Thuong toa Trần Sol – Po gru sang baha MuNiRenSây, meng rilo thun ini mai jeng labik pambak hatai karo kajap di urang tui agama Bhat saong mikva Khmer di ban Can Tho. Oh lac abih tung tian dalam bruk ngak tui agama Bhat, thuong toa daok sangka iek praong tal bruk hit di bangsa, agama, sangka raidiuk saong hatai ka bhap bini. Ong Acar Lý Sương brei thau, Thuong toa Trần Sol lac urang biak siam mekre, gheih ghang, mikva mai sang baha jeng hu thuong toa sangka, kakei daok dang gheih ghang siam mekre.

“Thuong toa Trần Sol hu hatai anit ranam, praong glaong, oh lac sa urang thau sangka ka urang tui bini Bhat, blaoh daok sangka ka anek kamuan khol dahlak hu labik bac megru, mbang daok tani tanat, tuk halei jeng daong ka anek saih Khmer sahnang hatai bac megru, hadei ini mek hu jak jeng.”

Can Tho hu rilo sang bac dai hoc, cao dang, lac labik mai tal di yaok ribau sinh vien, dalam nan hu rilo adei bangsa Khmer. Atah palei, oh takik adei gaok kan kandah ka labik daok dang, thau ka bruk nan, thun 2015, Thuong toa Trần Sol hu jak ba padang sang 4 tal dalam sang baha MuNiRenSây. Ini lac bruk daong praong, daong dom adei sinh vien sahnang hatai bac megru, patrun naong trak jien padai. Adei Kim Bảo Duy, sinh vien Dai hoc Can Tho, daok di sang baha ndom meyai lac:

“Adei daok dalam sang baha hu labaih 2 thun. Meyah oh hu thuong toa Trần Sol saong sang baha ini, adei brei hu gam bac gam ngak ka meng tal si mbang daok. Thuong toa tuk halei jeng kakei dom adei brei kham merat bac megru, khik ramik, thau iek praong adat cambat di bangsa. Di ini, adei oh lac bac ilamo di sang bac bo daok bac jalan daok dang, bruk khik ramik ilamo bangsa Khmer.”

Oh lac sangka ka labik daok, Thuong toa Trần Sol daok bhian daong prein, tacei ba saih sinh vien daok dang ka siam mekre, plaih atah dom kanjah jhak. Dalam labik sang baha, dom adei hu me-in haong gauk, duah thau ka adat cambat, khik ramik ilamo bangsa Khmer. Dom var harei langyah kadha di thuong toa Trần Sol di Labik bac, oh lac pato ka agama Bhat bo daok pamedeih bruk di drei ngan haong bhap bini, caong takre uak drei tagok. Amuk Thạch Thị Yên, urang tui agama bhat di sang baha MuNiRenSây mboh lac:

“Thuong toa Trần Sol lac urang hu hatai gheih ghang, praong glaong, tuk halei jeng buh abih hatai tian brei ka urang tui agama Bhat atah jaik. Dom bruk ngak biak hu angan siam mekre di Thuong toa hu rilo bhap bini caik dalam hatai saong daong prein. Yaok mbang nao tal sang baha, mikva tui agama Bhat jeng hu pang Thuong toa langyah kadha, tacei ba ngak bruk siam, daok dang tui jalan di Bhat gheih mekre.”

Bruk ngak nan jeng daong pasiam bruk gul pataom dalam taong abih rahra, brei kein lagaih di bhap bini Khmer ngan haong dom bangsa adei sa-ai. Dom ril daong lagaih ka agama saong raidiuk, Thuong toa Trần Sol hu karja dom pakat brei angan haong rilo harak pok meyaom. Njauk caik hatai sangka yau harak pok meyaom di Akaok Mentri, Chu nhiem UB Bhap bini Bangsa 2020 kayua hu bruk jak jeng dalam bruk ngak di bangsa, sarak bangsa tukvak 2010 – 2020.

Ngan haong hatai brei ka bhap bini, ka agama saong raidiuk, Thuong toa Trần Sol – Po gru sang baha MuNiRenSây hu ngak saong daok ngak dom inem gheih dalam hatai urang tui bini agama Bhat saong rahra ban Can Tho. Di labik nan, sang baha oh lac labik ginreih, bo daok lac sa baoh sang anit ranam, daong prein cuak chraok par ka dom urang ilamo harei hadei./.