Tame puac bilan 6 tal kreh bilan 7 saka Cam, labaih di akaok bilan 10 saka ia hrei yaok thun, dom palei urang bangsa Cam di Khanh Hoa chreih chrai bui sambai raok harei Kate. Ini lac harei raya adat praong di urang bangsa Cam dalam nan hu banah adat saong banah raya.

Banah adat lac dom adat duh po duh yang hu rah tabiak di dom bimong kalan urang bangsa  Cam; adat paling yang di dom palei Cam; adat paling di yaok baoh sang, but pajaih. Daok banah harei raya pesta, hu dom danak dak adaoh tamia, pahat padhih, me-in kadha bhap bini meng kal dahlau, pakacah ngak lan am, menyim jih dalah, peih bruk me-in, sua tangi rivang gauk…Tui di nan, brei bruk bui sambai dalam bol bhap rahra Cam Ahier, jeng yau piah dui pachreih rahra, tuai damuai ba drei tame rah rivang me-in, duah thau ka adat cambat harei raya.

Palei Là A, daok di xa Phước Hà, tinh Khanh Hoa ieu lac sa labik diuk rai suai lavik di urang bangsa Raglai. Hadei sa thun hu khik piah tani tanat, meng ini, khan ao Pô ba mai palei Hamu Tanran, xa Phước Hữu, meng rilo bruk ngan haong adat gheih ghang. Tui takai urang bangsa Raglai trun ceik, adat jao khan ao di urang bangsa Cam saong urang bangsa Raglai hu rah tabiak. Di mblang taneh akaok palei Cam Hamu Tanran siam gheih raok harei Kate, ngan haong sap yava ragam ragu Pasan halai haong kadait Sarakel kayua urang Raglai me-in. Sa-ai Bà Rá Thừa, xa Phước Hà, tinh Khanh Hoa brei thau:

“Dahlak hulin mboh biak hadah mbaok meta gam haong bruk raok da-a abih tung tian ngan haong mblang caoh balaong hu ngak praong laneing lanoi, bahrau piah raok harei Kate anit ranam saong caong khin ngak yau habar ka adat di 2 bangsa Cam saong urang bangsa Raglai tuk halei jeng khik hu sa ilamo bhap bini haong gauk, nan lac khik ramik ilamo 2 bangsa.”

Tame harei Kate, oh lac sa janih urang bangsa Cam daok di Khanh Hoa bblaoh urang Cam daok diukrai, ngak bruk di grauk labik jeng gilac mai pataom ginup baoh sang, ayut cuai sahabat, urang dalam sang. Meng sa adat di bhap bini urang Cam, urak ini harei Kate daok dui pachreih bruk ba drei tame di mikva dom bangsa adei sa-ai diukrai taphia yau ye: bangsa Viet Yuen, bangsa Raglai, K’ho, Lo, Tay, Nung… saong tuai damuai. Sa-ai kamei Lộ Thị Hồng Phấn, palei Hamu Tanran, xa Phước Hữu brei thau:

“Urang Raglai ba khan ao mai tal haong khol dahlak hulin ye khol dahlak hulin salam raok biak bui sambai nan khol dahlak hulin peih sa kadha tamia Kate piah salam raok urang Raglai mai tal haong bangsa Cam khol dahlak.”

Daok po Gru Hán Dậu, dang akaok kalan Pô Nưgar, palei Hữu Đức, xa Phước Hữu, brei thau:

“Khan ao hu ba mai ginup oh kurang hut hagait. Khol dahlak hulin saong Mbang adat khol dahlak taduan kayua Kate thun ini biak bui sambai, chreih chrai, Urang Raglai jeng mai ginup, oh hu kan kandah di hagait”.

Oh lac tok hu mikva urang Cam meng grauk labik mai hu mbaok tame adat, Adat raok khan ao dui pachreih hu rilo tuai damuai dalam saong langiu negar saong dom urang roh duah ilamu bangsa. Sa-ai Đặng Khánh Trang, Sang bac Dai hoc KHXH saong Nhân văn Ban raya Ho Chi Minh brei thau:

“Tuk adei thau kadha urang Raglai khik khan ao ba trun ka urang bangsa Cam di ini lac hatai gul pataom di 2 bangsa. Adei mboh biak chreih chrai ka bruk ini saong adei caong khin hu mbaok tame raya adat ini.

Dut haong dom adat harei raya karei di dalam tinh, Harei Kate hu ngak praong, dui atah harei, rah tabiak di rilo labik saong tukvak karei gauk, urang hu mbaok tame harei Kate biak rilo, oh lac bhap bini bangsa Cam dalam saong langiu tinh, bo daok hu mbaok di dom bangsa adei sa-ai daok taphia saong tuai damuai. Nan jeng lac Harei raya adat pok meyaom dom ilamo siam gheih karei di 2 bangsa, saong tuk halei jeng karo kajap, gam haong bruk sajarah patagok di dom bangsa adei sa-ai dalam nagar Viet Nam./.