Ong Hán Dương Công Khanh, Akaok kapul jabat ngak bruk Mat tran palei Hamu Tanran, xa Phước Hữu, tinh Khanh Hoa brei thau: ka oh hu tuk halei mbaok mata palei Cam hu salih bahrau yau harei ini. Oh lac sa janih hu karja nagar daong ngak sang bac, balai y te, sang ilamu bhap bini, labik ma-in sambai, blaoh tal urak ini tapa Danak dak pakat nagar patagok kinh te - xa hoi bhum urang bangsa takik saong bhum ceik, Karja nagar buh jien 1,2 ty dong piah peih praong jalan tuh manyek tame palei daong la palei Cam Hamu Tanran hacih saat gheih ghang jang:

Băng: Mikva ka oh khin sahneng lac palei drei hu jalan tuh manyek gheih siam yau ini. Karja nagar caik hatai yau nan thei thei jeng uan tabuan. Hu jalan nap mai lagaih gua biak ralo. Palei Hamu Tanran urak ini pasalih bahrau biak ralo dut tui dahlau.

Tui jalan “brei asar vah uak jang brei ikan”, meng vaktu blaoh, ralo danak dak nagar buh jien ngak brei ka urang bangsa Cam tinh Khanh Hoa. Palei Katuh, xa Phước Dinh palei sa janih ngak hamu ngak apuh jeng ye ieu lac sa labik pala njam patam di taneh praong labaih 300ha. Ngak tui jalan pasalih phun pala, phun rabung prang cak gha khang jeng ye urang ngak nong di ini pilih jeng phun pala brei ka "trun kathaot". Sang di sa-ai Châu Thị Chúc jeng kaya mai meng pala phun rabung phrang hijau. Sa-ai Chúc brei thau lac, dahlau diah sang sa-ai pala njam patam oh karo jien padai mek tame jeng oh kajap. Thun 2020, tuk pambuak bruk pala phun rabung prang hijau saong kapul HTX jitvu taong abih palei Katuh, bahrau pala jaik 1 sao taneh, baoh sang di sa-ai mek hu yaok pluh trieu dong dalam sa bilan. Sa-ai Châu Thị Chúc lac:

“Meng harei baoh sang ngak rabung prang hijao ini ye drei jeng hu rilo mbiah jien mek tame…”

Hu brei padang di thun 2016, tuk camreip bahrau hu 13 akaok manuac urang gam saong jien labaih 100 trieu dong min mbiah tal harei ini ngak mboh jeng, jien mek tame di HTX Jitvu Taong abih palei Katuh, xa Phước Dinh, tinh Khanh Hoa tagok labaih 4 ty dong/thun. Ong Hùng Ky, Yam ndok Jitvu Taong abih palei Katuh brei thau lac: Jak jeng mai meng kapul HTX jak ba gauk ba 45ha taneh pala njam patam karei brei tapa pala rabung phrang hijau, ngak tui jamraik pakat glaong saong mek hu yaom kaom glaong:

“Di Palei katuh ini 50 thun dahlau hu rilo phun garuai, mik va pala tok hu dom phun min.”

Palei Caklaing oh lac sa palei hu sa janih mayim jih dalah hu ralo urang thau tal, dom thun bahrau di ini, mikva daok pala phun caraih piah patagok jirah sinh thai jeng ye mek hu ralo baoh siam makre. Bruk ini brei mboh hu ralo janih siam gheih dalam bruk pasalih glo akaok ngak mbang di urang bhap bini. Ong Phú Văn Nhàng, Palei Caklaing brei thau:

“Dahlak hulin pataok tame ngak meng thun 2018 mboh hu jien tame daong brei ka drei raong anek bik bac magru hu bruk ngak. Ngak hu jang ngak padai. Pala caraih sen ngak jirah siam lagaih jang ngak hamu.”

Tinh Khanh Hoa urak ini hu labaih 11.000 baoh sang gam saong labaih 50 pabah mbang. Di xa Ninh Phước, meng thun 2023 tal ini hu labaih 40 ty dong jien brei ngak danak dak ralo janih brei ka bruk ngak mbang di bhum palei. Kayua hu yau nan, urang kathaot di xa Ninh Phước takik daok 1,84%. Ong Quảng Thúc Đoan, akaok UB Bhap bini xa Ninh Phước, tinh Khanh Hoa ndom mayai lac:

“Khol dahlak mboh bhum mikva urang Cam hu rilo salih karei…”

Mai tal palei Cam harei ini, thei thei jeng mboh di mata dom janih kadha hu salih bahrau yaok harei. Patagok kinh te - xa hoi di bhum palei Cam Khanh Hoa mboh cambaic hatai iek glang di Ndang saong karja Nagar, gam tui bruk thau yak yum jum pataom, kham marat ngak mbang uak drei yam tagok di rahra bhap bini. Ini lac sa jaman khang pakat palei, di pakat uy ndang, karja, bhap bini urang bangsa daok di Khanh Hoa daok ba abih rup kham marat tame bruk ngak mbang patagok meng anak./.