Daok di gah labik gah hanuk kraong Luy, atah jalan Negar 1 jaik 300m, labik rivang jirah Gilang peih nyaom pataom inem krung ilamo but pajaih patao Cam di palei Cannar thon Tinh My, xa Hong Thai, tinh Lam Ndong (dahlau diah lac xa Phan Thanh, huyen Bac Binh, Binh Thuan) hu rilo kapul nyaom tuai damuai duah mai rivang jirah.

       Angaok sang tol di baoh sang, dom janih kaya barih hu ba parang iek dalam dom tu kareih. Pak di ini, daok khik piah labaih 100 kaya barih daok tamo asal ndung bak yaom lingai dak rai sajarah ilamo do bangsa Cam saong dom sac phong di dom rai patao trieu Nguyễn...

       Hu yaom di abih nan lac baoh nduan di Po Klong Mơ Nai meng akaok abap XVII saong baoh tuak mbuk di hadiuk patao hu ngak meng ameh asal tamo, jalan sarak bingu hala biak karei, gam haong khan ao di patao raja, po bia patri putra ngan haong bingu hala hu ngak biak gheih ghang.

       Gam haong yaom gah ilamo – dak rai sajarah, bộ roh duah inem mek Hoàng tộc Cam saong kalan kakuh Po Klong Mơ Nai hu Mentri Ilamo – pathau khan, urak ini lac Mentri ilamo, padhih saong rivang ma-in brei angan ka Inem mek pakat negar di Sarak  ka 43 di harei 7/1/1993.

Ong Ức Viết Vòng, Akaok Mban khik iek Pasak parang iek ilamo Cam (daok dalam Muyim tinh Lam Ndong) brei thau, ini lac labik rivang jirah biak gheih, pabak hu hatai caong khin roh duah ka ilamo meng lavik rai di bhap Cam:

“Pasak Parang iek ilamo Cam meda padang ngak bruk pambuak pagam haong tour mai tal Pasak parang iek ilamo Cam tal baoh sang but pajaih patao Cam piah rivang iek gilang peih inem mek ilamo Hoàng tộc Chăm saong nao tal palei ngak gaok glah lan am jeng yau dom bimon kalan Cam yau kalan Po Anit, Po Klong Mơ Nai piah ngak jeng tour nao ma-in dalam sa harei saong abih di nyu lac dom janih kaya mbang  di urang Cam piah katung dui takai tuai damuai.”

      Daok ong Nguyễn Anh Khoa, Akaok Kong ty rivang jirah Sao Mai – jabat rilo mbang ba kapul nyaom tuai daduai mai rivang jirah pak ini brei thau mbluak:

“Langiu di ilamo Cam daok parang iek di labik ini ye njauk pambuak pagam haong dom labik, dalam nan hu palei ngak gaok glah lan am di Binh Duc saong dom palei ngak meng kan di labik ini piah pambuak pagam jeng sa danak dak tour ba tuai damuai mai haong inem krung. Yau nan min daok hu dom labik angaok jalan dom labik mai bahrau njauk hu dom labik padeih padei, pablei salih, mbang menyum nan ka meng pambuak pagam hu nyu ngak jeng sa danak dak.”

       Dalam 2 thun (2023-2024), Muyim tinh Binh Thuan klak hu pambuak bruk haong baoh sang but pajaih patao Cam peih ngak dom asal kadha yau: peih bruk pasang mong, duah thau, pataom mek thong tin, tagok talei angan kaya barih piah padang ngak “Gilang nyaom pataom inem krung ilamo but pajaih raja patao Cam”.

        Peih ngak tu parang iek, mek pagam camera pasang iek, he thong pacang caga urang co klaik, mac la-ar saong pametai anek mok piah khik janih ilamu kaya barih; pagam mek mbang bah ma QR khan brei thau ka bruk nyaom pataom inem krung ilamo But pajaih Cam brei ka bhap bani saong tuai damuai di baoh sang but pajaih patao Cam.

Gam haong nan, palaghaih ka dom urang dalam baoh sang but pajaih raja patao Cam hu mbaok tame tal pato pathram ilamu dak padang jalan ngak saong bruk ngak gah rivang ma-in.

