Jaik 3 thun ini mai, Kapul Urang kumei tỉnh Hòa Bình hu peih ngak rilo bruk ngak dalam bruk jhul khang bruk likei kumei samu gauk, dom pakat kapul urang kumei hu pataom prein tame dakwah pathau khan piah paglaong hatai sahaneng ka dom adei saai kumei urang bangsa takik salih akaok sahaneng, jalan ngak dalam yaok bruk bac magru, bruk ngak mbang, duah jien saong padang raidiuk. Kayua yau nan ye, rilo adei saai kumei hu padang bruk mbang ngui bahrau, yam tagok tabiak truh kan kathaot karo kajap. Sang saai Bùi Thị Vịnh, urang bangsa Mường, daok di xã Định Cư, huyện Lạc Sơn, tỉnh Hòa Bình dahlau deih ieu lac sa baoh sang kathaot, rambah, kurang luac thun. Meng di tuk hu Kapul Urang kumei dakwah pathau khan ka sarak brei ngak dahlau di Kanja dalam bruk daong phun jien masaiy saong ilamo ngak mbang; saai Vịnh hu pambuak haong rilo asal kadha raong glang, ngak mbang duah jien meng ngak bein, pala glai khik glai; sang saai duah hu rilo jien mek tame sang tani tanat. Saai Vinh brei thau:

“Yaok sa bilan kon dahlak hulin lac nao nyaom biai sa mbang di xã. Hu saai ini tok pasang di atah, saai deih ye jeng daok dalam puk palei. Urang ini haong urang diah daok atah di gauk min tapi adei saai tuk halei jeng anit ranam gauk, klah rabha haong gauk. Urak ini samu gauk paje, drei daok di dalam puk palei jeng pathau khan biak rilo, dom adei saai nao bac jeng thau tantu cambaih bruk dakwah pathau khan di urang kumei dalam palei paje. Urak ini oh daok iek glaong urang likei, iek lap urang kumei yau dalau. Urak ini cak rok jeng hu rilo phun jien ka adei saai kumei paje. Phun jien sarak brei masaiy atau gah ngak nong bo ngak harak gar jeng hu brei biak samar drah. Drei jeng hu phun jien piah ngak mbang.”

Amuk Bùi Thị Ngơi, Akaok Kapul Urang kumei huyện Lạc Sơn, tỉnh Hòa Bình brei thau lac: Bruk peih ngak brei likei kumei samu gauk ka bhum mikva urang bangsa takik daok hu dom pakat kapul urang kumei meng angaok tinh trun tal labik hu peih ngak; dom pakat uy ndang, kanja bhum palei jeng biak caik hatai sangka; piah sa tangin hatai haong gauk gam haong mikva patagok bruk ngak mbang, duah jien:

“Pambuak jaik tame jalan ngak, bruk ngak di kapul, ye kon dahlak hulin hu peih rilo bruk ngak. Dalam nan lac mboh di nyu hu caik hatai sangka tal bruk paglaong ilamo, prein ngak ka adei saai kumei. Njauk daong ka urang kumei peih bruk mbang ngui, paglaong prein khang ngak bruk di urang kumei. Ini lac sa dalam dom jalan ba tabiak blaoh kon dahlak urak ini hu saong daok peih ngak. Kon dahlak hulin daok peih ngak jalan ba tabiak di danak dak ka mikva urang bangsa takik saong daong ba ka kapul pambuak gauk, kapul HTX saong nyaom dom baoh sang cak rok patagok bruk ngak mbang, duah jien.”

Dalam gah pato magru, tỉnh Hòa Bình jeng hu buh tabiak kadung jien sarak piah daong ba, ba kein lagaih ka gru pato, ka anek saih bhum atah bayah, bhum kan kandah. Kayua yau nan ye, bruk pato magru di dom bhum kan kandah dak harei dak hu tagok glaong. Taeng di huyện Cao Phong, urak ini mboh dom anek saih bangsa takik dalam umo bac pakat 2, pakat 3 di dom xa bhum ceik glaong hu bac di pataom gauk di dom sang bac gam bac gam daok. Adei Triệu Hương Giang, daok di xã Yên Lập, umo ndah 6 thun hu mai bac di Sang bac Pho thong bangsa gam bac gam daok huyện Cao Phong brei thau:

“Dom sarak blaoh kon adei hu mbang tui ye biak ginup. Kol adei hu bac di labik bac biak gheih ghang. Di bruk bac magru, ye kon adei hu dom pandap bac taa, tapuk siphau jeng hu sang bac brei. Kon adei tok sa janih njauk mai pasram bac. Gru pato dalam sang bac jeng deih yau ame, amaik sangka yaok var huac mbang ndih daok ka kon adei.”

Tui So Pato magru tỉnh Hòa Bình, uranaih daok di umo thun nao bac di ini hu ralo labaih 99%. Bhum lagaih abih yau ban praong, ban sit anek saih hu nao bac abih. Gah Pato Magru tỉnh Hòa Bình jeng daok pataom prein tame paglaong ilamo ka gru pato dom pakat, salih jalan pato tacei lagaih haong yaok bhum labik, piah paglaong bruk pato magru ka anek saih dom bangsa takik.

Ngak tui sarak, hukum, kayua hu salih siam brei ka bruk saneng bruk ngak ralo janih kadha dalam raidiuk, bac magru, mbang ngui urang bangsa tukik di tỉnh Hoà Bình ieu lac bruk brei thau brei mboh khik siam hatai khin caong manuac urang hu brei thau di sarak dunya brei pakayah dom janih kadha ieik lap ieik bien bangsa bangsa dalam nan hu Việt Nam ieu lac sa baoh nagar hu mbaok siam./.