Ieu lac sa bruk peih mbang ngui naih gheih dalam kapul ndoan vien dam dara di phuong Long Khánh (daok di Ban Long Khánh dahlau diah), pandar ilamo ngak kong jao kaya mbang iLoka hu dam dara dalam kapul rairah sit thun umo chreih takre ilamo kong nghe mbaoh tangin peih bruk “peih mbang ngui hacih” piah rik daong jhul tagok ilamo ngak kong di bhum palei.

Sa-ai Nguyễn Thanh Hiền (umo 28 thun) – urang peih bruk di iLoka ndom mayai lac, jalan sahaneng di bruk pandar ini hu tamuh meng hatai caong di rahra bhum palei ka bruk blei saong jao kaya mbang biak praong min prein pabak hatai caong di dom bruk pandar urak ini oh ka glaong. Dalam tuk vak pandar nyu, kapul peih padang daok rilo kan kandah kayua ilamo oh hu pambuak. Taong abih urang jeng daok gam ngak gam bac tangi meng rilo gah karei gauk:

“Dalam tukvak daok ngak, dahlak hulin oh ka hu rilo ilamo ka gah app kayua drei thau tani tanat gah phan mem nan brei gam bac magru gam ngak. Blaoh veik lac brei ta-eng sahaneng jalan, langyah bruk di urang pandar piah thiet ke mbaok meta app nan jeng daok biak kan kandah”

Rah tabiak rilo kham merat, tal bilan 12/2021, kapul urang peih padang brei ba tabiak ung dung saong padang Kongti TNHH Phan mem iLoka Food. Sa-ai Nguyễn Thanh Duy (umo 28 thun) – gam padang saong pasang iek di iLoka brei thau, tal ini, app hu 30.000 urang blei bhian, 50.000 urang tut angan. Gam haong di nan, app hu pambuak haong 170 tadai kuan, kapul hu labaih 12 shipper, langyah 250 – 300 harak kakei blei yaok harei. Jien mek tame kuhria rah tapa di shipper labaih 10 trieu dong/bilan.

Sa bruk “peih mbang ngui hacih” jak jeng karei lac hu labik pala durian pandar ilamo ngak kong glaong Queen Farm (tinh Binh Phuoc dahlau diah). Sa-ai Nguyễn Thế Tùng – Yam ndok Queen Farm brei thau, kreh thun 2020 sa-ai mek tangin tame ngak nong hacih ngan haong labik jaik 10.000 phun durian di taneh 55 ha.

Gam saong caong khin ndap nda mek hu “chuan tanut hacih” meng akaok meti, sa-ai Tùng pandar rilo ilamo ngak kong glaong tame pala, sangka phun durian tui ilamo jamraik ngak kong tanjaoh ia di Israel, gam patakik prein ngak gam patakik ia tuh. Gam haong di nan, labik pala jeng daok majam camera pasang iek phun saong hu jalan caga, pacang halak dil samu.

Bruk ngak hu di bruk pandar ilamo ngak kong bahrau tame bruk ngak nong lac thun 2024, rai mbang pala phun durian akaok meti (4 thun) di Queen Farm paik hu jaik 400 tan. Yaok phun brei baoh jaik 100/kg, njauk ndom lac ndap nda mek hu jaik yau ginup 243 asal kadha di tanut chuan dunya ka bruk pala drak saong tui tanut chuan huu co. Sa-ai Tùng brei thau lac, dom urang ngak startup tuk halei jeng gaok kan kandah, kayua nan biak khin hu brei daong, hu brei ieik hatai sangka:

Nguyen The Tung

(Băng: Urang ngak ilamo, urang ngak nong, Karja saong urang pablei salih brei ka hu ha sa majam. Tapa nan khol drei thau hu prein ngak di thei yau halei, Karja jeng mbuan pasang iek jang saong khol dahlak hulin mboh sahnang hatai tuk hu Karja tacei ba, daong ka hukum)

Tui Tinh ndoan Dong Nai, tukvak tapa bruk pato pakai bruk ngak, daong haong dam dara dalam bruk duah jien, peih mbang ngui hu jhul khang. Meng di nan, dom bruk dam dara palei pala ngak mbang naih joi hu dom pakat karja dil samu daong, peih praong, daong prein tal urang kapul damdara pakat, dam dara palei pala. Langiu di nan, dom tal pato ilamo pablei ndap nda, kaya OCOP di angaok nen tang pablei salih ndien tu jeng hu Tinh ndoan Dong Nai sangka caik hatai iek praong.

Yaom mada ieu lac bhum palei hu kein lagaih ka gah ngak kong, tinh Dong Nai daok pamaong tal bruk uak drei tagok jeng sa labik naih gheih ka bruk patagok ilamo ngak kong, salih bahrau hadah krah. Bruk pambak tabiak hatai “peih mbang ngui tui jalan saat hacih” dalam dam dara lac bruk njauk hu iek praong piah Dong Nai aval mek hu bruk patagok hacih saong karo kajap./.