Jirah gah ngak nong vil takai ceik Muk Juk Ba Den meng dom baoh bein sit. Dahlau diah, ralo baoh sang ngak nong pala dan saong pablei eng dom janih yau ye baoh kandiuk, baoh timun halam, danui nyo, la-u huu co atau njam patam hacih tui bilan. Dom thun jaik di ini, tuk urang jirah mai tal ceik Muk Juk Ba Den dak harei dak ralo, dom sang bein khang hatai pambuak bruk ngak dan saong ngak yaom jitvu iek. Urang jirah mada nao rah dalam bein, paik baoh karaoh dalam bein, mbang iek dom janih dalam bein jeng ye mek binguk hala halui kayau dalam bein.

Sa baoh bein mboh lagaih mata hu angan yau ye bein la-u praong labaih 1,2 ha di sa-ai Nguyễn Thanh Vũ daok di xa Bình Minh. Bein hu brei ngak tui sinh hoac karo kajap dan saong jeng labik jirah iek sinh thai. Urang jirah oh sa janih hu menyum ia la-u, hu menyum dalam bein blaoh daok hu brei padang kadai tuan ma-in, pasram yoga atau tame ma in dom janih ilamu di bhum palei. Bhian di dalam yaok bilan, bein sa-ai raok labaih 450 mbang urang jirah jeng ye tagok labaih dua mbang di tuk puac adit atau di jeng ye dom harei raya, harei tet. Sa-ai Vũ ndom mayai lac:

“Nan nyu lac kein lagaih di bein baoh karaoh win tom dar ceik. Urak ini di dom baoh bein jeng hu kein lagaih brei meng bhum jirah rivang ceik Muk Juk Ba Den. Mada bein baoh kayau ka oh ralo meng hadei di nyu mada hu ralo urang ngak nong ngak tui mada brei ba mai kaya kan praong, pachreih hu ralo urang jirah jang. Tuai urang jirah oh sa janih mai sang bein la-u blaoh daok hu ralo baoh bein baoh kayau karei vil val di ini”.

Ralo HTX jeng ye dom baoh bein karei jeng brei salih, meng bruk patom ngak saong pablei ndap nda kaya ngak nong pagam song peih bambang bein taduan raok tuai damuai mai jirah, iek ma-ain dan saong blei ndap nda kaya ngui. Kayua hu yau nan, yaom kaom ndap nda kaya ngak nong hu pok tagok, daok bruk ngak dak tuk dak jeng janih ngak mbang brei ka jirah rivang.

Sa di dalam dom urang caik hatai ba drei ngak tui jalan ini hu ong Lê Minh Trung, Akaok HĐQT HTX Jitvu ngak nong Minh Trung. Meng sa labik pala baoh kandiuk pambuak pagam di labaih yaok rituh baoh sang, HTX oh sa janih patagok bruk ngak mbang blaoh daok peih bein apuh brei ka tuai damuai jirah, daong ka urang mai iek paham ralo jang bruk pala pabam jeng tahu cambac jang bruk pala phun jeng ye iek glang baoh karaoh phun kayau. Ong Trung khan brei thau lac:

“Mai meng bak hatai brei ka baoh karaoh kaya kan di drei ngak tabiak. Tuk ngak nong hijau, drei khin urang jirah mai tal labik piah thau piah mboh tantu prein yava jalan mbak ngak tabrak ndap nda di urang ngak nong. Di dom yau nan meng pambuak hu dom sang ngak bein ngak apuh dan saong urang ngak mbang gah jirah hu sa jalan nao gam padang dom labik iek ma-in iek jirah bruk ngak nong di bhum taneh ini.”.

Ong Ngô Trần Ngọc Quốc, Akaok Kapul Jirah tinh Tay Ninh brei thau, gam saong jirah yang mabang, bruk daok salih samar brei ka bruk jirah iek jaik taphia langik tasik ceik glai ia njuh, dalam nan hu jirah hijau song jirah gah ngak nong. Piah patagok bruk pachreih urang mai iek mai ma-in, tui ong Quốc, bruk yaih khan jirah jeng njauk caik hatai jhul khang, njauk caik hatai di nyu hu brei ka dom nen tang lek taka, labik hu prei peih praong dalam bruk pachreih urang jirah.

“Brei ka gah pachreih bruk jeng ye pacambak ye dahlak khin pakat tinh paralo jang brei ka bruk yaih khan dakvah jirah di angaok dom jalan lek taka so, intenet jeng ye di dom jalan tui papar sap papar binguk pakat nagar jeng ye di dunya. Biak di nyu mboh meng vaktu masa blaoh, ralo khao tin nyu jeng pambak khang yau ye TikTok, YouTube, Facebook…”

Biar halei jirah gah yang mabang pagam saong ma-in iek ngak nong, bhum taneh vil tom dar ceik Muk Juk Ba Den oh lac sa labik yon yang blaoh nyu daok jeng sa labik piah ka urang roh duah ceik glai langik tasik jeng ye rai diuk ilamu taneh ia bangsa manusia. Dom tour nong trai hijau daok peih tabiak brei patagok tui jalan bahrau brei ka jirah Tay Ninh, daong paralo janih ndap nda kaya kan jeng ye daong brei khik takai urang jirah mai ma-in jirah tal bhum taneh cek Muk Juk Ba Den ini./.