Hòa daok gam haong gauk kham marat patagok ngak mbang, patruh eik patrun kathaot. Urak ini dalam palei Quảng Hòa ye sang di mikva daok pak ini jeng hu khang kadang, ngak mbang hu tani tanat, hu rilo baoh sang jeng hu kein laba, hu jien padai piah cak rok patagok biak siam, dom baoh sang ye urak ini daok biak takik". 

Dom baoh sang ton glaong bien mblo njup di kreih bein phun kafe hijao di palei Quảng Hòa, xã Ea Tam, huyện Krông Năng, tỉnh Ðắk Lắk. Hadei di labaih 35 thun tani tanat, dom baoh sang nan jeng daok khik tamo ilamo, hu urang bangsa Nùng yau ye kaya ngui dah krah yau amah intan daok brei patui veik khik ramik saong patagok di bhum palei bahrau./.