Ong Điểu Ngăm (umo 66 thun, urang bangsa M’nong, daok di mbon palei Bu Gia, xa Quảng Trực) brei thau, dom harei tapa ong bhian nao tal Sang ilamo bhap bini piah duah thau harak angan lambaok vakil hu mbaok palih ruah HĐ Bhap bini xa, tukvak anak tal. Tui ong Điểu Ngăm, dom urang hu mbaok palih ruah jeng hu ilamo bac megru gkaong, rah tapa luac jalan ngak bruk suai atah, kayua nan ong caong khin palih ruah tabiak urang hu ginup hatai, ilamo, lambaok ka sap ndom di mikva, lac talei pambuak di Ndang, Karja saong Rahra, daong bad om sarak ka bruk padang bhum tapen negar dak harei dak ginup meda, siam mekre.

“Dahlak hulin hu pajeng saong praong tagok di ini. Dom harei ini, harei halei dahlak hulin jeng nao tal Sang ilamo bhap bini di mbon palei piah maong iek harak angan urang lambaok vakil hu mbaok brei palih ruah tame ngak urang di HĐ Bhap bini xa. Dahlak hulin mboh hadah mbaok meta tuk hu nao buh harak, caong palih ruah hu urang “ndom jeng, ngak jeng”, lambaok ka mbon palei, daong ba palei pala Quảng Trực dak harei dak cakrok tagok.”

Sa-ai kamei Thị Huynh (bangsa M’nong), Akaok kapul palih ruah lek ka 2 (mbon palei Bu Prâng 2), xa Quảng Trực brei thau, kapul palih ruah hu labaih 300 urang palih ruah, 98% dalam nan ieu lac urang bangsa M’nong. Hadei Nyaom biai mbang ka dua (harei 3/2), sa-ai gam haong 8 urang ndang kham merat pathau khan Hukum Palih ruah, tacei ba urang nao palih ruah thau tani tanat ka yaok urang hu mbaok palih ruah, piah khik kajap bruk nao palih ruah njauk hukum, tantu cambaih laih, palih ruah hu dom urang naih gheih, njauk lambaok ka hatai kham merat saong caong takre di mikva.

“Urak ini, Sang ilamo bhap bini di mbon palei hu mbat taok harak angan dom urang lambaok HĐ Bhap bini hu mbaok palih ruah piah mikva tui iek, palih ruah dom lambaok vakil hu ginup hatai, ilamo, ngak talei pambuak di Rahra saong Ndang saong Karja. Tapa nan, daong bad om sarak daong di pakat angaok mai buh jien tame, padang daong mbon palei gam haong mikva dak harei dak patagok.”

Mbang palih ruah Lambaok vakil Quoc hoi ka XVI saong lambaok vakil HĐ Bhap bini dom pakat, tukvak thun 2026–2031, xa tapen negar Quang Trực hu labaih 7.200 urang palih ruah, buh harak di 12 labik di 11 mbon palei saong Trung ndoan 726. Ong Akaok Uy mban Mat tran Negar Viet Nam xa Quảng Trực, urang, urang dalam Uy mban palih ruah xa brei thau, bruk khik kajap an ninh siam mekre, caga dom labik palih ruah, srap gap rami ramik sang bilik khánh tiết, ginraong buh harak saong dom kein lagaih duh bruk palih ruah hu peih ngak samu gauk, tani tanat ka harei palih ruah. Urak ini bhum palei daok salah blaoh dom bruk puac abih, srap gap ka nyaom biai mbang puac abih, pamaong tal harak angan urang lambaok vakil HĐ Bhap bini xa tukvak anak tal.

“Palih ruah tukvak thun 2026-2031, khol dahlak hulin pambuak haong dom labik piah cang hadei mbang Nyaom biai mbang ka klau taduan harak angan urang lambaok vakil Quoc hoi Nagar jeng yau lambaok vakil urang HĐ Bhap bini tinh payua mai bhum palei, piah peih ngak ginup dom harak patui veik, khik kajap bruk palih ruah hu ngak njauk adat. Daok di HĐ Bhap bini xa, urak ini khol dahlak hulin daok pasang duah, caga ka di Nyaom biai mbang puac abih ba tabiak harak angan meng 44 urang lambaok vakil trun daok 33 urang, pamaong tal palih ruah 20 urang lambaok vakil HĐ Bhap bini xa ka tukvak ngak bruk anak tal.”

Ngan haong bruk srap gap tani tanat di Uy mban palih ruah xa tapen negar Quảng Trực, mbang palih ruak di bhum palei hu je tame lac brei rah tabiak tantu cambaih laih, njauk adat, ngak tabiak bruk chreih chrai uan taduan dalam Bhap bini. Mikva dom bangsa Bunong payua abih hatai je tame harak palih ruah, caong khin ruah hu dom urang lambaok vakil hu ginup hatai, ilamo, jaik rahra, thau ka rahra. Tapa nan, daong padang palei pala Quảng Trực dak harei dak ginup meda, siam mekre./.