Di Nyaom biai mbang ka 5 di Mbang Chap hanh Ndang mbo Ban raya Ho Chi Minh meng thun 2025 - 2030, Bi thu Pakat Ndang Ban raya Ho Chi Minh, Ong Trần Lưu Quang jao brei ka gah y te peih ngak bruk brei pasang iek prein yava ka taong abih rahra ban raya. Bruk Ini hu brei paglaong siam lagaih sangka prein yava bhap bini, duah mboh samar ruak hakik saong patrun kurang naong trak dalam bruk iek glang ruak kik.                                                               

Tui brei thau di dom pakat palei, bruk ini mai meng hatai caong khin di bhap bini rahra, dalam nan hu mai meng hatai di dom urang ngak bruk bebas bras jeng ye urang umur taha. Di ban palei Vĩnh Phú (phuong Lái Thiêu), muk Nguyễn Thị Tuyết, akaok kapul 13 brei thau, labik ini hu ralo urang pablei harak ve so, urang ngak bruk biasa jeng ye urang taha matui. Kayua yau nan ye, tuk mahit hu brei iek ruak oh mek jien, ralo bhap bini rahra biak uan tabuon. Muk Nguyễn Thị Tuyết brei thau: “Drei khan tapak brei thau khau tin ka rahra dalam kapul, dom urang nan biak chreih chrai saong ba drei tame, kayua hu biak rilo urang baoh sang kan kandah, yau urang pablei ve chai, urang duon harom arak, urang pablei harak ve so. Tuk hu daong yau nan ye dom urang nan biak thau dhar phol Ban raya”.

Tui sa-ai kamei Nguyễn Thị Tuyết Hạnh (urang daok di phuong Đông Hưng Thuận), pasang iek prein yava di bhum palei hu lagaih jang, daong rahra patakik tukvak saong jien padai ka bruk nao mai. Min, sa-ai Hạnh jeng brei mboh caong khin di danak dak brei hu peih ngak tani tanat piah khik kajap asar siam ilamo, gam haong nan caong takre bruk peih ngak di labik brei daong patakik ka dom sang iek ruak pakat angaok: “Yaok mbang drei nao pasang iek ye jeng cang suai abih lac dom sang iek ruak pakat karja. Kayua yau nan pasang iek brei ka taong abih ye rahra caong hu pasang iek samar, hu pathau khan ndom meyai cambaih laih ka prein yava piah sahnang hatai tui iek, tuk caong khin”.

Di labik y te, Duoc si Thái Minh Phương, dang bruk labik Y te ka 1, balai Y te phuong An Đông brei thau bruk pasang iek prein yava yaok tukvak di bhap bini daong brei ka rahra hu pasang iek prein yava aval drah saong bhian sahnang jang.

Tui Duoc si Phương, biak nao mboh lac tuk rahra hu pandar aval drah dom jitvu y te saong hu pasang iek prein yava bhian, rilo ruak oh njom mbak meda hu duah mboh meng tukvak bahrau tamuh, tapa nan patakik jien taong ruak saong patakik ruak trak njauk tame sang iek ruak. Tukvak blaoh tapa, dom bruk pasang iek prein yava oh mek jien ka urang umur praong thun di balai hu ba mai siam lagaih tantu. Balai y te jeng srap gap peih ngak tuk hu jao pandar. Min, piah pabak hatai caong sangka prein yava dalam rahra, brei patui veik pasiam prein ngak gah y te di labik. Ong Thái Minh Phương ndom meyai lac:  “Urang ngak bruk gah y te caong khin hu pasiam khang jang ka ilamo jeng yau dom urang ngak bruk. Urak ini ye urang ngak bruk di balai y te meyah bo nao tal pasang iek prein yava tui tukvak ka rahra ye urang ngak bruk daok takik. Min meyah hu pasiam veik ka urang ngak ye balai y te khang hatai je lac meda hu ngak siam bruk ini”.

Bruk peih ngak brei pasang iek prein yava tui tukvak oh mek jien ka rahra hu caong khin brei ngak jeng bruk salih bahrau ka bruk sangka prein yava meng akaok camreip. Min, piah jalan ngak hu ba tame pandar, brei patui veik pasiam prein ngak y te di labik, khik kajap asar siam jitvu saong peih ngak lagaih, tapa nan pabak hatai caong dak harei dak tagok glaong di rahra./.