Palei Trà Canh A2, xa Thuận Hòa, ban Can Tho di dom harei ini, dom phum soc bui baiy ottanot, chreih chrai bui sambai uan rok yang Sen Dolta di urang bangsa Khmer. Hu mbok di baoh palei sit hu ralo urang bangsa Khmer daok, khol dahlak mboh ralo baoh sang bahrau tamuh tagok. Dalam sang mboh la-an langaoh, bui sambai, dom urang dalam sang daok ramik sang danaok, papan duh mukkei… piah caga ngak yang paling tagok po ong po muk tui adat cambat di urang bangsa.

Di dalam baoh sang bahrau daok mbau ia cur, du diuk pasang ong muk Thạch Thị Sà Phương oh padauk hu hatai drut druai. Sang danaok daok dalam harak kandaman, urak ini hu brei daong padang sang bahrau, daong brei dua diuk pasang gam saong anek taco hu mbang akaok camareip rok Sen Dolta di dalam baoh sang bahrau gheih ghang. Muk Thạch Thị Sà Phương parabha hatai brei thau lac:

“Dua diuk pasang prein yava oh hu siam, bhian mabuh ruak. Raidiuk pambak tame dom anek daong. Bahrau meng harei blaoh hu daong alin hadiah kaya, dahlak hu taduan brah saong mi, dahlak ndua dhar phol biak ralo.”

Oh atah di nan, sang amuk Thị Sà Rên jeng bui sambai mai raok Sen Dolta. Thun ini sang muk mboh la-an hatai ralo jang kayua hu karja tuk halei jeng caik hatai daong kuhria, daong hadiah ralo baoh kaya brei:

“Baoh sang ini hu daong brei, dahlak biak bui sambai, oh daok sahneng kuhria ka hajan ia karah bak mbang sang. Harei Sen Dolta ini, sang drei jeng ngak salao lasei kakuh mukkei, nao sang baha…”

Xa Thuận Hòa hu labaih 75% rahra urang bangsa Khmer. Tukvak meng blaoh, karja palei hu caik hatai sang ka kuhria brei ka raidiuk mikva hu ralo danak dak nagar, dom danak dak mbang ngui rahra bhap bini, dong ilamo raidiuk brei ka bhap bini.

Ong Kim Che, urang hu angan di palei khan brei thau lac: Thuận Hòa, labik palei pala hu ralo urang urang bangsa Khmer daok, dom baoh sang kan daman hu karja palei daong sang bahrau, uan raok Sendonta biak bak hatai. Oh padeih di nan, blaoh daok hu bruk brei buh jien praong tame brei ngak jalan mbak sang danaok ha tang, urak ini, Thuận Hòa hu sagait sang bac, bilik bac, tal bac, balai y te gheih ghang, jalan palei danar njuah sanang lagaih brei ka nao ma-in gak mbang patagok kinh te. Mboh dalam nan bhap bini mikva urang bangsa ba bih hatai jai tame bruk ngak mbang, uak rup tagok dalam raidiuk.

“Mboh urak ini Karja nagar jeng ye palei tuk halei jeng caik hatai iek glang sangka praong brei ka rahra bhap bini urang bangsa Khmer. Tuk halei jeng ba tacei brei jeng ye daong mikva jien phun ngak mbang, ky thuat ilamo ngak mbang blei salih. Pachreih baoh sang urang kathaot kham marat ngak mbang patagok raidiuk. Blaoh daok daong sang danaok bahrau, ngak yau habar brei kan kathaot nyu trun.”

Xa Thuận Hòa, ban Can Tho hu brei pagam meng xa Thuận Hòa dan saong xa Phú Tân, huyen Châu Thành, tinh Soc Trang (klak). Thun ini mikva uan rok Sen Dolta dalam hatai sambai chreih, hu hatai sangka di Ndang dan saong Karja dalam raidiuk tapa tui dom danak dak tui akaok mbram pakat nagar, daong truh iek trun kathaot. Mboh cambaic di nyu hu meng hu angan xa Ngak nong bahrau, raidiuk bhap bini rahra karo, ralo baoh sang kathaot jeng urang kaya mada. Amuk Châu Hồng Hoa, Akaok UB Mat tran Nagar Viet Nam xa Thuận Hòa brei thau lac:

“Xa hu brei pataom bruk sangka kuhria ka bhap bini urang kathaot meng bruk brei ngak drah samar tui sarak karja di Ndang, Karja Nagar tal bhap bini rahra, dalam nan njauk abih tal urang bangsa takik. Cambaic lac meng blaoh hu daong brei ka 108 baoh sang padang, pasiam sang ngak sang daok bahrau; daong pato bruk ngak ka labaih meng labaih 2.300 urang. Dalam nan hu mboh jaik di ini, khol dahlak daok ngak bruk kuhria caga sangka brei ka baoh sang urang kathaot, kan kandah, urang bangsa takik meng bruk brei labaih kurang 10 tan brah, alin hadiah ralo janih kaya mbang cuk karei, daong jien ka mikva.”

Uan raok Sen Dolta dalam baoh sang bahrau gheih ghang la-an langaoh, gam saong dom bui sambai palei pala phum soc bahrau, urang bangsa Khmer xa Thuận Hòa, ban Can Tho ralo bui sambai chreih chrai jang kayua hu hatai caga sang ka di Ndang, Karja nagar jeng ye pakat bhum palei. Dom bruk kadha yau nan nyu jeng prein khang yak yum jum pataom, khik karo kajap talei ilamo bhap bini, padang taneh ia bhum palei dak harei dak kaya mada khang kajap gheih ghang siam makre./.