Amuk Phan Thị Xuân, xa Xuân Sơn, Ban raya Ho Chi Minh (dahlau diah lac Ba Ria – Vung Tau) brei thau, baoh sang amuk hu 1ha taneh ngak nong, taneh ini hu 3 gah tapen glai caga Xuân Sơn – Suối Rao. Labik ini hu langik biak hacih, mat hijao nan rilo yut cuai sahabat, urang dalam sang mai rah rivang, hu sambo bar hijao di glai, ia craoh… Baoh sang amuk Xuân salih taneh ini tapa ngak jirah rivang sinh thai, min kayua taneh ngak nong nan dom danak dak di angaok taneh oh hu karja palei mbaoh tangin. Tuk Hukum taneh riya salih saong hu ba tame pandar dom urang hu taneh ngak nong khin ngak jitvu, jirah rivang yau amuk Xuân biak chreih:

“Pagam rilo bruk di taneh ngak nong ye rahra hu ngak dom bruk jirah rivang tui adat hukum. Urak ini jalan ngak di baoh sang lac pambuak rah rivang saong ngak nong, lac di bruk patagok rah rivang sinh thai min jeng khik meng 60-70% taneh ngak nong. Di taneh ini jeng hu pala phun ngak nong, langiu di dom mblang hareik ka tuai me-in, daok veik lac piah pala phun kayau”.

Dreih yau nan, ong Đinh Huỳnh Giang, daok di phường Long Hương, Ban raya Ho Chi Minh brei thau, meng labik tok piah pala drak, urak ini rahra meda hu pambuak ngak rah rivang, peih kuan mbang, kophi, labik padeih padei sit di taneh ngak nong di drei:

“Dahlau diah, karja biak kan daman piah mbaoh tangin brei ka rahra ngak dom bruk karei di taneh ngak nong, nan bruk pandar dom bruk pablei salih brei gaok kan kandah kayua oh hu mbaoh tangin. Hadei tuk Hukum taneh riya mbaoh tangin brei peih  Homestay, Famrstay… di taneh ngak nong ye hu daong prein di karja palei, piah labik bhum palei hu rilo urang blei salih jang. Taong abih bruk hu taoh talaih, brei kein lagaih ka rahra biak rilo”. 

 Tui kuhria mboh, labik gah Pur Ban raya Ho Chi Minh (Ba Ria – Vung Tau dahlau diah) hu jaik 20 bruk ngak nong pambuak jirah rivang. Dom bruk ini oh lac patagok yaom kaom pandar taneh ngak nong bo daok brei peih ndap nda bahrau ka gah rah rivang daong jhul tagok pablei ndap nda, brei bruk ngak, parilo jien mek tame ka rahra bhum palei.

Bruk rah rivang sinh thai urak ini lac janih rah rivang hu rilo tuai damuai pilih rua. Kayua yau nan piah khik kajap bruk patagok karo kajap, dom bhum palei daok jhul tagok di bruk pandar dom kein lagaih di drap ar dalam langik tasik.

 Amuk Nguyễn Thị Thu Kiều, Jabat UB Bhap bini xa Đất Đỏ, Ban raya Ho Chi Minh brei thau, kayua hu kein lagaih ka gah ngak nong gam haong rilo labik rah rivang ndap nda OCOP… nan xa brei patagok ba ndap nda, labik rah rivang tagok labik pablei salih online piah yaih khan, pambuak haong labik peih ngak tour ba tuai damuai mai rah rivang di bein phun mbang baoh, labik jirah rivang.

“Gah ngak nong lac kein lagaih di xa, dalam tukvak anak tal karja palei brei sangka iek praong patagok gah ngak nong sinh thai pagam haong jirah rivang, piah ba dom gah ngak mbang, bein phun mbang baoh, labik ngak ndap nda OCOP ba tame tour rah rivang. Brei kein lagaih ka rahra, urang pandar, tuai damuai rah rivang blei dom ndap nda hu angan di bhum palei”.

 Hukum Taneh riya 2024 hu taoh talaih ka taneh ngak nong, meng nan bruk patagok jirah rivang sinh thai karo kajap ngan haong labik ngak nong brei hu buh jien tame ngak patagok, ngak jeng yaom kaom ka gah ngak nong tapa ndap nda rah rivang. Patagok ndap nda rah rivang ngak nong lac jalan nao hu makna dalam bruk ngak bahrau, ngak kong urak ini./.