Sa-ai Thuận Sa Pa daok di palei Bal Riya Bỉnh Nghĩa, xa Ninh Hải, tinh Khanh Hoa hu 3 urang anek daok dalam thun umo nao bac, taong abih jien mek tame jeng caong tame bruk ngak pah yaok harei di diuk pasang sa-ai. Dom paok jien buh tabiak di yaok akaok thun bac tuk halei jeng lac bruk duh hatai praong ngan haong sa-ai saong baoh sang. Thun ini, ngan haong sarak oh mek jien bac di Karja, bruk duh hatai ini hu klah rabha, ba mai bruk bui sambai ka baoh sang. Sa-ai Thuận Sapa brei thau:

“Bruk ngak sarak oh mek jien bac, patrun jien bac ka anek saih di Ndang saong Karja ye dahlak hulin atau dom mikva di palei Bal Riya biak thau dhar phol Ndang, Karja…”

Meng thun 2025, Karja brei oh mek jien bac ngan saong uranaih Mam non, anek saih pho thong, urang bac danak dak pho thong dalam labik bac megru pakat karja. Bruk ini, dreih yau, meng thun bac 2025 – 2026 anek saih meng pakat Mam non tal pho thong jeng hu brei bac oh mek jien, salih ka bruk tok pandar haong pakat tieu hoc yau dahlau diah. Tien si Nguyễn Thị Tuyết Hạnh, Phaok Akaok Sang bac THPT Chu Văn An, phuong Bảo An, tinh Khánh Hoa ndom lac:

“Tuk ngak tui sarak karja oh mek jien bac saong patrun 50% yaom jien BHYT ini lac sa khau tin biak bui sambai brei ka amaik ame, anek saih saong gru pato dalam Sang bac, daong ngak samu gauk dalam pato megru. Abih di nyu nan lac, daong ka biak rilo anek saih kan kandah di sang bac meda hu sahnang hatai bac megru.”

Tui Sarak karja taka 238 di Rajaei, labaih 200 sinh vien di Sang bac Cao dang y te Ninh Thuan haong dom kapul gah hu ilamo Cao dang yau ye: Y si da khoa, gah jru saong dieu duong jeng hu trun meng 50% tal 70% jien bac meng thun bac 2025-2026. Kayua nan taong abih dom adei daok bac di Sang bac Cao dang y te Ninh Thuan hu trun 70% jien bac. Dom adei gam hu bac megru di bhum palei gam patrun hu naong trak jien padai di baoh sang. Ini lac bruk daong prein khang piah dom adei sahnang hatai bac megru.

Oh sa janih brei patrun jien bac, anek saih di dom sang bac gam daok gam bac daok hu brei jien pacheih bac samu haong 80% jien bilan takik abih saong hu mbang tui 12 bilan dalam thun. Dom adei daok hu daong ndap nda duh bruk bac, daong jie you mbang saong daok hu brei Bao hiem y te. Yaom lac bruk ini hu peih ngak oh ka suai, min sarak daong jien bac saong y te hu patagok biak praong, lac sa bruk pambak tame biak praong ka rilo anek saih di sang bac gam daok gam bac kajap takai nao bac. Gru  Đàng Quang Linh, akaok Sang bac Gam daok gam bac THPT Ninh Thuan ndom meyai lac:

“Sang bac ngak samu dom sarak ka anek saih, daong anek saih Cam, Raglai saong sarak di Karja…”

Tui amuk Chamaléa Thị Thủy, Yam ndok So Bangsa saong Agama tinh Khanh Hoa, bruk oh mek jien bac ka dom adei anek saih, sinh vien kathaot bhum urang bangsa takik hu brei kein lagaih ka dom adei patui veik bruk bac megru:

“Ngan haong dom sarak siam mekre yau nan jeng daong anek kamuan bhum urang bangsa takik sahnang hatai bac megru. Meng di nan, dak yam paglaong asar siam bruk bac megru ka anek kamuan. Urak ini, dom anek kamuan bhum urang bangsa takik hu mbaok tame dom labik bac megru dak harei dak tagok glaong, jeng yau bruk bac megru dak harei dak siam jang”.

Thun bac 2025–2026 jeng lac thun brei mboh bruk patagok praong dalam Danak dak Pato Megru bahrau. Dom sarak di Karja buh jien tame ka pato megru, dalam nan brei caik dahlau ka bhum kan kandah, bhum urang bangsa takik saong Bhum veik khik kajap ka grauk anek saih, sinh vien jeng hu kein lagaih piah patagok taong abih, samu gauk. “Oh luai ka anek saih halei caik gilac gah likuk”, kadha nan urak ini hu ngak saong daok jeng bruk ngak hu, brei hatai bui sambai ka dom anek saih, sinh vien kajap takai di angaok bruk bac megru meng akaok thun bac./.