Di jalan tapen negar bhum taneran Mỹ Quý (Tay Ninh), dom mblang hamu praong tapak saong dom jalan takai tui tapen kraong ribaong nda lac sron mbon salamat lac labik di kol duas pilih ruah piah tapa mblang hamu, nao tui jalan karei, pablei dauk rilo meng lac dalam melam. Bruk ini dak harei dak sanak jak: padauk jru aphil dalam labik padang manyeik sang radaih patuh, paok ralaoh lek taka radaih, ngak ja ameh pablei dauk dalam kalaok ia tasau, rabha sit kadung piah tapa tapen negar.

Thuong ta Phạm Thành Trung, Akaok Balai mbot Bien phong Pabah Negar Mỹ Quý Tây, brei thau meng akaok thun tal ini, labik ini hu dang ngak bruk, pambuak mek 21 mbang hu 26 urang, mek khik labaih 18kg jru phil, 2 baoh phao, 32 asar đạn siu, 8 mbaik ameh gam haong rilo kaya hu pambuak…

Thuong ta Phạm Thành Trung ndom meyai lac, puac thun jeng ieu lac tukvak hu makna, jalan ngak lac “oh luai ka jeng jalan talei, labik pandiak bahrau”: "Bruk rah tabiak srau kadau puac thun, pablei dauk, bleik saleih dalam pablei salih meda hu brei tagok, urak ini khol drei hu peih 6 kapul balai dalam negar. Taphia di nan, peih dom kapul pasang iek pambuak haong dom kapul dang di dalam bhum… dang akaok bruk tagok jalan pambuak piah kak kajap tapen negar jalan haluh, jalan karei. Dahlak sahaneng lac tukvak anak tal bruk pablei dauk bleik saleih ye oh hu labik pandiak."

Meyah Mỹ Quý hu labaih 13km tapen negar bhum taneran laneing lanoi ye jalan Hưng Điền – Sông Trăng ieu lac jalan ia kraong. Ia taom gauk di ribaong ini ribaong diah saong mblang hau ngak jeng labik kan si maong mboh piah ka kol duas pandar gaiy sit, trun mac pajeng ba jru phil, phao karong baoh patuh saong kaya pablei oh njauk adat nagar brei. Trung ta Bùi Ngọc Thiệp, Urang ngak Chinh tri Balai bot Bien phong Sông Trăng, brei thau labik hu peih ngak bruk pasang iek di 24/24. Bruk ngak jeng lac hu taoh talaih dua bruk praong, mek khik labaih 90kg phao patuh, jaik 26kg jru phil taong abih saong hu Mentri Quoc phong pok meyaom. Trung ta Bùi Ngọc Thiện ndom meyai lac: "Urak ini di bhum taneh kayua kein lagaih daok kan kandah di mikva rahra nan bruk pablei dauk sit sot jeng daok rah tabiak. Min labik hu pato tacei dom kapul, dom gah pambuak haong dom mban, dom gah, kapul jhul khang bruk pathau khan, kapul ka mikva rahra pagun sanya oh pablei dauk, jeng yau oh daong ka kol pablei dauk oh njauk tui hukum adat nagar brei…"

Meng ini tal raya Tet Asaih Wao 2026, kapul bien phong, hai quan, Pasang iek darak pasar, kong an… hu brei kak kajap jalan tame tabiak tapen negar 24/7. Di Pabah Negar Mộc Bài, pasang iek kadung hu patagok, pasang iek tani tanat tapen negar, pasang iek kajap dom kaya “pandiak” yau ameh, jien negar langiu, phao karaong, pakao hala, saradang cuah, anek athur raong saong anek athur phun kayau glai glo.

Tui Mban Pato tacei 389 Tay Ninh, darak pasar tani tanat min pablei dauk oh tui adat hukum jeng srau kadau kayua jalan tapen negar dui atah jaik 370km taphia nagar Campuchia. Bruk rah tabiak rilo abih lac rabha sit kaya, pah rahra ba tapa jalan haluh, caga urang maong iek. Dalam bruk nan, bruk di karja palei hu maong yau lac “paga pacang” meng takai gok agha. Di xa Mỹ Quý, karja pambuak kajap haong hien phong – kong an – bol lin, khik tani tanat bruk pasang iek, nyao biai, pathau khan ka rahra, jak ba tut angan pagun sanya oh daong kol pablei dauk. “Khik rahra, khik bhum taneh” jeng sa kadha njauk ngak. Amuk Bà Lê Thị Kim Ngân, Akaok UB Bhap bini xa Mỹ Quý, brei thau: “Khol dahlak jhul khang bruk pathau khan dalam dom var me-in ndom meyai di palei pala, di angaok balai papar sap piah jak ba saong paglaong ilamo sahaneng ka mikva thau cambaih ka bruk jhak, kanjah di bruk daong kol pablei dauk, patruh tapa tapen negar suan hukum…meng nan piah ka mikva hu ilamo khik ramik an ninh siem mekre labik drei diukrai.”

Khik kajap tapen negar Tay Ninh oh lac bruk di kapul di urang daok di khik tapen negar, blaoh daok brei hu bruk daong di karja palei saong rahra tapen negar. Tuk yaok mblang hamu, kraong ribaong jeng hu bruk pasang iek di bhap bini, pambuak gauk khik kajap, kol duas kan si dauk kandaok. Meng nan, jalan tapen negar hu karo kajap jang, khik kajap sron mbon salamat ka bingun Tet saong brei sa bruk tani tanat, karo kajap ka bruk patagok kinh te – xa hoi suai atah di bhum palei./.