Dom harei tapa, sa-ai kamei Lưu Hoàng Nguyễn Thuý Linh urang po tadai kuan Coffee&homestay Hoa Sứ (palei Hamu Tanran, xa Phước Hữu, tinh Khanh Hoa) langiu di pablei kophi, sa-ai daok caik tukvak ngak 2 aduk bilik padeih padei ka tuai damuai mai ma-in dalam harei raya Kate. Sa-ai Linh brei thau, piah ngak jeng bruk bui sambai ka harei raya Kate, xa Phước Hữu, tinh Khanh Hoa hu jak ba jaik 300 anek saih, urang kapul dam dara saong dom urang kamei mai meng dom palei dalam xa hu mbaok tame dom kadha ragam tamia bhap bini. Piah dom var pasram rah tabiak lagaih gam khik kajap hu bruk bac megru, gam hu mbaok tame pasram tamia duh ka harei raya Kate. Yaom lac langik oh lagaih min bruk pasram di mblang caoh balaong palei Hamu Tanran jeng daok chreih chrai saong bui sambai. 

"Dalam dom harei tapa, dom adei sa-ai kamei dalam palei pataom gauk ngak hacih sa-at labik, jalan dalam palei, daok dom adei anek saih ramik caga bruk bac piah biar harei mai pasram tamia, piah tal harei Kate tamia raok khan ao Po…

Oh lac hu bruk pasram adaoh tamia, dom harei tapa, dom urang di Hop tac xa Lan am Cam Hamu Craok pataom tame rilo piah ngak tabiak dom kaya lan am dil samu duh ka tuai damuai mai jirah iek dalam harei raya Kate 2025. Ong Phú Hữu Minh Thuần, Yam ndok Hop tac xa Lan am Cam Hamu Craok, xa Ninh Phước, tinh Khanh Hoa bahrau brei thau, thun ini, piah brei hatai takre ka tuai damuai mai rah rivang palei ngak lan am Hamu Craok, ong Phú Hữu Minh Thuần hu khang hatai buh jien tame padang labik parang lan am Cam Hamu Craok, danak dak oh lac labik yaih khan dom siam gheih di lan am bhap bini bo daok lac labik parang ilamo Cam siam gheih karei, pagam haong ma-in ragam ragu bangsa, adaoh tamia bhap bini, daong tuai damuai thau jang ka raidiuk, adat cambat saong kham merat khik ramik ilamo di urang bangsa Cam. Ong Thuần brei thau:

"Thun ini tuai mai biak rilo, kayua nan bo HTX buh jien tame veik ka labik parang piah duh tuai damuai dalam harei Kate ini…

Daok di tinh Lam Dong, di dom labik inem mek yau ye: Kalan Po Nit di xa Bắc Bình, kalan Po Klaong Mơ-nai di xa Lương Sơn, Gilang drap ar gauk ralo but pajaih Patao Cam di xa Hồng Thái, karja palei hu jak ba mikva ngak hacih sa-at labik daok di dalam palei pala saong tuel hala dok negar di baoh sang. Abih di nyu nan lac, dalam harei raya Kate thun ini, di bimong Pô Sah Inư daok di phuong Phú Thủy brei hu mbaok di 9 xa hu rilo mikva urang Cam hu rilo danak dak ilamo hu peih ngak piah duh ka mikva urang bangsa Cam, abih di nyu nan lac labik parang kaya mbang huak urang bangsa Cam.

Sa-ai Trần Đức Dũng, Akaok Mbang Pasang iek inem mek bimong Po Sah Inư nrei thau, harei Kate di bimong Pô Sah Inư hu peih padang tui njauk adat cambat di urang Cam:

 “Bruk srap gap urak ini hu peih bruk. Thun 2025 lac thun akaok meti blaoh harei Kate hu peih ngak hadei di tuk tinh Lam Dong hu padang bahrau. Dom danak dak karei di harei Kate jeng hu ngak tui adat cambat saong aguma di urang bangsa Cam, hu pamedeih saong rah tabiak meng kan dahlau mai di inem mek bimong Po Sah Inư. Langiu di nan, khol dahlak hulin jeng padang dom danak dak siam gheih karei lac banah raya duh tuai damuai tuk mai rah rivang, ba drei tame”.)

Tui urang Cam, harei Kate thun ini hu gheih karei jang, tuk dalam taneh ia daok peih padang karja palei 2 pakat. Mikva urang bangsa Cam daok di Khanh Hoa saong Lam Dong daok pambak tabiak bruk bui sambai di harei Kate mai tal yaok baoh sang, pasak ilamo.

Tapa yaok harei raya, dom ilamo urang bangsa Cam siam gheih hu patui veik khik ramik, pambak tabiak, daong ngak meda kaya sambo bar di tinh Khanh Hoa saong Lam Dong. Ini jeng lac kein lagaih piah yaih khan ilamo urang bangsa Cam haong tuai damuai dalam saong langiu negar, daong patagok gah ngak kong oh hu arthak di dom bhum palei biak karo kajap./.