Mbang akaok meti uak takai mai Labik jirah rivang Mblang hamu praong, rilo tuai damuai oh padauk hu bruk katuak anak labik mat la-an. Meng dom talei tram chanh hijao papar mbau menyek njuel, tal dom mblang hamu praong katung atah tal takai langik ngak hadar tal phim “Mblang hamu praong” ngak pachreih hatai yaok trieu urang meng kal dahlau. Meng inem ndien anh, bhum tapen negar Mộc Hóa jeng labik dang takai karei.

Tuai damuai taong yaom he sinh thai tram chanh lac “drap ar langik banrik”, hu khik ramik jaik yau daok tamo. Oh hu athak dhun, tok hu sap angin yuk tame glai galau saong sap yava gilai gaiy manyi sap gac, ngak jeng sa raidiuk karei di Dong Thap Muoi.

Gru jru Bùi Đắc Thắng, Akaok Tong abih Yam ndok labik jirah rivang brei thau, Tay Ninh daok pambuak padang jalan tour angaok kraong pambuak bhum, gam pandar thaik thaot, gam khik ramik ilamo – duh yang mebang.

“Tuk ngak tabiak danak dak nan hu caik inem danei di jalan jirah rivang angaok kraong jeng lac bruk pambuak ba drei tame ngak nong di Long An ngan haong ndap nda kaya nong karei, piah ngak tabiak bruk karei ka jirah rivang di Tay Ninh bahrau. Jalan nao ini biak gheih, ngak bruk pambuak langik ceik glai, ilamo saong ba drei tame gah pato megru, patagok bruk siam gheih ka jirah rivang dalam bhum. Tukvak anak mai tal dom labik jirah rivang karei jeng hu phun nong nghiep min mai tal dom labik di Tay Ninh peih ngak, khol dahlak pagam phun jru piah ngak tabiak ndap nda sangka prein yava ka tuai damuai”.

Dalam dom thun jaik ini, Tay Ninh danei tagok lac labik jirah rivang rilo gah, gam ginreih haong ceik Ba Den, Toa thanh Cao Dai, gam hacih hijao haong jirah rivang ngak nong, farmstay.

Xa Bình Minh (dahlau diah lac Thạnh Tân) dui pachreih tuai damuai meng bein li-u huu co di Nguyễn Thanh Vũ, praong 1,2 ha, pala tui jalan ky thuat sinh hoc, karo kajap. Tuai damuai hu rivang me-in, menyum ia di bein phun, padang tadai, pasram yoga, duah thau darak hala saong raya ahar bhap bini pagam haong ilamo bhum palei. Sa-ai Vũ brei thau: Farmstay ba mai bruk rivang me-in sinh thai, me-in me-eic, daong tuai damuai mboh raidiuk ilamo saong bruk siam gheih di bhum pandiak angin.

“Nan lac kein lagaih ngan haong bein baoh kayau vil taom dan ceik. Urak ini bein jeng hu kein lagaih meng labik jirah rivang Ceik Ba Den. Yaom lac bein phun oh ka hu rilo tuai, min harei hadei tuk rilo urang ngak nong ngak tui bruk ini brei ngak tabiak pandap tamo praong, dui pachreih tuai damuai siam jang. Tuai oh lac mai tal bein phun li-u bo daok hu rilo bein phun mbang baoh vil taom dan ini .”

Urak ini Tay Ninh hu labaih 30 bruk jirah rivang gah ngak nong– sinh thai, meng labik ngak huu co, farmstay tal labik sinh thai, sang bein saong hop tac xa jirah rivang bhap bini. Yaom lac ngak sit, dom bruk ba mai jien mek tame tani tanat ka urang ngak nong meng pambuak ngak haong khan dalikal di bhum taneh ini.

Hadei tuk pagam tinh, bruk pambuak jalan labik hu jhul khang haong 1–3 harei, pambuak duh yang mebang agama, sinh thai, palei ngak bruk bhap bini saong duah thau ilamo. Ong Ngô Trần Ngọc Quốc, Akaok Kapul Jirah rivang Tay Ninh ndom lac: “Yaom lac tabung glaong di raya puac thun, jitvu jirah rivang brei ngak lagaih, gam caik hatau takre ka tuai damuai, gam lagaih ka jien buh tabiak di tuai damuai.”

“Dom ndap nda jirah rivang jeng ba tuai damuai mai tal haong ilamo siam gheih saong langik ceik glai, lagaih haong bruk rivang me-in hacih hijao hu brei ngak dahlau. Gah ngak mbang pablei salih kuhria tanut yaom lagaih, jien buh tabiak lagaih min jeng siam glaong. Jalan ngak lac ba mai bruk siam mekre, yaom lap min duh abih prein saong tathak bruk, daong tuai damuai mboh taong abih bruk siam gheih di bhum taneh.”

Tay Ninh daok ngak jeng sa labik jirah rivang rilo gah bilan raya, duh yang mebang agama, ngak nong saong dom ndap nda rivang me-in pataom. Yaok tour, farmstay atau workshop jeng ba mai bruk sahnang glo akaok, duah thau ilamo, gam haong nan pambuak tuai damuai haong raidiuk di bhum taneh, caik bruk takre oh var hu./.