Pajeng tabiak saong praong tagok dalam baoh sang hu hatai anit ranam ilamo bangsa Cam, amuk Lư Thái Tuyên lac anek di Nghe nhan Uu tu Lâm Tấn Bình, urang daok di xa Bắc Bình, tinh Lam Dong (labik huyen Bắc Bình, tinh Binh Thuan klak) tuk halei jeng mboh hadah mbaok meta saong chreih chrai ba drei tame dom danak dak pambuak praong dalam haong halau gha.

Hadei di jaik 23 thun ngak bruk gah ilamo, hu rilo ilamo pasang iek, nyaom biai saong roh duah dalam gah drap ar ilamo, rilo meng lac drap ar ilamo dom bangsa di bhum palei, amuk Lư Thái tuyên hu palih ruah, yaih khan tame harak angan palih ruah raya tame Quoc hoi mbang ka XVI.

 Ong Đoàn Văn Thuận, Phaok Yam ndok Gilang khik drap ar tinh Lam Dong (dahlau diah lac Yam ndok Gilang khik drap ar tinh Binh Thuan) brei thau, ini oh lac bruk hdah mbaok di amuk Tuyên blaoh daok lac hatai bui sambai, hadah mbaok meta di Jabat.

"Bruk amuk Lư Thái Tuyên hu jabat yaih khan ba drei tame palih ruah tame lambaok jeng urang vakil Quoc hoi nagar mbang ini lac biak njauk ngak. Dahlak hulin jie tame amuk Lư Thái Tuyên mada ngak salah siam bruk di urang ba drei tame palih ruah tame lambaok vakil Quoc hoi nagar. Ini lac bruk hadah mbaok meta di ta-eng amuk Tuyên saong jeng lac bruk daong prein piah patui veik rik daong rilo jang veik ka bruk hit patagok gah ilamo, pahat padhih saong jirah rivang dalam nan jeng hu gilang khik drap ar."

Lac urang bangsa Cam hu rilo thun ngak bruk gah ilamo, amuk Lư Thái Tuyên thau tani tanat dom ilamo siam gheih di bangsa, dalam bruk tinh Lam Dong hu tal 49 bangsa adei sa-ai, dalam nan hu dom bangsa takik diuk rai suai lavik. Dalam danak dak bruk ngak di drei, amuk Tuyên tuk halei jeng pamaong tal lambaok vakil ka sap ndom di dom bangsa takik, pataom tame bruk khik ramik saong patagok ilamo siam gheih di bangsa.

Amuk Lư Thái Tuyên brei thau, bruk patagok kinh te – xa hoi di dom bhum palei dalam tinh Lam Dong jeng oh ka samu gauk, dom baoh sang kathaot saong jaik kathaot hu patrun tui yaok thun, min jeng daok saong pataom rilo di bhum urang bangsa takik. Kayua yau nan ye, bruk ba tagok panuac ndom ka Quoc hoi sangka, jhul khang tukvak peih ngak pataom 3 Danak dak jalan ngak pakat negar dalam nan hu: Padang Palei pala bahrau; patrun kathaot karo kajap saong patagok kinh te – xa hoi bhum urang bangsa takik saong bhum ceik ieu lac sa bruk praong daong patagok kinh te – xa hoi di dom bhum palei dalam tinh.

Gam tui di nan, bruk ndom mayai biai ba pok tagok brei ka Quoc hoi nagar sangka iek buh jien tame, patagok taong abih dom yaom kaom, prein khang ilamo saong padang anek menuac Lam Dong “Siam mekre – Gheih ghang – Anit ranam tuai damuai”; brei jhul khang bruk ngak lek taka so brei ka drap ar piah khik kajap miat miat, tagok bruk pandar saong paglaong yaom kaom drap ar dalam jaman lek taka so, pagam haong patagok jirah rivang ilamo, jirah rivang bhap bini, piah rahra hu tapak ba drei tame saong mbang tui kein laba meng gah jirah rivang, brei bruk ngak karo kajap…

Ini lac mbang akaok meti hu yaih khan ngak urang lambaok vakil di rahra, nan tui amuk Lư Thái Tuyên langiu di hatai mboh hadah mbaok meta jeng lac bruk njauk ngak glaong di ta-eng rup drei. Amuk Tuyên ndom meyai ndom mayai lac:

"Meyah ndom mayai lac hu njauk kateik trak halei oh nan ieu lac bruk kateik mai meng bruk ngak njauk haong dom panuac sanya dalam danak dak bruk ngak saong langyah tani tanat dom hatai, caong takre di urang urang buh hala harak pilih ruah raya. Dahlak je lac bruk kateik geik nan lac bruk daong prein piah dahlak pasiam ta-eng rup drei."

 Lac urang ba drei tame palih ruah hu gah Ilamo, Pahat padhih saong Jirah rivang pok brei yaih khan, langiu bruk lac urang ngak bruk “ilamo pasang jalan ka rahra nao”, amuk Lư Thái Tuyên daok thau biak tani tanat ka bruk di drei, daok lac lambaok vakil ka urang kamei, ka rahra bangsa takik./.