Bahrau rah tapa mbang hajan aia sua, rilo mblang taneh pala phun njauk aia dauk, rilo anek athur raong hu yaom njauk aia ba tatheik, min tapi gam saong bruk abih hatung saong hatai gul pataom, labaih 70 baoh sang, mboh rilo lac dom bangsa K’ho, Raglai, Cam, Lo… di palei Ka Líp saong pambuak labik daok Kai Ya, Ya Mâu, xa Phan Son hu mbaok tame Harei nyaom Paprong gul pataom taong abih bangsa thun 2025.

Tukvak tapa, bhap bani urang daok di dalam xa ba abih hatai hu mbaok tame mbang jak ba "Taong abih bhap bani gul pataom dak padang palei pala bahrau, ban ilamu".

Meng akaok thun tal ini, dom baoh sang di labik daok pambuak ini rik daong ha labaih 180 harei ngak piah ngak binek, kuac kuah ribaong kraong, pasiam veik jalan mbak duh ka bruk pala drak; pasiam veik jalan mbak nao mai dalam palei; labaih 550 baoh sang mek hu angan baoh sang ilamo.

Kadha chreih chai bui sambai di harei nyaom nan lac dom bruk main daoh tamia, ma-in padhih saong binah kacah ngak pandap mbang ndung bak ilamo di urang K'ho, Raglai labik ini. Sa-ai Đặng Thị Thái Thuận, urang Cam daok di  Ya Mâu, xa Phan Son bui sambai brei thau, sa-ai hu mbaok tame taong abih bruk ma-in yau chat bai kadung mbao mbo, dui katung talei, dhil meta jan pabui haluk, min bui sambai abih nan lac binah kacah ngak pandap mbang, kayua lac nyaom di sa-ai mek hu giai glaong.

Ong Mang Ngọc Văn, urang hu angan je pak di ini brei thau, harei nyaom thun ini rah tabiak dalam vaktu grauk labik dalam negar daok peih ngak karja puk palei dua pakat. Dahlau diah, xa Phan Son saong Phan Lam klak lac dua xa karei di gauk, urak ini yasa veik jeng sa, yau nan ye meng ini tal puac thun jeng daok rilo bruk caong khin peih ngak ka nyu samar drah, kayua yau nan ye mikva drei njauk paglaong hatai gul pataom, sa hatung hatai saong karja puk palei.

“Karja puk palei daok peih ngak sa tuk rilo bruk yau nan ye mikva drei njauk sa hatai haong gauk. Drei daok dak padang rai diuk ilamo bahrau di labik daok kayua yau nan ye bo njauk tah klak abih dom adat cambat klak oh daok laghaih haong rai diuk bahrau;njauk thau tak taom dalam bruk ngak ndam, langiu di nan daok tak taom jien ndo saong tukavk, hu yau nan ka khaol drei meng cak rok patagok.”

Taduan mek dom panuac rik daong di mikva dalam harei nyaom, ong Mai Hồng Đăng, Akaok UBND xa Phan Son, tinh Lam Ndong klah rabha, tukvak anak tal, puk palei patui veik jhul pakhang, paglaong asal kadha dalam mbang jak ba “Taong abih bhap bani gul pataom padang ngak palei pala bahrau, ban ilamu”, pambuak pagam haong bruk peih ngak dom jalan ngak cak rok patagok kinh te – rah ra di puk palei. Dalam nan, njauk pataom tame cak rok patagok kinh te baoh sang, panduan salih bruk ngak mbang pala drak, paglaong jien mek tame saong patrun kathaot khang kajap. Puk palei jeng hu ba tabiak jalan ngak brei cak rok patagok bruk palei salih, rivang jirah ma-in.

“Puk palei daok angaok jalan raya 28B atah labaih 37 km, dalam tukvak anak tal puk palei meda roh duah dom adat hukum piah jhul khang bruk ngak mbang pablei salih angaok canah jalan ini saong angaok puk palei jeng hu binek Sông Luỹ biak prong saong biak gheih, ini jeng lac labik piah pachreih tuai damuai meyah khaol drei peih ngak abih pren khang.

Mai bui sambai gam haong mikva daok di Harei nyaom, Phaok akaok UBND tinh Lam Ndong Đinh Văn Tuấn caong khin bhap bani xa Phan Son patui veik bruk gul pataom, sa hatung hatai haong gauk dalam bruk padang ngak palei pala bahrau di labik daok, abih di nyu lac bruk khik ramik asal ilamo bangsa di urang K’ho saomg Raglai di labik ini.

Tinh Lam Ndong hadei di ba pataom tame hasa ieu lac tinh hu mblang taneh prong abih dalam taneh aia, ngan haong 49 bangsa adei sa-ai gam diuk rai dui atah meng ceik glai Tay Nguyen trun tal dom xa tapain tasik, hu rilo adat cambat tanarakun meng kan./.