Jaik 10 thun tapa, tal bilan tuai damuai di dunya mai dauk la-ar, di Pandanus Resort (phuong Mui Ne), danak dak jirah rivang iek ilamo Cam taduan mek hu hatai chreih takre di tuai damuai. Dalam pling ragu ragam hu dom ragam tamia bak gheih ghang. Dom janih kaya mbang biak karei dalam harei roya di urang bangsa Cam saong But pajaih patau Cam yau: pabe aia aia yau, menuk am, lisei limek, laba pa-aok that hu pandar ngak gilac biak gheih mekre tui jalan ngak mbang. Oh sa janih brei meyaih khan, blaoh tuai damuai daok hu mbaok tame jirah rivang iek, ndom biai nao mai haong dom urang ngak.

Piah ka tuai damuai duah thau cambaih laih janih jirah rivang iek hu padang ngak tapa 5 janih meng dalah lah, idung cum, tanyi pang, meta mong tal xúc giác, meng nan ba tal ka tuai damuai rilo kadha drut droi karei di gauk.

Ong Peter Jont, sa urang tuai mai meng nagar Thuỵ Sĩ mbang raloia tanut pabe gam haong ghem khan lac:

“Ini lac mbang akaok mereip dahlak mbang kaya aia bai ini, mbang nyu gam limek gam mangeim saong abih di nyu lac hu rilo janih njam trak lapih, ngak ka drei mbang oh ngan. Daok ralo ye that, bingi, biak pachreih tuk mbang hu kaya aia bai ini". 

Kadha njauk ndom nan lac, dom janih pandap pak di ini mai meng dua palak tangin di dom urang Cam ngak tabiak.

Amuk Lương Thị Hoà, sa dalam dom urang Cam hu Pandanus Resort (phuong Mui Ne) daa mai ngak iek bruk ngak lan am meng kan di urang Cam brei thau, ini lac tuk piah yaih khan, pok prong saong khan dom yaom ilamo biak karei di urang bangsa Cam tal ayut sahabat di dunya.

Daok pak Muyim aia Mesil, di phuong Phu Thuy, danak dak ilamo “Dalikan palei taong mek ikan” jeng pachreih biak rilo tal urang jirah tuai damuai, abih di nyu lac dom harei puac adit.

Amuk Trần Thị Kiều Lan, sa urang tuai mai jirah meng tinh Ndak Nong klak brei thau, ini lac danak dak adaoh tamia pambuak pagam adat mbang Ka-tê di bhap bani urang bangsa Cam tal adat di bhap bani urang taong mek ikan Phan Thiet. Danak dak pambuak pagam ilamo bhap bani meng kan saong ilamu daoh tamia di jaman bahrau ini. Tok dalam sa mon min danak dak hu ba mai ka urang mong iek biak rilo drut druai.

“Danak dak nan biak gheih, dahlak mboh nyu brei thau cambaih laih ka rai diuk di bhap bani palei taong mek ikan di bhum taneh ini. Danak dak daoh tamia harei kabroi jeng biak gheih, biak pachreih urang mong iek.”

Oh lac sa janih katung dui takai tuai damuai di bhum tasik, blaoh inem krung ilamo Cam daok tui takai dom urang ngak bruk rivang jirah mai haong bhum ceik glaong glai ram.

Ong Đoàn Phi Phụng, Akaok kong ty LangBiang Land, daok di phuong Langbiang-Nda Lat, tinh Lam Ndong klah rabha, dalam tukvak masa nao duah thau, mboh ilamo Cam biak karei, meyah pambuak pagam haong urang K’ho angaok ini ye meda ngak jeng bruk pambuak gauk nao mai di 2 bein ilamo, daong ka tuai damuai duah thau dalam jang ka 2 bein ilamo bangsa K’ho saong bangsa Cam.

“Khaol dahlak daok peih ngak bruk pambuak pagam nao mai ilamo di urang Cam saong gong chieng gam haong dom kadha ma-in sambai karei pak di ini. Dahlau di tuk ba pataom ye tok hu sa ilamo kong chieng Tay Nguyen, hadei di nan peih prong tabiak piah taduan raok tuai damuai hu dom kadha bahrau, tuk nan ngak tabiak jang ilamo Cam pambuak pagam haong kong chieng piah pabak hatai caong khin di tuai damuai.”

LangBiang Land hu ba tame raok tuai damuai meng Tet Nguyen ndan thun 2025, tal harei ini, labik ini hu jeng labik mai biak pachreih tuai damuai di ban ribau bingu.  

Amuk Nguyễn Thái Tường Vân, Akaok Kong ty Jirah Lu hanh Thai Loan (daok di tinh Ndong Nai) brei thau, amuk bahrau ba kapul nyaom tuai damuai nao rivang iek meng bhum tasik tal bhum ceik glaong glai ram di Lam Ndong saong amuk jeng yau tuai damuai biak chreih mekre haong dom janih pandap rivang sirah hu pataom mek meng inem krung ilamo bangsa Cam:

“Kasa pak di Phan Thiet klak, khaol dahlak hu mboh danak dak adaoh tamia “Dalikan palei taong mek ikan” nan biak gheih. Khaol dahlak tagok Nda Lat jeng hu dom labik bahrau, jeng hu dom danak dak pachreih tuai damuai, oh lac tok tuai dalam negar blaoh daok hu tuai langiu negar. Dahlak biak caong khin dom danak dak ini meda ba mai ka tuai damuai biak rilo kadha mek meta jang. Ta-eng dahlak mboh biak chreih biak takre dom danak dak nan.”

Dom thun jaik di ini, dom urang pablei salih gah rivang ma-in kham merat ngak bahrau pandap panda, parilo jang kadha rivang iek brei ka tuai damuai, dalam nan, mbluak di abih nan lac bruk pambuak pagam ilamo, daoh tamia tame dom tour rivang ma-in, abih di nyu lac dom labik khang gah rivang sirah saong padeih padei.

So Ilamo, Padhih saong Jirah rivang ma-in tinh Lam Ndong daok pambuak bruk haong dom puk palei patui veik peih ngak dom bruk ngak ilamo bangsa, padang ngak harei roya pambuak pagam haong cak rok patagok rivang jirah, yaih khan inem krung ilamu dom bangsa.

Dom harei ini, tuai damuai mai padeih padei di tinh Lam Ndong dak harei dak ralo. Dom bruk ngak angaok oh lac sa janih rik daong tame bruk khik ramik, meyaih khan janih ilamo di dom bangsa di Lam Ndong, blaoh nyu daok hu jeng pandap panda rivang sirah biak karei piah katung dui takai tuai damuai./.