Dalam baoh sang sit di po Gru Thường Xuân Hữu ndih dalam bhum taneh Cam angan palei Cawait, xa Liên Hương, hu biak rilo tada tapuk padang rilo tapuk. Tapuk halei siam gheih, ong caik tame ganraong kreih karei. Yaom lac thun umo praong glaong min ong jeng hadar angan abih yaok baoh tapuk saong labik dak caik nyu pak di halei. Dom tapuk vak meng akhar huroh Cam meng kal klak abih meng akhar huroh Cam daok biak takik, kayua nan bo drei brei khik ramik nyu. Dom tapuk meng akhar huroh bangsa Cam hu dom angan kadha lac adat di dalam agama, langiu di nan hu dom asal kadha di, tacei ba adat cambat, dom kadha damnei, ariya dak dalikal kadha pato adat dalam sang…

“Lac urang nao dahlau, dahlak hulin caong khin dom halau janeing rai rah harei hadei patui veik daong gauk pataom, roh duah dom ilamo siam gheih di urang Cam piah caik rai ka rai hadei thau ka adat cambat, dom yaom kaom ilamo di urang Cam”.)

Ieu lac sa urang dang Akaok Kapul Halau janeing Ahier tinh Lam Dong, tukvak tapa, po Gru Hữu gam haong dom halau janeing agama bangsa Cam hu daong haong karja saong rahra dalam rilo danak dak yau ye: pabuh pasiam dom bruk ngak bhap bini meng kal, pabuh pasiam adat bhap bini, pasiam dom labik inem mek sajarah – ilamo di bangsa Cam yau ye: bimong Pô Sah Inư, bimong Pô Dam, kalan Pô Klong Mơ-nai,... hu pasiam. Rilo inem mek hu duah mboh, roh duah saong khik ramik yau ye Linga-Yoni meng ameh hu duah mboh di bimong Po Dam hu brei angan lac Kaya Banrik pakat Negar thun 2023… Gam haong nan lac dom danak dak ilamo, adaoh tamia bhap bini meng kal hu pamedeih, gam daong ngak meda ndap nda rah rivang gam brei bruk ngak mbang duah jien ka rahra.

Ong Nguyễn Thành Thắng, Phaok Akaok UB Bhap bini xa Liên Hương, tinh Lam Dong brei thau, langiu di bruk khik ramik ilamo halau agha, po Gru Thường Xuân Hữu daok ieu lac dang talei pambuak mikva haong karja; khik ramik hatai gul pataom di dom aguma, di  di mikva Cam haong dom bangsa karei meng nan pasiam bruk gul pataom gauk taong abih bangsa adei sa-ai.

“Bruk di va po Gru Thường Xuân Hữu lac sa urang hu angan je di dalam bhap bini, hu makna dalam bruk pathau khan, ngak njauk dom jalan di Ndang, sarak, hukum di Karja tal mikva. Brei tapa angan je dalam aguma ngan haong bruk ngak Akaok Kapul halau janeing bhap bini Cham Ahier, va Thường Xuân Hữu hu jak ba mikva daok dang gheih ghang siam mekre, blaoh pathau khan, langyah dom sarak ka taneh riya, padang palei pala bahrau, pacang khik alam langik”.)

Ngan haong Gam tui bruk ngak lagaih di drei, ong hadah mbaok hu lambaok urang bangsa Cam saong kapul halau janeing aguma di bangsa drei hu mbaok tame Nyaom roya Pakacah anit ranam taneh ia tinh Lam Dong mbang ka sa, saong pathau khan asal kadha ka dom bruk di halau janeing bangsa Cam dalam bruk “Padang bruk gul pataom gauk taong abih bangsa adei sa-ai, pagam haong bruk khik ramik, paglaong ilamo piah jhul tagok kinh te pablei salih, jirah rivang”.

Bruk ngak di po Gru yau “jru siam” ka hatai ngak la-i la-an tung tian mikva urang bangsa Cam ka bruk ngak jalan diukrai ilamo bahrau, meng nan tah klak dom adat cambat oh daok lagaih haong raidiuk urak ini saong mek hu dom bruk lagaih siam bahrau.

Gam tui dom hagait ngak hu dalam tukvak blaoh, po Gru Thường Xuân Hữu hu Karja alin brei rilo angan je saong hu dom pakat karja pok meyaom. Nan oh lac bruk hadah mbaok di po Gru, blaoh daok lac bruk hadah mbaok di urang bangsa Cam yaok tuk mayai ndom tal ong./.