Kreh dalam dom urang nao mai yaok harei tapa pabah bambang di tapen negar Mỹ Quý Tây, tinh Tay Ninh, Dai uy Đoàn Nguyên Khang tuk halei jeng pasang iek yaok bruk sit abih. Sa-ai thau lac: bruk salamat harei ini tok hu tuk kapul bien phong khik hu “mata ka klau” anak dom bruk di kol duas.

Di ngaok bruk ngak urang dang Akaok Balai, Nguyên Khang tame harei bahrau meng bruk ngak patruh bruk pandar di pakat angaok mai tal yaok urang jakar, bol lin, kak kajap bruk pasang iek tapen negar, gam haong nan pan kajap bruk di adei sa-ai piah ka lagaih. Bruk pambuak di dom kapul meng Hai quan tal Kong an xa, hu maong yau “anek kiar” duah mboh samar chip bruk suan hukum.

Dom bilan puac thun lac tukvak “pandiak”, hu  500–700 mbang urang tapa pabah mbang negar yaok harei, mbuan tamuh tabiak dom bruk dauk ba ameh pariak, ba jru phil, phao karaong saong dom bruk ngak bangal meng gah diah tapen negar tagok glaong. Balai di Khang pan thau tani tanat ka bruk rah tabiak, khik majam pathau khan samar chip, drap gap mek kol duas meng tuk nyu si ngak. Ngan haong sa-ai, pacang khik salamat tapen negar oh lac sa bruk ngak, bo daok lac panuac pagun sanya haong rahra. Dai uy Đoàn Nguyên Khang, Akaok Balai bien phong Pabah mbang tapen negar Mỹ Quý Tây brei thau:

“Tabung glaong di dom harei anak Tet Nguyen dan saong thun 2026 tukvak rah tabiak Nyaom Roya Ndang dalam negar kuhria khan dahlau hu rah tabiak rilo janih kol duas: jru aphil, phao karaong, jeng yau dom kol bangal meng gah diah tapen negar. Bruk ini hu taong yaom lac biak srau kadau. Meng bruk ngak Akaok Balai, dahlak tuk halei jeng thau tani tanat ka bruk rah tabiak dalam – langiu tapen negar, pathau khan samar chip piah pakat angaok pato tacei, gam haong nan peih bruk pacang cakak saong mek kol duas meng tuk barau si tamuh di kol nyu.”

Bau tal Dai uy Đoàn Nguyên Khang, ayut cuai jeng taong yaom sa-ai naih gheih, thau ka bruk di drei, tuk halei jeng nao taphia bol lin. Pajeng di thun 1996, Khang naih gheih haong dom bruk tani tanat, hu ilamo dalam bruk ngak saong hu ngak catang ka bruk pacang khik tapen negar. Bruk ngak tapak di Khang brei mboh cambaih dalam rilo bruk: mek kareik kol pablei jru phil, pablei dauk ameh, phao patuh, pajeng ba phao ndao saong dom bruk bleik saleik dalam pablei salih.

Langiu di nan, Dai uy Khang daok peih tabiak dom bruk daok dang mbang ngui ka rahra yau ye “Khang brah anit ranam”, Yaok adit sa labik” piah daong urang metui mejua. Dom kham marat nan daong padang bruk bien phong dalam rahra khang kajap, khik sron mbon salamat ka labik tapen negar. Amuk Lê Thị Kim Ngân, Akaok UB Bhap bini xa Mỹ Quý, tinh Tay Ninh taong yaom lac:

“Dong chi Khang, urang dang Akaok Balai Bien phong tapen negar Mỹ Quý Tây, lac sa urang jakar tuk halei jeng ba abih tung tian dalam bruk ngak. Sa-ai bhian pambuak kajap haong kapul chuc nang saong UB Bhap bini xa, peih bruk siam lagaih dom bruk pacang khik tapen negar, khik karo kajap an ninh tapen negar dalam bhum. Gam haong hatai thau ka bruk glaong, dong chi Khanh daong hu makna dalam bruk khik kajap tani tanat saong salamat di labik xa Mỹ Quý”.

Tui Thuong ta Phạm Thành Trung, Akaok Balai Bien phong tapen negar Mỹ Quý Tây, ngan haong bruk naih gheih, hu ilamo ka bruk saong hatai hadah krah, Dai uy Khang gam haong kapul urang jakar, bol lin khik karo kajap an ninh, oh luai ngak jeng “labik pandiak” ka bruk pablei dauk saong kol duas dalam puac thun.

“Dong chi Khang dang bruk, pato tacei Balai Bien phong peih bruk pambuak khang haong dom kapul angaok tapen negar, khik kajap pasang iek, pasang iek menuac urang, radaih saong ndap nda ka salamat. Sa-ai thau tani tanat ka bruk rah tabiak di dalam – langiu pabah bambang tapen negar, dil samu ndom biai ka pakat uy saong Mban Pato tacei Balai langyah siam lagaih dom bruk pambuak tal tapen negar. Dong chi Khang, rilo thun danak hu brei angan Bol lin pakacah, lac urang naih gheih di labik.”

Meng kham marat, thau ka bruk di drei saong hadah krah dalam bruk ngak, Dai uy Đoàn Nguyên Khang gam haong ayut cuai khik salamat bhum taneh di tapen, nagar cakak pablei dauk, jru phil saong phao ndao. Bruk buh abih hatai tian di bol lin sit thun umo oh lac pacang khik an ninh tapen negar, bo daok pambak tabiak hatai je, daong padang bhap bini tapen negar khang kajap./.