Ong Từ Nguyên Sái daok di xa Ninh Phuoc, tinh Khanh Hoa khan brei thau lac, Rayo sap ndom Viet Nam jeng yau danak dak papar sap Cam hu pambuak pagam haong ong yau sa sahabat yut cuai luac dom thun ini mai. Ong kanal hadhar di abih nan lac tuk sap urang papar sap di Rayo sap ndom VN yava tagok dalam danak dak khao tin tuk 6h saong tuk 18h yaok harei angaok loa papar sap di puk palei. Urak ini, tuk umo thun prong, baoh radio sit nan lac yau ayut yau sahabat tuk halei jeng daok di taphia tapen ong.

       Daok danak dak papar sap Cam, langiu di radio, ong jeng bhian pang tapa blah Website sap Cam saong tui iek angaok Fanpage sap Cam di Jabat VOV daok di  TP.HCM. Yaok mbang peih danak dak papar sap Cham, dom urang taha dalam palei jeng pataom gauk tui pang. Tui ong Sái, ini lac bruk salih bahrau di danak dak papar sap dalam jaman lek taka so urak ini. 

        Meda tui pang Danak dak papar sap Cam di grauk grak labik jeng hu, biak mbuan biak laghaih, dom baoh panuac yau klah rabha khan di amuk Mah Gim, urang Cam daok di puk 4, xa Xuan Hoa, tinh Ndong Nai.

        Ngan haong urang Cam di palei pala, bruk ngak hamu apuh, ngak mbang saong takik nao ngak kong nhan… tuk halei jeng jan van, yau nan ye tok pang yaom hu khaw tin angaok riyak di Rayo sap ndom VN saong abih di nyu lac Danak dak papar sap Cam. Amuk Gim khan yau ini, amuk oh klak tapa kadha halei dalam danak dak. Tuk halei peih danak dak papar sap Cam, amuk khin “pang ragu ragam” nan thau lac “dak dak papar sap Cam”. Kayua, ini lac dom danak dak baoh panuac ndom mayai biak jaik taphia, kein laghaih, daong ka urang Cam thau cambaih laih jang ka bruk ndom puac daok dang, kham merat ngak bruk pahla saong mblah tui dom kareih camin hu danak dak meyaih khan piah yam tagok ngak kaya meda. 

      Atah di ini jaik 20 thun, di labik ka 7 Nguyen Thi Minh Khai (jabat VOV di TP.HCM), di tuk 10h30’, harei 01/01/2005 hu papar panuac ndom: “Danak dak papar sap Cam di Rayo sap ndom VN”. Saong luac dalam 20 thun tapa, ngan haong labaih 7.300 harei melam - VOV TP. Ho Chi Minh hu ngak tabiak saong papar angaok riyak taong abih tukvak jaik 15.000 tuk di jaik 30.000 Danak dak papar sap Cam gam gam oh hu padeih  harei halei.

       Danak dak papar sap Cam saong dom janih jammariak pathau khan sap Cam karei yau ye Website sap Cam, Fanpage sap Cam angaok lek taka so blaoh saong daok ngak brei pambak tal labaih 180.000 bhap bani Cam daok grauk dom tinh, ban dalam negar…

      Dom harei akaok camereip bahrau dak padang danak dak, rilo blah harak hu cih vak meng tangin, langyah, blaoh patapak saong samar drah ba tame duk thu, blaoh brei tagok riyak ngan haong dom hatai kham marat di dom rai rah urang cih vak, urang neh kadha urang pasiam patapak huruh harak, urang lang tapa sap Cam, urang papar sap di Duk Bilik Sap bangsa, VOV TP. Ho Chi Minh.

      Luac 20 thun tapa, dom urang vak di danak dak hu nao tal dom palei Cam di grauk labik gah Mraong kreih nagar, Gah ia hrei tagok Mraong nagar, gah Pai mraong nagar piah ba rilo sap ndom panuac mayai, thaik binguk di dom dom urang Cam ngak ribau bruk siam; dom urang hu angan je dalam bhap bani; dom urang Cam ngak mbang – pablei salih naih jioi; dom asal daoh tamia, urang main ragu ragam bhap bani Cam tuk halei jeng duah saneng ngak yau habar piah khik ramik saong patagok dom yaom lingai ilamo meng kan dalam bhap bani...

        Sa-ai Lư Đồng Triển, sa urang Cam daok di xa Bac Binh, tinh Lam Ndong brei thau, Rayo tal harei ini hu labaih 80 thun, daok danak dak papar sap Cam jeng bak labaih 20 thun, sa-ai caong khin Rayo dui atah dhua jang dom danak dak bingi pang saong siam gheih jang tal urang pang rayo. Dom ragam adaoh bhap bani Cam nan lac ndap nda kaya kan mbang huak brei ka glo akaok tinh than oh kurang hu dalam yaok urang bangsa Cam, kayua yau nan ye caong khin Danak dak papar sap Cam, hu rilo jang kadha adaoh bangsa Cam.

      Yaok yam nao dalam luac 80 thun dak padang saong patagok di Rayo sap ndom Viet Nam, dalam nan danak dak papar sap Cam jeng bak 20 thun, tuk halei jeng hu bruk nao gam di ayut urang pang rayo – dom urang tuk halei jeng caik brei hatai ranam biak karei brei ka riyak papar sap, abih di nyu lac danak dak papar sap Cam.

        20 thun oh lac tukvak masa atah atah dhua brei ka sa danak dak papar sap, min tapi hadom vaktu masa nan jeng ginup brei ka dom urang daok ngak danak dak papar sap Cam mong gilac dom baoh kadha ngak hu saong oh ka dalam sa danak dak papar sap. Piah meng nan ngak brei ka siam jang, pasalih bahrau danak dak ngak yau habar brei ka danak dak papar sap Cham dak harei dak hu rilo urang takre pang jang./.