Ini lac sap yava chreih chrai di pabah lamnge ikan Ba Tri yaok mbang tuk gilai mai dak dang ramik ikan hadang. Thun ini, pabah lamnge ikan ini biak rilo, oh daok bruk jua takik yau thun dahlau. Mikva urang nao gilai daok di xa Tân Thủy biak bui sambai tuk yaok mbang gilai mai hu rilo ikan hadang. Hadei di tuk kaoh abih jien buh tabiak, yaok bilan po gilai hu laba labaih 200 trieu dong, daok urang nao gilai mek tame hu labaih 10 trieu dong. Ong Lê Văn Ẩn, po gilai ikan xa Tân Thủy brei thau:

“Dahlak hulin akau hu 3 chruh baoh gilac plaik nyuel vang, taong ikan di Côn Đảo, taong hu ikan nuk, ikan ya biak siam lagaih. Drei hu laba, drei jeng hu mbang. Hu ikan ye 3-4 harei tame ar, gilai tok nao dalam bhum tasik negar drei. Atah 200 hai ly veik ka meng chung hukum! Daok di sang dahlak hulin jeng peih phone iek, ndop kati hop juk ngak lahik angan tane dom tukvak ye brei pathau khan, lahik 10 harei ye brei nduac gaiy gilai tame.”

Meyah yau meng dalau, gilai ikan xa Tân Thủy, bhian chung hukum IUU, urak ini oh hu bruk halei chung hukum njauk taong bhat. Hu bruk salih naih gheih ini lac meng siam lagaih di bruk pathau khan, jak ba di pakat uy, karja, kapul ndoan the saong dom gah jabat bhum palei, tui kadha “hajan suai ia njom dalam”. Naih gheih abih lac bruk “Jak ba gheih – rabha bruk urang jakar, urang ndang pagam tui urang nao gilai” peih ngak meng thun 2022.

Ong Đặng Văn Hồng, Bi thu Chi mbo puk palei An Lợi, xa Tân Thủy, gam haong 2 urang ndang dalam Chi uy “pagam tui” 3 po gilai taong mek ikan hu mbuan ngak chung. Ta-eng ong Hồng pasang iek baoh sang amuk Nguyễn Thị Mai (po 6 baoh gilai ikan taong mek atah ar di tasik). Meng bruk pathau khan bhian, baoh sang amuk Mai jeng hu paglaong ilamo, oh mada talap ngak chung:

 “Ngak tui bruk pato tacei di Ndang uy, dahlak hulin bhian nao taom po gilai, menyum ia taiy ndom meyai nao mai brei ka dom adat hukum IUU. Po gilai jeng ngak tui biak siam. Baoh sang amuk Mai mbiah tal ini salih mboh cambaih laih, dom thun ini oh daok ngak chung hukum. Chi uy yaok urang jeng pasang iek sa po gilai, bruk ini paglaong siam lagaih. Dahlau diah puk palei An Lợi hu gilai ikan njauk mek, meng tuk ngak bruk tal ini oh daok.”

Piah ngak hu siam bruk ini, langiu di ba hatai ngak bruk, urang jakar, urang ndang hu brei bruk “pagam tui” urang nao tasik piah thau tani tanat ilamo janih kadha hukum, adat di Uy mbang chau Au ka bruk ngak chung IUU, gam haong nan urang jakar ndang vien brei ka hu angan je, ilamo jak ba bhap bini, jaik taphia haong urang nao gilai taong ikan.

Ong Trần Thế Vinh, sa urang ndang pagam tui urang nao gilai Trần Trung Hậu lac po 2 baoh gilai taong mek di tasik, brei thau ilamo ka bruk pathau khan, jak ba urang nao gilai mek hu jak jeng:

 “Rilo meng lac bhian di nyu drei nao mai tal sang menyum ia taiy, ndom meyai blaoh pagam pathau khan blaoh oh ngak ka pablaoh. Lac 5-10 harei ye drei mai rah sa mbang, ndom meyai haong mikva ka bruk ngak mbang, gaiy gilai. Gam haong di nan, pathau khan urang nao gilai brei ngak siam adat taong mek njauk bhum tasik. Meyah EC oh taoh talaih “kat kanyik” bo thuak “kat bhong meraik” ye pablei tabiak ikan hadang gaok kan kandah lo. Lac mikva jeng ngak tui saong pang tui.

Hadei di pagam xa Tân Thủy hu kapul gilai taong ikan praong abih di tinh Vinh Long hu jaik 1.500 sruh gilai, brei bruk ngak ka labaih 12.000 urang ngak bruk. Bruk khan harak gar, kot cih vak veik jalan taong mek, pagam ndap nda kaya pasang iek jalan, khik kajap salamat… jeng hu 100% po gilai ngak catang.

Meda hu ndom mayai lac, bruk “Jak ba gheih – rabha bruk ka urang jakar, pagam tui urang nao gilai pacang caga ngak chung IUU” di xa Tân Thủy, tinh Vinh Long hu brei mboh bruk ngak, angan je di urang ndang ngan haong bhap bini. Bruk ini ba mai kein lagaih tantu cambaih laih, daong urang nao gilai sahnang hatai taong mek ikan tasik, patagok karo kajap saong ngak meda meng bhum tasik palei pala./.