Labaih 28 thun blaoh haong bruk raong pabui menek, amuk Kim Thị Sa Quân, daok di puk palei La Ca B, xa Nhị Trường, tinh Vinh Long ieu lac sa di dalam dom bruk naih gheih tantu. Mboh lac meyah ngak sit ye kan si peih praong bruk ngak saong bruk karo kajap, puac thun 2024, amuk Sa Quân khang hatai jak ba dom adei sa-ai kamei dalam palei padang Kapul raong pabui menek hu 13 urang hu mbaok tame.

Piah kapul To ngak bruk hu siam lagaih, dom urang oh khin hu taneh lagaih blaoh nyu daok brei hu phun jien buh tame padang ngak var ngak ro, drei pajaih saong kaya mbang dalam raong glang. Mai meng bruk nan, amuk Sa Quân gam haong dom urang dalam kapul padang jalan ngak cambaih laih, padang kadung jien patak pataom saong mesraiy phun jien laba lap meng Gilang pariak tui Sarak rahra tapa bruk daong di Kapul Urang kamei xa. Meng bruk ngak tani tanat, taong abih 13 urang jeng daok hu mesraiy phun jien, yaok urang hu 50 trieu dong.

“Puac thun 2014 dahlak hulin padang Kapul. Meng tuk tame kapul, yaok urang hu Karja brei mesraiy 50 trieu dong piah buh jien tame. Gam haong pabui menek raong meng 4 bilan meteh tal 5 bilan meda hu hlai pajaih, saong raong 4 bilan tra piah menek. Dom drei pabui ine salih gauk menek, nan bilan halei Kapul jeng hu pabui anek piah pablei. Abih di nyu nan lac, pabui anek hu yaom nan abih urang thei thei jeng mboh chreih chrai”.

Baoh sang ong Thạch Phan Thanh, pagap yau ye daok di xa Cầu Kè. Dahlau diah, ong Phanh ngak bruk tak kayau bhap bini, rilo meng lac tak caneing, giraong duh ka rahra dalam labik jaik taphia, ngak hu biar, jien mek tame oh tani tanat. Meng hu Pasak Pachreih ngak kong saong Jhul tagok bruk pablei salih tinh daong 50% yaom kaom jamraik pabuak kayau CNC, gam haong phun jien mesraiy laba lap meng kadung jien brei mesraiy tui sarak, ong hu khang hatai buh jien tame dom kaya, peih praong labik ngak mbang, peih praong labik ngak mbang. Urak ini, ndap nda kaya kayau di baoh sang ong hu pablei tabiak langiu tinh, ngak hu yaok rituh kaya yaok thun.

“Dahlau diah rilo di nyu ngak meng tangin, ngak harei yaok harei blaoh paglaong tagok jeng sa labik ngak mbang. Blaoh Karja daong 100 trieu dong piah buh jien tame ka jamraik ndap nda kaya, meng nan hu ngak rilo kaya, dak harei dak hu rilo tuai damuai. Meyah oh buh jien tame ka jamraik, ngak tui jalan ngak bhap bini ye oh hu lagaih. Dahlak hulin biak bui sambai tuk hu Karja brei kein lagaih yau nan.”

Amuk Võ Thanh Thủy, Phaok Yam ndok Gilang pariak tui Sarak rahra tinh vinh Long brei thau lac, dalam tukvak mai meng anak daok tal, jabat patui veik paglaong bruk pathau khan, pambuak khang haong karja palei piah khik kajap dom urang mbang tui sarak hu ginup kein lagaih mesraiy phun jien.

“Dalam tukvak mai meng anak daok tal ye Gilang pariak tui Sarak rahra tinh Vinh Long brei paglaong bruk pathau khan ka jien brei mesraiy tui sarak dalam mikva urang bangsa takik; pambuak haong karja palei, dom gah hu pambuak bhian brei duah thau piah khik kajap dom urang mbang tui sarak hu ginup kein lagaih piah mesraiy hu phun jien. Langiu di nan, Jabat jeng pasamar dom phun jien meng kadung jien di dom bhum palei piah parilo veik phun jien brei mesraiy.”

Biak di nyu mong mboh lac, phun jien brei mesraiy oh lac daong ngak jeng saong peih praong rilo bruk ngak mbang siam lagaih, blaoh daok kein lagaih piah brei ka mikva urang bangsa takik mesraiy siam jang phun jien dom jitvu rahra njauk hu yau ye y tem pato megru, sang daok saong ia hacih pandar. Meng nan, raidiuk kinh te – xa hoi di bhum mikva urang bangsa takik dalam tinh Vinh Long dak harei dak hadah krah, dom baoh sang kathaot, jaik kathaot patrun jang tapa yaok thun, daong jhul tagok kinh te – xa hoi karo kajap di bhum palei./.