Dalau diah, jalan palei di palei Baoh bini, xa Phước Hữu praong bahrau labaih sa met, ngak ka bruk nao mai di mikwa ralo kan kandah. Tui lac urang hu angan je di palei, ong Lưu Văn Thính dang tabiak jak ba dakvah yaok baoh sang brei taneh peih jalan, gam saong gauk daong rik jien ngak jalan meng betong. Camreip akaok bruk dakvah mikva oh lac mbuan sahnang, abih dalam palei hu 2 baoh sang ngak tui. Tal tuk jalan hu peih, praong siam, mikva mboh kein mboh lagaih yau nan ye ba drei buh taneh tame peih praong hu 350m². Muk Đổng Thị Nương, di palei Baoh Bini ndom mayai lac:

"Meng nan, jalan nao biak sit, gru Thính mai jak ba kaoh taneh alin brei piah peih jalan ka praong laneing lanoi, baoh sang jeng njauk hatai."

Akaok gauk Kút Mú Tom, ong Lưu Văn Thính oh lac sa urang dalam gauk blaoh ong daok jak ba mikva daong padang jien gauk labaih 200 trieu dong piah mayaom anek saih, sinh vien bac magru siam, jeng ye sua rivang, daong dom boh sang kan sang hu urang ruak. Thau bruk kan daman di sang muk Đổng Thị Kim Cúc, tuk muk buh tangin padang sang barau, ong Thính jak dalam gauk rik dong 20 trieu dong, dong ka muk ngak hu sang gheih ghang jeng ye Pakaro dalam raidiuk. Ong Lưu Văn Thính brei thau:

"Dahlak hu palih ruah lac urang hu angan je meng harei padang palei pala bahrau ini dahlak jak ba kaoh taneh alin brei ka Karja tuh betong, anek taco nao bac hu lagaih."

Harei halei jeng yau nan, ong Hán Văn Phát, urang hu angan jie daok di palei Hamu Tanran, xa Phước Hữu gam saong mikva tagok apuh, jak mikwa khik siam bruk pandar ia, ngak taneh balau piah pala padai song raong pabe, pabo, lamo. Ralo sang kathaot daok di palei Hamu Tanran uak drei yam tagok truh kathaot karo tui bruk raong glang hu ong Hán Văn Phát daong pato tacei. Dalam nan hu sang ong Hán Văn Trợ – dahlau diah ieu lac sang kan daman abih dalam palei. Meng di tuk ba rup tame raong pabe, ong Trợ hu ong Phát daong pato bruk ngak mbang raong glang, daong pato mong iek pabe ka khang jeng ye pakurang ruak kik. Oh sa janih daong patacei brei ilamu raong glang, ong Phát daok daong gai huei, gdong ngak var ngak ro. Hu yau nan ye meng 10 ane pabe meng camareip, hadei 3 thun, var pabe di sang ong Trợ tagok 31 drei:

"Ong Hán Văn Phát ye hu apuh, raong glang limo, pabo pabe."

Xa Phước Hữu urak ini hu 9 urang mek angan jie dalam bhap bini jamaah Cam. Gait oh lac hu sa janih thau jalan sarak karja nagar, hukum nagar baloh daok yau baoh kreih camin hadah dalam bruk ngak mbang, patagok kinh te, hu ralo mikva ngak tui. Ong Trương Thanh Đạm, Akaok Uy mban mat tran negar Viet Nam xa Phước Hữu, tinh Khanh Hoa brei thau lac:

"Tukvak tapa, dahlak mboh urang hu angan je hu rilo bruk rik daong ka bhum palei dalam bruk padang bruk gul pataom dalam taong abih bangsa negar."

Dang anak dalam bruk patagok kinh tế jeng je ba bih hatai jai brei ka bruk ngak xa hoi, dom urang hu angan di dalam bhum urang bangsa Cam di xa Phước Hữu, tinh Khanh Hoa tuk halei jeng hu mikwa peih praong peih glaong. Gait yau ye “dua gah tangin dui atah” di pakat uy, karja pakat labik; oh ron seng min ngak hagaik hu angan di nan di dalam raidiuk xa hoi, jeng talei pambuak kajap di hatai Ndang saong bhap bini./.