Yau ye dam dara urang Xơ Đăng, hadei di jeng diuk pasang, A Thứ saong Y Gỗ, palei Tu Thó, xa Măng Ri, huyen Tu Mơ Rông tame bruk ngak mbang barau meng dom jagak jalaing mara yau bhian mai gam haong prein yawa di drei. Dalau diah sa janih ngak padai, ngak bei di taneh amaik ame brei ka diuk pasang A Thứ haong Y Gỗ jeng ye diuk pasang karei njauk duah mbang huak harei harei dalam masa waktu biak atah. Tal urak ini mboh karei, thun camareip jeng diuk pasang, urang daok ranaih di bangsa Xơ Đăng mada hu jieng tame tabiak dalam kadung mai meng phun bei sâm dây, sa janih jru di palei.

A Thứ brei thau, yaok dom mbang xa, huyen peih dom bruk ngak, bruk yaih brei ka jru cawao, dua diuk pasang di gait ba sam talei di drei pala nao khan yaih, pablei yau nan ye hu jien ralo jang di urang karei dalam palei Tu Thó, dua diuk pasang nyu khan:

“diuk pasang hulin dalak barau lakhah, tari tariang ngak mbang yau nan jeng ye hu mboh tagok. Piah hu hagait drei hu ka raidiuk hadei drei kham marat pala sâm talei, dalam nan hu sam Ngọc Linh piah hu jien tame”.

Mbih hu jeng di dalam bruk pala sâm talei, sơn tra, ngũ vị tử, sâm Ngọc Linh…, urang bangsa Xơ Đăng salih bruk mek jru dalam glai, thau khik ramik caga jru di sang drei pala, gam haong masraiy jien piah peih praong taneh pala phun jru.. Ong A Hải, Akaok kapul ngak Nong xa Tê Xăng, huyện Tu Mơ Rông, khan:

“Dahlau diah phun pajaik di palei jaik si abih, hadei di nan mikwa palei pabam khik dak harei dak ralo, bac magru haong gauk piah pala sâm. Sang halei kurang jien ngak mbang pala phun jru hu phun jien kuria bruk ngak daong brei nyim masraiy yaok akaok baoh sang 100 triệu đồng piah pala phun jru”.

Piah daong urang Xơ Đăng pala phun jru, dom thun blaoh tapa karja huyen Đăk Glei, Kon Plông haong Tu Mơ Rông di tinh Kon Tum ndah padang bein pabam, daong pajaik, phun jien ngak mbang, ilamu jamariak ka bhap bini. Langiu di nan hu dom urang ngak mbang hu angan dalam jru cawao ba hatai tame daong ba ka rahra.

Sanang hatai haong dom bruk ngak di drei, tal ini taeng huyen Tu Mơ Rông patagok hu labaih 3.900 ha phun jru. Meng baoh sang urang kathao dalam huyen huac masraiy jieng di gilang pariak piah ngak mbang pala phun Sâm Ngọc Linh ini hu blaoh 205 baoh sang masraiy di gilang jien jaik 14 ty dong. Ong Võ Trung Mạnh, Akaok UBND huyen Tu Mơ Rông, brei thau, karja huyen ngak ralo danak dak piah baoh sang urang kathaot pala hu phun jru piah ngak mbang patagok raidiuk dalam sang:   

“Huyen hu padang danakdak daong bhap bini ngak mbang jeng ye padang mon pambuak gauk daong ngak mbang patagok carok pala phun jru. Brei ka phun Sâm Ngọc Linh ye huyen daok ngak bruk haong Gilang jien sarak karja piah daong bhap bini rahra  masraiy di dom gilang jieng karei paiah patagok phun sâm Ngọc Linh, jeng ye ieu dom urang ngak mbang pambuak gauk daong bhap bini brei cakrok bhum phun sâm di drei brei patruh eik karo.”

Di dom huyen labik hu ralo urang Xơ Đăng daok ngak mbang, gam haong padai, brei, ka phe…, bruk pala jru daok daong rahra bhap bini duah jien tame sang daong ka raidiuk trei sil jang. Dalam ralo thun blaoh huyen Tu Mơ Rông, Đăk Glei haong Kon Plông hu pakuran kathaot ralo jang di dalam tinh Kon Tum. Jalan truh ieik kathaot, ngak kaya mada meng phun jru daok peih tabiak brei ka urang bangsa Xơ Đăng tuk bo tỉnh Kon Tum kham marat pakhang jalan buh prein, patagok haong ngak tabiak jru piah mek hu tanut jeng bhum jru di pakat nagar./.