Bruk njauk meyaom lac tuk taduan mek bruk, urang dang akaok dam dara phuong Đạo Thạnh, sa-ai Nguyễn Ngọc Hiếu hu brei mboh hatai ka bruk ngak, bruk naih gheih saong ilamo politi di dalam bruk gul pataom, pataom urang dalam kapul ndoan, dam dara, ba bruk di Kapul ndoan saong danak dam dara dak harei dak nao tagok. Hu mboh rilo abih dalam tukvak jaik ini lac kapul Ndoan phuong hu nao dahlau dalam dom bruk halan tian, nao pagam saong bruk ngak politik di bhum palei blaoh naih gheih abih lac bruk salih taka angka so.

Sa-ai Nguyễn Ngọc Hiếu gam haong kapul meng thun dahlau hu tacei ba rahra mek trun phan mem bayar jien oh meng jien mbaok hu labaih 400 urang; daong, pathau khan tadai kuan, labik pablei salih pagam ralaoh pasang bah QR code piah bayar kjien online hu 155 labik; tacei ba mbang urang tut angan tai khoan jitvu karja online hu labaih 1.730 tai khoan… Njauk ndom mayai dalam nan hu bruk “Mbaok anek kiar an ninh” hu Kuk Slih lek taka so – Mentri Ilamo Khoa hoc saong kong nghe taong yaom glaong. Sa-ai Nguyễn Ngọc Hiếu, Bi thu Kapul ndoan Dam dara phuong Đạo Thạnh, tinh Dong Thap brei thau:

“Mai meng dom kein lagaih di dank dak salih lek taka so ka rahra, dahlak saong dom ayut dalam Kapul Dam dara phuong hu tame roh duah, pandar dom danak dak salih lek taka so tame bruk palagaih ka raidiuk yaok harei di rahra mbuan mbiah, daong rahra pandar ilamo kong nghe, pagap yau buh harak gar jitvu karja online, dom bruk ngak yaok harei jeng mbuan ngak jang, bayar jien oh meng jien mbaok, pataom dom harak gar tagok tai khoan ngak cambaih laih brei tui angan online”.

Thun 2025, Kapul ndoan phuong Đạo Thạnh kayua sa-ai Hiếu peih bruk hu ba tagok blah fanpage kayua Kapul ndoan phuong 102 kadha vak ka bruk pacang khik jalan sahaneng di Ndang, meraik gauk, ndom meyai ka dom jalan sahaneng oh lagaih di angaok mang…Di gah bruk ngak halei sa-ai Nguyễn Ngọc Hiếu jeng nao dahlau, naih gheih piah ka dom ayut dalam kapul ndoan, dam dara karei ngak tui.

“Bruk di dahlak hulin lac ngak tui panuac pagun sanya anak rahra, kham merat jaik taphia rahra, pang rahra ndom, caong takre di rahra piah ndom ba panuac tagok dom jabat huu quan, biak lac talei pambuak di rahra saong karja. Dalam tukvak anak tal, dahlak hulin kham merat salah blaoh bruk di Ndang uy – UB Mat tran Negar saong kapul ndoan pakat tinh jao bruk; kham merat ba danak dak Kapul ndoan di phuong Đạo Thạnh saong tinh Daong Thap dak harei dak patagok jang”.

Ong Diệp Chánh Thanh, Akaok UB Mat tran Negar phuong Dao Thanh, tinh Dong Thap ndom mayai lac, Kapul Dam dara phuong ngan haong bruk dang akaok, dui ba di sa-ai Nguyễn Ngọc Hiếu, danak dak nao tagok, rup sa-ai biak chreih chrai, hadah krah, salah blaoh sia, bruk hu jao:

“Rup Sa-ai Hieu hu hatai anit ranam, ilamo, prein ngak biak siam, hu rilo bruk naih gheih. Dalam kadha salih lek taka angka so, sa-ai biak kham merat, siam mekre, hu rilo bruk ngak gheih. Dahlak taong yaom glaong ka prein ngak di sa-ai Hiếu ka bruk gul pataom, pataomk dam dara biak siam lagaih, salah siam bruk hu rabha. Kapul Dam dara phuong biak hadah krah, siam mekre, hu rilo bruk pataom dam dara hu peih praong”.

Ngan haong bruk jak jeng naih gheih dalam bruk ngak, sa-ai Nguyễn Ngọc Hiếu hadah mbaok mata kayua hu Trung uong Kapul Ndoan TNCS Ho Chi Minh pok harak meyaom, Kapul Lien hiep Dam dara Viet Nam alin 1 harak meyaom. Min, sa-ai Hiếu brei thau, bruk bui sambai praong abih di drei lac bruk hu buh tabiak prein, hu duh ka palei pala, piah daong padang palei pala, taneh ia dak harei dak patagok./.