Dang sadrei main dom kadha ragam ragu kong caing anak tuai damuai mai iek maong, blaoh thaot phim, thaot binguk dom danak dak ilamo saong ba tagok rayak mang xa hoi, Y Justin Adrơng, daok di mbon Krơng Prong A, xa Ea Tu, ban Buôn Ma Thuột, biak chreih chrai. Anh Y Justin brei thau : “Dahlak hulin bac magru hu ilamo taong paoh kong caing, gam saong bac thau thaot binguk, mek phim piah yaih khan kong caing, biak hu lagaih ka ta-eng dahlak hulin saong ka taong abih mikva dom bangsa di Tay Nguyen hu dalam labik ilamo kong caing ini. Hu dom thaik thaot atau lac ilamo, bruk thaot phim, mek binguk meda mek dom thaik thaot, video piah khol dahlak hulin khik ramik saong yaih khan tal grauk urang”.

Mek binguk thaik thaot piah khan kadha ilamo di bangsa, daok hu ieu lac photo Voice, ieu lac sa di dalam dom janih ilamo hu Kuk Drap ar Ilamo, daok dalam Mentri Ilamo, Pahat padhih saong Jirah rivang peih ngak di tinh Dak Lak meng jaik si luac thun 2024 tapa bruk pambuak drap ar “Labik ilamo kong caing Tay Nguyen dalam jalan jirah rivang drap ar Buôn Ma Thuột - Dak Lak”. Gam haong nan, urang megru daok hu bac dom ilamo taong paoh kong caing, duah thau ka dom kadha kong caing meng kal di urang Randaiy,… Ong Y Bây Kbuôr, daok di mbon Kmrơng Prong A, xa Ea Tu, ban Buôn Ma Thuột brei thau: “Dahlau daih ye dom ragam kong caing di urang Randaiy oh hu bac magru tantu tani tanat yau urak ini. Tapa dom tal bac pasram ye ta-eng dahlak hulin biak hu mboh ilamo di dom rairah sit thun umo hu glaong jang ka bruk hu makna di gong caing Tay Nguyen, thei jeng thau saong bac dom kadha kong caing di muk-kei caik mai”.

Bruk pambuak drap ar labik ilamo gong caing hu ngak di dom mbon dalam xa Ea Tu, ban Buôn Ma Thuột. Tok hadei 1 bilan peih ngak, hu 60 video, labaih 100 thaik thaot kayua rahra ta-eng ngak jeng, brei thau lac dom kadha hu khan meng thaik thaot biak lagaih, jaik taphia.

Gam haong Dak Lak, dom tal bac pasram jeng hu peih ngak di dom tinh Gia Lai, Kon Tum saong Tay Ninh, brei ka rahra dom bangsa takik. Bruk pato kayua dom urang gru hu ilamo saong hu angan je dalam bol bhap rahra ngak, tacei ba tani tanat, hu ilamo, nghe thuat parang iek. Tui Tien si Nguyễn Thị Thu Trang, Akaok jabat Pasang iek drap ar ilamo oh mboh meng meta, Kuk Drap ar Ilamo, tuk hu srap gap ilamo, rahra brei hu ilamo dalam bruk pandar drap ar jeng sa bruk duah jien, patagok bol bhap, khik ramik ilamo.

“Bruk pambuak di dom bol bhap hu drap ar ilamo oh mboh meng meta dreih gauk, bruk pambuak di dom rairah di dalam sa bol bhap saong khol dahlak hulin tacei ba ka bol bhap jalan ngak Photo Voice ieu lac bol bhap ta-eng peih sap ndom mayai di drei, ta-eng khan dom kadha ilamo di drei. Dom kadha bingi pang abih hu khan meng mikva urang bangsa takik, jeng yau thau ka ilamo di bangsa drei, halan tian patui veik bruk di rairah kal dahlau khik ramik ilamo di bangsa drei”.

Oh sa janih paglaong ilamo ka bruk khik ramik saong patagok yaom kaom ilamo di drap ar labik ilamo gong caing Tay Nguyen – drap ar siam gheih oh mboh meng meta di rahra dalam dunya, bruk pambuak drap ar dalam jalan jirah rivang daok daong ngak tabiak prein diuk rai karo kajap ka ilamo gong caing dalam raidiuk urak ini. Pambak tame dom kein lagaih ka kong nghe saong talei intenet mang xa hoi, yaok urang me hu pataom, pambuak saong ngak tabiak dom thaik thaot cambaih laih ka raidiuk di bol bhap rahra drei, meng nan daong ngak siam jang bruk khik ramik dom adat cambat siam gheih di yaok bangsa./.