Piah hu jalan taom gaok bahrau, biak biai patagok hu yaom, bilan 7/2024, Muyim tinh Binh Thuan dahlau diah ba tame pandar bruk ngak “Gilang peih nyaom pataom inem krung but pajaih raja patao Cam” pambuak pagam haong jalan rivang ma-in inem mek ilamo Cam di puk palei.

       Amuk Lư Thái Tuyên, Phaok akaok Muyim Lam Ndong (dahlau diah lac Muyim Binh Thuan) brei thau, gam gam haong bruk ba “Gilang peih nyaom pataom inem krung ilamo but pajaih patao Cam” pambuak pagam haong jalan rivang ma-in inem mek ilamo Cam di puk palei, Muyim Lam Ndong jeng hu ba tabiak jalan ngak cuak taka ka dom janih kaya barih hu asal tamo, siam gheih, hu thau halau gha di nyu cambaih laih dalam bruk nyaom pataom inem krung but pajaih raja patao Cam.

       Dom thun tapa, karja puk palei saong dom gah hu peih ngak dom bruk ngak piah pacang khik, cak rok patagok yaom di bruk nyaom pataom angaok nan. Yau nan min, baoh jeng siam mekre cak rok patagok jeng daok di tanut biar, oh ka samu haong yaom di inem krung. Gam haong di nan, dom janih kaya barih hu ngak meng khan bai yau dom blah khan ao di Po Klong Mơ Nai saong hadiuk anek di patao… daok khut khat biak triak. 

          Ong Lư Quốc Thiện, anek taco but pajaih raja patao Cam brei thau, baoh sang ong khik ramik dom janih pandap hu caik veik meng rai ini tapa rai diah saong biak iek prong nyu:

Tui ong Võ Thành Huy, Phaok akaok So Ilamo, Padhih saong Rivang ma-in tinh Lam Ndong, bruk padang ngak “Gilang peih nyaom pataom inem krung ilamo but pajaih raja patao Cam” piah duh ka bruk rivang ma-in di pak baoh sang but pajaih patao Cam oh ka lac jalan ngak siam gheih, kayua lac jalan mbak, sang danaok pak ini oh ka pabak hu piah duh ka kapul nyaom tuai muai mai rivang jirah.

(Băng: Jalan ngak meng anak tal di so nan lac caong khin baoh sang ba taong abih bruk nyaom pataom ini tabiak tabiak bimon kalan Po Klong Mơ Nai piah parang iek, meyaih khan, min tapi so njauk brei pasiam, padang ngak sang danaok saong sang parang iek ka nyu laghaih, grap tanat an ninh, khik hu siam mekre. Min anak meta, njauk hu bruk njauk hatai ka jalan ba ngak di baoh sang, nan ka so meng peih ngak hu dom bruk hadei di nan. Meyah ba tabiak nan ye meda ngak hu rilo bruk jang.)

        Piah ka bruk pacang khik, patagok hu yaom di bruk nyaom pataom daok parang iek di baoh sang but pajaih raja patao Cam patagok hu baoh jeng siam mekre, caong khin hu bruk pambuak gauk ka nyu siam gheih di karja puk palei, dom so, mban gah pambuak pagam saong baoh sang but pajaih patao Cam. Meng di nan, hu dom jalan ngak anak ka nyu siam anak dom hagait daok hu mboh di anek meta piah dak yam patagok hu di labik daok yaom lingai dak rai sajarah ilamo di bruk nyaom pataom saong gam haong dom jalan ngak gah jien padai tuk ba tame pambuak pagam haong dom bruk ngak rivang jirah inem krung ilamo Cam di puk palei.

Labik gah Pai tinh Lam Ndong hu rilo inem mek sajarah ilamo Cam saong nan lac labik hu rilo urang Cam diuk rai di tinh Lam Ndong. Gam haong kalan kakuh Po Klong Mơ Nai, pak ini daok hu kalan Pô Anit, Pasak Parang iek ilamo Cam, palei ngak gok glah lan am Cam Binh Duc saong abih nan lac bimon Po Sah Inư…, meyah buh jien tame ngak siam gheih, “Gilang peih nyaom pataom inem krung but pajaih raja patao Cam” peih tabiak pren khang biak prong piah puk palei peih ngak dom bruk ngak rivang ma-in inem krung ilamo.