Anek Lorong lektaka 157 jalan Dương Bá Trạc, phuong Chánh Hưng, (Quan 8 klak) di dom harei ini yau ye cuk barau di rup drei ginuh ilamu ugama Islam. Ini lac sa labik hu ralo mikva bangsa tui ugama Islam daok chreih sambai dalam bulan Ramadan.

Tui saka takawin Islam thun 1447, harei 1 bingun bulan Ramadan laik tame harei 19/2/2026 (saka ia harei) dan dui atah 30 saka ia harei. Di bulan Ramadan, urang muslim kak iek dahlau di subuh 20 minit (pagap ye harei ini harei but 25 bulan 2 thun 2026 vaktu subuh tame tuk 5:02 minit ye vaktu kak iek njauk tame tuk 4: labaih kurang 60 minit tui labik, urang eik oh mbang oh minyum oh ba hagait tame rup mbiah tal ia harei tame ceik tuk 6: labaih kurang 8 minit (dalam bilan nyu kadun meng tuk 18h07 tal 18h08. Yaok harei, yaok baoh sang madeih aval kuhria van mbang subuh jeng ye ndap nda kaya talaih eik tuk magarip ia harei tame ceik, gam song dom janih kaya kan yau ye cuk klik, ralo lamo cuh, dom janih ha yamen. Dom janih kaya mbang huak bulan eik yau ini yau brei thau hatai jai siam makre hacih saat sukut tal Aulaoh Tala di drei.

Pak cik Saliman – sa urang Cam daok di phuong Chánh Hưng brei thau: Bulan Ramadan ieu lac sa di 5 taka dalam rukun Islam, ieu lac sa bulan brei ka urang muslim Isalam brei uak rup drei piah jeng urang hu aman urang siam, yau nan ye khol hulin dahlak caga rami ramik ka tantu:

"Dom urang muslim Islam tuk tame bulan Ramadan mboh biak uan tabuan, gait rami ramik tani tanat sampurna. Bulan Ramadan vaktu harei imsak eik oh mbang oh menyum, tal tuk ia harei tame brei talaih eik ye bruk mbang mayum bruk hik jeng biasa. Urang Islam ieik praong iek glaong bulan Ramadan dalam thun, kayua lac dalam rai manuac oh thau hu hagait sahnang lagaih piah ka anek manuac ngak siam yau ye bulan Ramadan, yau nan ye bulan Ramadan ieu lac vaktu masa brei ka drei ngak man ibadat siam di abih".

Thei thei jeng caong ngak man dalam bulan Ramadan yau nan ye mikva ieu bulan Ramadan lac bulan parabha anit ranam.

Di sang Magik Jamiul Anwar, harei harei urang muslim ngak ralo janih kaya kan piah ka mikva uk paga pandar dalam jammaah, thei jeng hu brei mek ganap ndap nda kaya mbang ba mai sang. Ralo baoh sang hu mbang daok daa tuai damuai mikva dalam jeng ye langiu jammaah mai talaih eik di sang danok di drei.

Tui ong Ab-Dohalim – Naep sang Magik Jamiul Anwar, dalau si tame bulan Ramadan, Urang vakil jammaah jeng ye dom urang brei hadiah dom paok kaya ka mikva urang kal di puk paga dalam jammaah, caong khin mikva hu sa bulan Ramadan ganap bak sil. Lac sa urang hu angan dalam jamamah, ong Ab-Dohalim pok panuac brei thau: bhap bini urang bangsa Cam dalam jammaah tuk halei jeng jumpatom, tangin pan tangin sa tung sa hatai neh rabha brei ka urang daok kal daman piah thei thei jeng hu rai diuk siam makre jang:

“Ngan haong kadha oh luai ka thei daok gah likuk, khol dahlak hu takik ye mbang takik, hu rilo ye mbang rilo..." 

Oh dang di bruk ngak man ibadat dalam ugama, bulan Ramadan daok buk tame janih ilamu bangsa. Darak sit brei ka ndap nda kaya kan mbang huak bulan Ramadan dalam Lorong 157 jalan Dương Bá Trạc jeng madeih gam gam song bulan Ramadan. Darak pasar pataom gauk meng tuk 14h-17h yaok harei, pablei ralo janih ndap nda mbang huak yau ye roti plah ralo am, tung lomo, kari lamo, dom janih har cuh har am, ia minyu Halal tal dom janih kaya kan thu piah mbang suai atau piah mbang malam. Tanut karei praong abih di darak pasar dalam jammaah ini lac oh maluk janih ndap mbang haram, pabak tame nyu hu ralo lomo, ralo manuk kayua urang urang Cam sammalaih mbak bing ilamu bangsa.

 Ciknai Haly Mah, urang pablei kaya mbang di dalam Lorong 157 brei thau lac, dom janih kaya mbang menyum di ini yaom meng 10.000 dong tal 30.000 dong yau nan ye thei thei jeng blei hu. Taong abih ndap nda kaya mbang di nyu kayua mikva urang bangsa Cam ngak eng, biak bingi, biak njauk cambuai, hacih sa-at, kayua yau nan ye urang Cam daok labik karei jeng hu mai ini blei mbang:

''Dahlak pablei ahar luac thun, min dalam bilan Ramadan ye pablei hu rilo jang...”

Bulan Ramadan oh dui atah dalam thun, ini daok hu ralo tuai damuai jirah, urang ban raya Ho Chi Minh jeng mai iek mai roh duah ilamu urang bangsa Cam Islam daok dalam pusak banraya.

Amuk Nguyễn Thị Xuân rahra daok di Ban raya Ho Chi Minh brei thau lac, baoh sang amuk mai tal ini mbang dom kaya mbang Halal.

"Dahlak mai tal ini meng thun dahlau blaoh, dahlak thau darak ini mai meng yaih khan di angok internet. Kaya di ini biak bingi, yaom kom jeng mbiah, urang pablei nyu jeng mboh anit. Dahlak mai tal ini jeng mboh mikva biak jaik taphia, yau nan ye page drei mada mai tal ini gac".

Bulan Ramadan oh lac vaktu masa piah ngak rukun aman ibadat blaoh nyu daok ieu lac waktu masa brei ka jammaah urang bangsa Cam di ban raya Ho Chi Minh yak yum jum patom, rami ramik khik caga ilamu jeng ye brei patambak yaom kom ilamu bangsa.

Dalam ragam di jaman bahrau, binguk dom Lorong jalan sit tame jamaah hadah manyek, sap bac Qur’an yava tabrah meng di dalam sang Magik dan saong dom pok kaya hadiah di urang kaya hu hatai mboh bak dom anit ranam daong jeng kaya mada bingu ila ilamu bangsa ugama di Ban raya Ho Chi Minh./.