Tui mikva urang bangsa SeDang, alat ragam ragu bhap bini bangsa oh kurang hu di dalam raidiuk yaok harei, rilo meng lac tame dalam dom harei raya adat cambat, harei, tet, sap ragam klông pút, t’rưng yava tagok dui pachreih biak rilo mikva mai pang. Sa-ai Karôly, umur 29 thun, daok di mbon palei H’Ring, xa Cư M’gar, tinh Dak Lak ndom mayai lac, phling ragam lac talei pambuak bhap bini. Lac banah yava di mbon palei yaok tuk raya adat, bal pataih mai. Kayua yau nan blaoh dom dam dara daok di sang daok pandaok tuk halei jeng khik ramik ilamo bangsa, oh tok lac hatai chreih takre, blaoh daok mai mbon palei duh mikva saong tuai damuai:

“Dahlak hulin biak chreih takre ragam ragu di bangsa drei. Dalam dom harei akaok thun, harei raya, tet, khol dahlak hulin me-in klông pút, t’rưng hlai gam haong gong caing, gam haong gauk adaoh tamia piah bui sambai haong mikva saong tuai damuai mai rivang. Ini jeng lac bingun piah pambuak pagam hatai uranam, gul pataom jang veik dalam mbon palei. Tuk me-in alat ragam, dalam tung tian dahlak hulin mboh biak bui sambai, rilo meng lac di harei akaok thun, harei raya Tet hu gaok ong amuk mei, amaik ame, adei sa-ai; dalak hulin me-in klông pút piah abih urang gam tamia xoang, tuk nan hatai bui sambai hu tagok paralo dua mbang.”

Tui sa-ai Tùng, umo 29 thun, jeng daok di mbon palei H’Ring, bruk paih puan, iek praong phling ragam bangsa daok lac bruk njauk khik ramik saong patui veik ilamo di mukkei.

“Ragam ragu klông pút, t’rưng biak hu makna angan je di dalam raidiuk daok dang me-in di bangsa SeDang saong dom bangsa karei. Dom alat ragam ini jeng sangka yau gong caing dalam bruk khik ramik ilamo bangsa. Jaman ong amuk mei meng kal, dalam dom harei bilan akaok thun, adat uan mbang akaok padai bahrau, harei Tet, oh kurang hu sap klông pút, sap kong caing hlai gam haong sap adaoh bhap bini, ngak ka harei bal pataih, harei raya, harei adat, tet hu bui sambai, chreih chrai saong daong khik ramik ilamo bhap bini di urang bangsa SeDang.”

Bruk tari taring kham merat di dom urang sit thun sit umo yau ye A Bảo, Karôly atau A Tùng oh tok lac ngak jeng dom kadha me-in ndung bak ilamo, blaoh daok pambak tabiak hatai mboh hadah mbaok meta dalam bhap bini. Ong Pê Đoan, rahra di mbon palei H’Ring, rilo mbang mboh dom adei ka bruk me-in di dom mbon palei dalam dom harei raya adat, drut druai lac:

“Dom adei biak naih joi, thau me-in alat ragam ragu bangsa, thau khik ramik ilamo bangsa. Dom adei chreih takre yau nan ye bac magru biak samar, daok hu nao me-in alat ragam di rilo labik, mikva dalam mbon palei thei thei jeng uan tabuan bui sambai.”

Oh sa janih hu brei main di dalam bruk daok dang yaok harei, dalam dom harei raya hu angan makna yau Adat uan padai bahrau, sap alat ragam kreim la-a kayua dom ayut dam dara di Sang daok pandaok bhap bini But pajaih Têrêsa me-in hu jeng sa bruk daong bui sambai saong pambuak pagam khang kajap ka mbon palei. Ong A Vi Voan, akaok mbon palei Kon H’Ring, xa Cư M’gar, tinh Dak Lak, brei thau:

“Dom adei daok sit thun umo min biak thau iek praong, khik ramik ilamo bangsa drei, thau me-in rilo alat ragam yau ye gong caing, t’rưng, klông pút, ting ning… Mbon palei khol drei biak mboh hadah mbaok meta kayua hu rai rah dam dara thau patagok ilamo bhap bini di mukkei caik rai.”

Meng dom harei pasram di Sang daok pandaok bhap bini But pajaih Têrêsa mai tal dom harei me-in alat ragam ragu chreih chrai dalam dom harei raya di mbon palei, dom urang dam dara bangsa SeDang daok patui veik brei apui chreih takre ilamo bangsa ka rai rah dam dara. Nan lac uranam, lac bruk njauk ngak, lac caong takre piah sap ragam klông pút, t’rưng, ting ning, gong caing… miat miat sameng yawa, piah ilamo urang bangsa SeDang patui veik hu diuk karo kajap tui tukvak./.