Pilih palei pala bingu Sa Đéc piah ba baoh sang nao jirah di dom harei padeih raya Tet Nguyen dan, sa-ai Thái Thị Thy Trúc, sa urang tuai mai me-in meng ban Can Tho khan brei thau lac, tal palei bingu Sa Đéc sa-ai yau ye theik tame mblang ia praong gam saong yaok ribau janih bingu daok coh bingu yaih drei. Gam saong di nan hu mblang hamu daok pacah gauk mblo bingu daong pok harei akaok thun bui sambai chreih chrai.

" Thun ini hu dom janih bingu phon phon marah marah kalik kruac atau bar sambo ia njam malang, sa janih di dalam dom bingu akaok thun biak gheih mekre, daok brei yaih mboh biak anit ranam, hu dom baoh ghe gilai kapal sit piah ka tuai gam jirah iek, gam piah mek binguk biak bingi takre oh hagait do, gah likuk di nan yau ye dom baoh bein, apuh hamu sit saot, ini ieu lac dom glo akaok pahadah piah urang me-in mek binguk. Dahlak biak bui sambai tuk cuak hu dom binguk gheih ghang, mek inem brei hadar palei bingu Sa Đéc."

Palei bingu Sa Đéc jeng ieu lac sa labik jirah di sang sa-ai Nguyễn Thị Bích Ngọc dalam dom harei akaok thun Ula Naih bak ini. Sa-ai Bích Ngọc khan brei thau, ini ieu lac sa tukvak masa gheih ghang di abih di palei bingu, tal ini sang di sa-ai caik inem hu dalam hatai dom binguk gheih siam gam saong dom janih bingu hu angan di bhum taneh Pai nagar, gam tui di nan hu dom hatai pok glaong tuai damuai di urang palei. Krung kreic bak di dalam hatai sa-ai Bích Ngọc tuk hu mai palei bingu Sa Đéc kayua lac tuk halei jeng mboh salih bahrau di dom po bein ngak jirah, daong ka tuai damuai hu sa baoh mblang piah me-in piah iek yaom dom janih bingu daok yaih drei saong dom harei akaok thun.

“Dahlak tal Sa Đéc jeng biak ralo mbang saong thun ini jeng daok gilac mai palei bingu Sa Đéc, dahlau abih ieu lac kayua hatai khin mahu khik inem binguk gheih ghang, inem krung dalam hatai harei mai jirah di drei. Dan saong biak di abih dalam nan kayua khin mahu tapa binguk di drei brei yaih khan tal abih tuai damuai di dalam negar jeng ye langiu thau tal palei bingu Sa Đéc, dalam nan hu di dom harei Tet dreih yau ye abih bilan hijao hala.”

Labik sinh thai Sông Hậu Farm atah di pasak ban Can Tho labaih kurang 30km, praong labaih 14ha yau ye sa labik daok tamo di dalam alam langik tasik. Dalam nan, hu bein baoh kayau praong labaih 30 janih phun hu pala tui jalan ngak meng huu co, janji tantu siam dan saong jaik taphia saong langik alam. Sa-ai Trần Như Điền, sa urang ngak di labik jirah sinh thai Sông Hậu Farm brei thau lac, masa akaok thun labik jirah sinh thai ba tabiak ralo janih kaya kan jirah bahrau, gheih chreih piah dui urang jirah. Tal ini urang jirah mai rivang bhum main ilamu di bhap bini urang gah Meraong meng kal dahlau tui dom baoh sang tak gak, gang ngak meng krem, pahadar tal inem krung brei ka raidiuk jaik taphia alam langik tasik, jaik taphia ilamo raidiuk rahra urang gah Meraong.

“Pabak bruk taduan tuai abih hatai jeng yau bui sambai haong tuai. Ka dua lac dom kaya mbang bingi brei ngak rilo janih piah duh ka tuai hu siam abih dalam tukvak ini.”

Labik sinh thai Sông Hậu Farm daok iek yau ye hala jandung di ban Can Tho gam saong labaih 500.000 ribau phun tràm. Tal ini tuai jirah mai vah gaiy, luak caluai tame dom baoh ribang barait piah iek mblang glai phun tràm that hijao gam saong he sinh thai ta-eng drei hu taneh ia ndik di bhum gah Meraong jeng ye hu iek maong jirah buk ngak bhian harei di urang bhap bini ini. Ong Nguyễn Quang Diệp, akaok Kapul iek glang labik sinh thai Sông Hậu Farm khan brei thau lac:

“Labik bhum sinh thai Sông Hậu Farm hu khol dahlak hulin brei pagheih, ngak jeng ralo binguk piah iek, caga ralo janih mbang manyum, dom kadha me-in piah pachreih tuai damuai di masa meng anak. Khol dahlak hulin brei paralo dom kadha bui main blaoh caga ralo angan mbang manyum jeng ye brei pakhang bruk yaih khan piah ka tuai damuai thau ralo jang labik bhum sinh thai saong jirah, iek main di ini.”

Dom labik jirah di bhum taneh Pai nagar di dom harei ini pachreih biak ralo tuai damuai di dalam negar jeng ye langiu negar mai rivang me-in iek di dom akaok thun Ula Naih Bak. Gam saong dom janih me-in me-iec, dom baoh sang jirah ndah buh jien tame, ngak bahrau ralo janih jirah piah ka tuai damuai urang mai main mai ieik, blaoh caik inum krung dalam hatai gam saong baoh sang di drei brei ka harei mai main jirah rivang bhum taneh Pai nagar./.