Tinh Ca Mau peih mbang pakacah ngak Logo bahrau, piah duah sa thaik thaot lambaok karei, brei mboh ilamo saong caong takre uak drei tagok di bhum taneh puac abih gah Meraong Negar. Pandar di Gah padang peih dom mbang pakacah, logo brei hu ngak tantu dom hagait karei di Ca Mau, pagam haong bhum taneh, sajarah, kinh te, jirah rivang saong dom ndap nda kaya hu bruk lambaok glaong, gam haong nan pambak hu hatai caong patagok dalam harei hadei. Logo meda hu atau oh hu akhat huroh “Ca Mau”. Yaok urang hu payua rilo abih 3 logo kacah. Yai Glaong abih hu yaom 100 trieu dong…

Dua mejam flim  “Mưa đỏ” saong “Địa đạo: Ia harei dalam melam sup” hu peih brei ka urang jakar, urang lin saong bhap bini Đặc khu Côn Đảo, TP.HCM dalm 2 harei 14 saong 15 bilan 11. Tapa bruk peih flim  mbang ini, TPHCM caong khin jhuk pakhang bruk  yaih khan dom kadha flim binguk, pachreih bhap bini caik hatai sangka, rik tame  ba dien anh TPHCM pambak tabiak praong saong lagaih jang, njauk haong angan “ Ban raya thaot binguk di UNESCO” bo TPHCM hadah mbaok meta hu meyaom taduan mek.

Gaiy Ngo oh lac kaya piah nao mai angaok ia, bo daok hu urang Khmer iek praong yau sa kaya ginreih, tok hu brei pandar dalam harei raya adat. Abih di nyu nan lac, yaok sruh gaiy Ngo jeng hu sa athur lambaok yau ciim sang, lamein patih, atau ine girai…Ruah dom anek athur ini kayua urang Khmer jie lac dalam bruk kacah, gaiy Ngo tachak nao biak samar saong khang yau dom athur hu palih ruah ngak lambaok. Jalan sahaneng ini samu haong adat cih mata ka gilai di rilo bhum kraong ia karei.

Di phuong Lang Biang, tỉnh Lâm Đồng, rilo baoh sang bhap bini bangsa takik ngak kaya meda mai meng pala phun bingu hồng. Ong Hồ Công Định, Akok Kapol Urang ngak nong phường Lang Biang khan lac, gam haong bruk kham merat di yaok baoh sang, peih praong taneh pala  bingu hồng, bhap bini phuong Lang Biang, abih di nyu nan lac mikva urang bangsa takik K’Ho  meblah hu 25% bhap bini di phuong, tuk halei jeng hu bruk daong di karja jeng yau dom kapol nyaom, daong ka mikva yam tagok ngak kaya meda.

Hadei ribuk ka 13, tal cuah kapal tapen tasik haluh jang ngak ka sruh gilai kayau hu medil lac gilai yao klak di tasik Tân Thành, phuong Hội An Tây, ban Da Nang mblo tabiak cambaih laih thaik thaot, dui pachreih rilo urang saong tuai damuai mai maong iek. Gilai ini jeng hu duah mboh mbang akaok meti di thun 2023, hadei nan njauk cuah lam dar pacang saong urak ini mblo tabiak mboh cambaih laih tuk ia trun. Gilai atah labaih 16m ngak meng kayau tagilaw, kapal kayau kien kien kapal 7cm. Gilai brei mboh sa thaik thaot karei di bhum tasik Bien Dong.

Tong thong My Donald Trump khan lac, ong brei adat ka Mentri Jien padai padeih ngak jien xu “ palai pajua”, ba tal dom labik pablei xang menyek, dom labik wuan pablei kaya mbang samar saong dom labik pablei salih praong ngak veik yaom kaom saong kuhria pabak jien mbaok. Tui Mentri Jien padai My piah ngak hu sa đồng xu lac abih 3,69 xu, tagok jaik dua mbang dut saong 10 thun dahlau. 5 đồng xu puac abih hu ngak tabiak saong pandar hu thaik binguk Omega saong ba tabiak to yaom, meda tagok tal 100.000 USD. Bruk padeih ngak jien 1 xu hadei 232 thun daok daong Mỹ patak pataom 56 trieu USD yaok thun.

Yaok ribau urang dalam khan aw gheih bahrau tuh mai mblang praong di ban Cologne, Duc piah peih pakak harei raya hóa trang. Jalan ban medin Cologne karei dut haong harei bhian ngan haong bruk bak rilo sambo bar, ragu ragam, dieu hanh, alak mbie saong sap klao. Rahra labik ini hoa trang jeng rilo janih urang yau ye Cei Putra, Nai Patri tal dom urang maong tathrok klao, kakeh. Harei raya hóa trang di Cologne lac sa dalam dom danak dak ilamo praong saong chreih chrai abih di Duc.

Piah daong gru pato abih hatung hatai ka bruk ngak, Mentri Pato megru Trung Quoc birau ba tabiak dom harak quy đinh birau, pataom tame langyah dom bruk yau van thu, hanh chinh saong dom bruk oh hu angan je daok lahik rilo tukvak saong prein yawa di gru pato. Langiu di nan, bruk trak akaok ka dom mbang pakacah xa hoi saong bruk ngak harak gal jeng hu trun ralo. Piah ngak hu siam lagaih, Mentri Pato megru Trung Quoc brei padang sa jalan tui iek rilo gah, gam pasang iek gah pato, tui iek bruk manuac sia xa hoi saong pambuak kajap haong dom jabat chuc nang.