Sa-ai Trần Nhật Minh, sang daok di phuong Sai Gon, Ban raya Ho Chi Minh khan brei thau lac, tukik di nyu hu sa bilan sa mbang sa-ai nao jirah tasik, tuk ye nao tasik Hồ Tràm, Long Hải tuk ye nao Vũng Tàu piah manei ia tasik, lam cuah ma-in, uak drei tame langik tasik alam haci hacih sa-at.

Tui sa-ai Minh, bruk ngak ralo pakateik mblung mabuk ngak ka sa-ai katang akaok. Tuk tal tasik, ndih tapak drei di mblang cuah daong ka sa-ai sani sanang glo akaok jeng ye ieu lac sa janih iek ruak brei ka glo akaok, daong pacadu ruak tulang kulik:

“Tasik Vung Tau biak hacih saat. Dahlak mai ini langiu di ma-in, iek ini diah daok tram drei di ia tasik, pandam cuah bak rup pabhap. Nyu jeng ieu lac sa janih siam brei ka prein yava manuac urang. Dahlak mboh biak yaok mbang nao tasik mai drei khang kadang jang”.

Dreih yau nan, muk Nguyễn Thị Hoa, umo 82 thun, daok di Dak Lak khan brei thau lac, ralo thun blaoh tapa muk kadu rak tulang nao mai kan daman. Hu urang brei thau lac manei ia tasik saong lam cuah tagok rup mada ngak ka rak tulang kulik khang kajang yau nan ye muk meng di Dak Lak nao tal Vung Tau daok song anek taco piah lagaih nao manei ia tasik. Muk Hoa brei thau lac, yau ye dak dalikal, labaih 2 bilan daok di Vung Tau, yaok harei meng tuk 6 page muk Hoa hu anek lakei ba manei ia tasik saong tram tame cuah, gam saong dom janih taong ruak karei muk Hoa nao mai hu blaoh:

“Dahlau diah takai dahlak biak pandik, oh nao hu. Mayah khin nao jang hu urang daong weih meng hu oh yau nan ye mabuh. Dua bilan blaoh dahlak tabiak tasik saong tram tame cuah mboh prein yawa khang sihat ralo paje”.

Urak ini di gah Pur Ban raya HCM bahrau dang di dom tour jirah iek glang prein yawa, pajru laka… min ka oh njauk ieu lac sa janih jirah y te dalam. Dom urang hu angan gah jirah brei thau lac, piah brei ka gah jirah dalam tantu ye njauk pagam dom janih buh tame ngak yau ye gah: ndap nda kaya ngui ha tang, dom janih iek glang sihat prein yawa. Langui di nan, njauk hu manuac urang hu bac magru gah y khoa dinh duong, majam y te palei jeng njauk uak drei tui jalan ngak jirah hu yaom kaom glaong.

Ong Nguyễn Tấn Bản, Bi thu Ndang uy phuong Vung Tau brei thau lac, di bhum palei daok ralo taneh duh ka gah y te. Tui jalan pakat nagar jeng ye di Pakat Ndang Ban raya HCM dom taneh ini mada brei duh ka y te, iek glang prein yawa. Phuong Vung Tau jeng ngak bruk saong dom So, gah Ban raya piah ba taneh Sang iek ruak Lê Lợi klak dan saong dom labik hu brei dak blaoh hu brei tame danak dak blei salih piah duh ka rahra bhap bini:

“Tukwak mai meng anak khol dahlak brei pathautagok pakat ndang Ban raya HCM piah ba taneh ini brei ka gah jirah pagam song padeih padei ma-in. Dalam nan, jirah brei ka urang hu umur taha yau ye sang iek glang ka urang taha, bruk iek glang prein yawa ka bhap bini saong tuai damuai jirah. Khol dalak yam tal akaok mbram yau habar urang jirah saong urang bhap bini jeng hu prein yawa sihat siam, gam tui di nan paralo ndap nda kaya ngui brei ka urang mai jirah”.

Tui So Jira rivang Ban raya HCM, gam tui janih ndap nda jirah y te, Ban raya HCM pataom prein tame urang jirah mbiah mbiah dan saong urang hu jien piah mai ma-in jirah, dui atah masa harei daok dang mbang ma-in gam tui jirah gah y te sihat prein yawa.

Gam tui di nan, dom baoh sang iek ruak, dom danaok y te, urang ngak mbang blei salih gah jirah, dom labik daok, dom labik ngak mbang jirah hu angan… njauk dang padang bruk roh duah thau, ngak bahrau jeng ye khan yaih dom janih ndap nda gam tui bruk ngak mbang blei salih gah y te, iek glang prein yawa ka chreih, piah pachreih ralo jang urang jirah janih y te hu angan pakat.

Danak dak patagok jirah y te di gah Pur jeng daok di dalam jalan atah dhua brei ka bruk paglaong yaom kom y te saong janih patagok manuac urang di Ban raya HCM dalam meng anak./.