Dalam dom harei bahrau tapa, Nyaom roya mbang ka sa Ndang mbo phuong Hoa Thanh (tinh Ca Mau), vaktu 2025-2030 hu rah tabiak. Salih ka  harak ba-ar yau meng kan dahlau, yaok urang lambaok hu ba caik sa baoh mac tinh mbang ngan haong phan mem bhian pandar di nyu. Phan mem pagam ginup abih dom harak gar pambuak pagam tal yau van kien, danak dak ngak bruk, talei angan saong thaik binguk urang lambaok, daong ka urang lambaok thau abih dom khao tin hu duah thau mbuan mbiah saong samar drah. Bruk ini brei mboh hatai kham merat di puk palei dalam bruk peih ngak Sarak di Ndang ka bruk padang ngak karja lek taka so, rah ra so, laghaih haong jalan cakrok patagok di taneh ia.

Bruk duah thau angan jeng hu meng lek taka so taong abih meng jalan ngak kong duah thau meng mbaok meta, daong pakatut tukvak saong grap tanat hu ndo njauk glaong. Urang cih vak ka Nyaom roya daok pandar ilamo (AI) piah cih vak gilac dom panuac pathau khan, grap tanat brei ginup abih khao tin meng dom rik daong di urang lambaok. Amuk Trang Hồng Thẩm, urang lambaok di nyaom roya khan lac:

"Dahlau diah, khaol dahlak njauk ba rilo harak gar biak tapal. Urak ini, taong abih daok ganap dalam compute pan tangin. Kadha ini biak mbuan laghaih piah ka khaol dahlak tui iek, pataom tame roh duah saong rik daong panuac ndom hatai saneng di drei. Bruk pataom yaok urang meng mbaok meta jeng biak samar biak tantu ". 

Dalam vaktu blaoh tapa, phuong Hoa Thanh mek hu dom baoh jeng siam mekre dalam bruk panduan salih so: 100% urang jakar thei jeng thau ka bruk pandar kong nghe khao tin dalam bruk ngak di drei saong pandar harak gar tapa Email bruk ngak karja. Ty le urang ba-yar jien oh pandar jien ba-ar saong hu angan tai khoan meng ndien tu jeng ralo.

Sa janih mboh hadah tanjak karei tra nan ieu lac bruk peih ngak mini app angaok Zalo, brei adat ka bhap bani duah thau hu khao tin, pal kajap jalan ba, sarak saong payua hatai saneng di drei tapak tal karja. Urang jakar phuong hu jao bruk ngak pathau khan gilac biak cambaih laih, samar drah, ngak jeng sa kenh ndom biai nao mai biak laghaih saong cambaih laih.

Ong Hồ Thanh Thủy, Akaok mbang To chuc Tinh uy Ca Mau, mai pataom mbaok saong brei patacei Nyaom roya jeng taong yaom glaong jalan ngak di Nyaom roya "oh hu ba-ar" di phuong Hoa Thanh.

"Ini lac sa jalan ngak biak siam dalam bruk pandar kong nghe khao tin tame bruk nyaom biai di Ndang mbo, brei mboh bruk kham merat glaong dalam bruk peih ngak sarak 57 di Mentri Chinh tri, pamaong tal bruk dak padang karja lek taka so, kinh te so saong rah ra so".

Phuong Hoa Thanh, bahrau hu dak padang saong hu mblang taneh praong, bhap bani daok lapih atah di gauk, Ndang mbo, karja phuong brei thau lac panuac salih so nan lac jalan ngak ba akaok nao dahlau piah padang ngak karja pahadah kien tao, duh ka bhap bani siam mekre jang. Ong Trần Văn Trung, Bi thu Ndang mbo xa Hoa Thanh, brei thau:

"Jalan ngak ini oh lac tok patak pataom hu jien padai, peih ngak samar drah saong njauk jang, bo daok brei mboh hatai saneng ba akaok nao dahlau  di Ndang mbo phuong. Njauk saong hatai saneng  urang ndang nao dahlau, ngak dahlau. Akaok mereip, dom urang lambaok daok mboh huac kanda, min kayua hu pato pathram biak tani tanat, yau nan ye thei jeng pandar biak mbuan laghaih. Ini lac yam nao dahlau biak prong piah pambak prong jalan ngak panduan salih so tal yaok urang jaka, yaok urang ndang saong bhap bani dalam bhum".

Dalam vaktu masa ini, Ndang mbo phuong Hoa Thanh daok pataom tame bruk ngak brei ka nyu siam mekre tui Sarak 57 di pakat Trung uong, mek bhap bani ngak jeng pasak asal di dalam bruk panduan salih so. Ngan haong jalan ngak hu ba tabiak, dom hadah krah saong pandar kong nghe jeng pamaong tal bruk duh ka bhap bani  dak harei dak siam jang, palaghaih brei ka bruk patagok khang kajap saong taong abih gah./.