Pasak Pato megru bruk ngak – Pato megru bhian di Quan 6 (phuong Bình Tây) lac sa dalam 16 labik dahlau nan hu ngak iek piah patakik pandar phone dalam tukvak tabiak me-in. Tal ini, hadei labaih 3 bilan ngak bruk, sang bac hu rilo bruk karei gauk piah brei mblang me-in ka urang bac megru meda hu ba drei tame tukvak tabiak me-in.

Ngọc Hồng, sa urang bac megru di Pasak ndom meyai lac bruk patakik pandar phone daong dom ayut pambuak haong gauk rilo jang, salih ka bruk pandar phone tame internet, payua harak yau dahlau.

"Bhian ye adei tagok gilang tapuk puac tapuk atau me-in cờ, dahlau diah khol adei bhian pandar phone, min hadei di nan pambuak haong gauk rilo jang tapa dom kadha me-in jeng yau dom danak dak di sang bac”.

Từ Triệu Lương, urang bac di pasak ini brei thau, dahlau diah tuk pandar phone dalam tuk tabiak me-in, dom ayut bhian kurang bruk pambuak pagam kayua pataom tame pandar kaya ndien tu. Hadei tuk patakik pandar phone, Lương gam haong dom ayut bac mboh hu rilo danak dak chreih chrai dalam sang bac saong caong khin dom danak dak hu khik tani tanat suai atah.

"Hadei tuk takik pandar phone adei mboh hu rilo danak dak dalam sang bac meng dom bruk gindang megei saong hu pandar ndap kaya meng ndien tu. Adei hu mbaok tame danak dak me-in cờ tướng, cờ vua haong dom ayut cuai sahabat. Tapa di nan adei hu pabak ilamo glo akaok saong pambuak ayut cuai saong urang bac karei”.

Amuk Đặng Ngọc Thu, Yam ndok Pasak, brei thau dahlau diah urang bac bhian randap pandar phone rilo, oh lac dalam tuk tabiak me-in blaoh dalam tuk bac megru. Langiu bruk pakauk taong abih, Pasak pandar bruk peih dom danak dak, dalam nan hu bruk yau ye: puac tapuk, taong cờ vua, cờ tướng; bruk me-in haong gauk chreih sambai di mblang sang bac, adaoh sa majam; bruk ngak kong nghe hu pasang iek, dalam nan hu urang hu pandar jamraik klonputer piah ngak kadha bac, pathau khan saong pasang tagok tui kapul meng bruk tacei ba di gru pato.

"Dahlak hulinmboh dom adei hu rilo bruk salih siam, dom adei ndom meyai haong gauk rilo jang, sangka tal gauk saong bruk pandar phone jeng pasang iek hu, oh daok bruk randap bahrau tabiak me-in lac pandar phone, bo tuk tabiak me-in, dom ayut me-in haong gauk atau hu mbaok tame dom bruk haong cei nai gru”.

Di sang bac THCS THCS Nguyễn Văn Luông (phuong Bình Phú, Quan 6 klak), ong Đinh Phú Cường, Akaok sang bac brei thau jaik 10 thun tapa sang bac oh pachreih anek saih pandar phone dalam sang bac. Tui thun umo ini, anek saih hu ginup kein lagaih piah pandar phone di sang nan sang bac yasa haong amaik ame ka bruk oh brei ka anek saih pandar phone dalam sang bac saong mek hu bruk njauk hatai rilo. Bruk anek saih khin ba phone tame sang bac ye njuak hu tut angan payua ka gru pasang iek, rilo meng lac piah taong phone ieu radaih kong nghe tuk amaik ame oh mai pajeng hu. Ong lac:

"Sang bac tuk halei jeng hu phone talei, gam haong di nan akaok sang bac saong gru pato srap gap daong anek saih nyim phone meyah njauk bruk. Sang bac jeng pachreih dom adei hu mbaok tame dom kadha pahat padhih, sang bac hu mlang pahat padhih dalam sang, anek saih ba tui gai saong baoh cầu lông, caoh balaong di nan, dom gru peih ka dom adei me-in. Gilang tapuk sang bac lac gilang tapuk ndien tu, praong laneing lanoi, lac labik dom adei meda hu tame puac tapuk saong njauk njauk lac pandar phone”.

Meng bilan 1/2026, dom sang bac THCS, THPT saong Pasak Pato megru bhian di Ban raya Ho Chi Minh brei gam gam patakik pandar phone dalam sang bac, hadei tuk ngak iek di 16 sang bac brei mboh rilo salih siam saong rah tabiak dom bruk ngak siam lagaih./.