Xã tapen tasik Cà Ná, huyện Thuận Nam harei ini mbaok meta salih bahrau haong rilo baoh sang glaong rilo tal tamuh tagok taphia gauk, dom jalan hu tuh nhựa, tuh bê tông hacih, mekre. Palei daok pataom tame patagok prein khang gah kinh tế tasik, du lịch, tiểu thủ công nghiệp, pablei salih piah salih bahrau tui jalan patagok yaom glaong, rik daong paglaong jien mek tame ka bhap bini.

Ong Nguyễn Văn Thắng, sa urang daok dalam palei brei thau, meng tuk xã peih ngak danak dak padang ngak palei pala bahrau paglaong, sang ong saong rilo sang karei abih drei pachreih tui, rik daong prein yava, drap ar piah padang puk paga. Karja dom pakat, dom gah tuk halei jeng caik hatai sangka, daong ka urang ngak ikan ngak kapal gilai hu công suất praong, pato pakai bruk ngak thuyền trưởng, máy trưởng, pandar ilamu bahrau dalam taong cap kaya ikan..., meng nan, raidiuk mikva tagok glaong jang dahlau biak rilo.

Di dom puk palei hu rilo urang Cam daok, mbaok meta palei pala bahrau hu salih karei mboh di anak meta. Pagap yau di xã An Hải, huyện Ninh Phước, bhap bini hu ngak rilo bruk bahrau ba mai kein laba glaong, salih janih phun pala takik kein laba tapa pala phun măng tây hijao laba hu meng 400 tal 500 triệu đồng yaok ha sa thun, meng nan, raidiuk di urang ngak nong, dalam nan hu rilo urang Cam dak harei dak cakrok patagok. Xã An Hải ngak hu salah blaoh taong abih 19 tiêu chí saong hu pok brei angan xã palei pala bahrau paglaong, kham merat tal puac thun 2025 mek hu chuẩn xã palei pala bahrau kiểu mẫu.

Ong Bạch Văn Nguyên, Chủ tịch UBND huyện Ninh Phước khan lac, huyện daok pataom tame daong dom puk palei peih ngak, pambak praong dom bruk pambuak gauk pala - ngak tui chuỗi giá trị, ba mai kein laba glaong yau ye bruk pala măng tây hijao, nho, medar, ngak padai, pala tangei, njam patam, baoh kraoh tui jalan ngak nong ilamu glaong pambuak haong raong lamo, pabe, pabo; patagok dom bruk menyim khan bai, ngak lan am daong ka urang Cam paglaong jien mek tame, pasiam raidiuk. Thun ini, Ninh Phước kham merat paglaong jien mek tame kuhria tui akaok menuac tagok labaih 71 triệu đồng, trun dom sang kan kathaot daok 2,48%.

Tui jabat tacei ba ramik ngak palei pala bahrau tỉnh Ninh Thuận, tal urak ini hu 2 huyện lac Ninh Phước, Ninh Hải hu pok brei angan palei pala bahrau, hu 31 xã mek hu chuẩn palei pala bahrau, 10 xã palei pala bahrau paglaong saong 38 puk mek hu palei pala bahrau, 2 puk palei pala bahrau kiểu mẫu. Meng dom bruk ngak hu di bruk padang ngak palei pala bahrau dalam tukvak tapa, Ninh Thuận daok kham merat peih ngak rilo bruk pamaong tal dom jak jeng bahrau, daong ngak brei salih bahrau mbaok meta palei pala, paglaong raidiuk bhap bini.

Ong Đặng Kim Cương, Yam ndok Sở Ngak nong saong patagok palei pala,  Chánh Văn phòng tacei ba ramik ngak danak dak bruk ngak negar padang ngak palei pala bahrau tỉnh Ninh Thuận brei thau, tỉnh daok ieu pataom glaong di abih phun jien dom danak dak bruk ngak negar padang ngak palei pala bahrau saong dom danak dak karei di dalam tỉnh, dui pachreih bruk buh jien tame ngak mbang di dom doanh nghiệp tui jalan pambuak bruk công tư saong xã hội hóa; peih ngak hu siam dom sarak brei mesraiy ka gah ngak nong, palei pala saong jak ba bhap bini hu mbaok tame, daong padang ngak palei pala bahrau pak di puk palei. Dalam nan, biak caik hatai sangka paglaong chất lượng raidiuk di bhap bini, yau ye dom bruk gah alam môi trường, salamat pandap mbang, ia hacih, daong jhul patagok dom doanh nghiệp peih bruk ngak mbang, sahneng duah bahrau, peih ngak danak dak OCOP; salih số saong patagok du lịch puk palei.

Piah ka dom bhum palei oh lac salih bahrau mbaok meta, bo raidiuk bhap bini jeng dak harei dak trei sir, tỉnh Ninh Thuận sangka patagok bruk pala - ngak pambuak pagam haong rami ramik veik gah ngak nong, salih bahrau cơ cấu kinh tế, paglaong jien mek tame ka bhap bini; sangka patagok bruk ngak mbang tui kapul nyaom, peih ngak siam dom sarak an sinh xã hội ka dom urang dalam sarak karja, sang bhap bini bangsa takik, sang kan kathaot, jaik si kan kathaot di dalam tỉnh./.