Sang iek ruak Nhan dan 115 saong Sang iek ruak Da khoa Tam Anh Ban raya Ho Chi Minh bahrau mbaoh tangin pambuak bruk taong abih dalam bruk pasang iek ruak, taong ruak, pato pakai saong roh duah ilamo khoa hoc, daong ngak cambaih laih Sarak 72 di Mentri Chinh tri saong Sarak 282 di Rajaei ka bruk patagok pambuak karja – menuac urang dalam y te.

BS.CKII Trần Văn Sóng, Yam ndok Sang iek ruak Nhan dan 115 ndom mayai lac bruk sangka prein yava taong abih tok mek hu tuk karja saong menuac urang gam daong gauk, pabak kein lagaih ka gauk. Sang iek ruak Nhan dan 115 lac pasak taong ruak dot quy dang akaok Viet Nam, hu mbaoh tangin mek hu tanut “Banrik” chau A – Thai Binh Duong, taduan kuhria rah tapa hu labaih 350 mbang daong samar chip yaok harei, dalam nan 40-50 mbang matai dil. Dalam tuk nan, Tâm Anh jeng hu pasak ka dot quy, hu ilamo kong nghe raih glo meng Robot pandar tri tue nhan tao (AI). BS Trần Văn Sóng brei thau:

“Khol dahlak hulin daok tagok jalan ngak cambaih laih dom gah blaoh dua gah hu njauk gauk, piah ngak habar pandar abih kein lagaih ka anek menuac, ka ndap nda kaya, ka dom ilamo duh bruk taong ruak bo oh njauk hu labik halei jeng hu. Bruk pambuak ini hu lagaih dalam bruk sangka prein yava brei ka rahra”.

PGS.TS.BS Trần Quang Bính, Yam ndok chuyen mon gru Sang iek ruak Da khoa Tâm Anh Ban rây Ho Chi Minh brei thau, oh padeih di pambuak bruk taong ruak, Tâm Anh caik abih tame bruk patagok kein lagaih urang ngak gah y te ilamu glaong.

Majam ini pataom rilo urang ilamo akaok gah – lac dom urang hu ngak bruk di dom sang iek ruak praong – gam hoang kapul bac si sit thun umo hu pato pakai tani tanat di dalam saong langiu negar. Kapul ini oh lac ngak po gah ngak kong bahrau, blaoh daok srap gap hu tame roh duah ilamu khoa hoc, pambuak bruk saong nagar karei di dunya, ngak dom bruk roh duah siam glaong meda hu ba tabiak dalam dunya. PGS.TS.BS Trần Quang Bính brei thau, pato pakai saong roh duah ilmao khoa hoc lac bruk piah patagok karo kajap:

“Bien halei pambuak hu bruk karja – saong bruk menuac urang yau ini, dahlak sahaneng khol drei jeng hu jalan ngak njauk ka sarak saong jalan ngak, dalam tukvak hadei jaik abih brei hu ril daong tame majam y te di kapul ASEAN. Khol dahlak hulin lac sa dalam dom pasak y te hu ilamo glaong. Hu mboh lac urak ini di rilo labik hu dom ilamo kong nghe y te bo dom negar karei brei mai tal negar drei, payua mai tal ini taong ruak atau bac megru”.

Ban raya Ho Chi Minh urak ini hu 90 sang iek ruak langiu di sang iek ruak karja, labaih 10.000 bilik pasang iek ruak, 15.000 labik jru cavao saong 95 pasak daong rahra di ta-eng menuac urang peih tabiak. Majam ini oh lac tok klah rabha naong trak haong labik pakat karja, daok daong paglaong njauk jitvu, ba mai ka rahra hu rilo pilih ruah sangka prein yava siam glaong. Ong Nguyễn Hải Nam, quyen Chanh Van phong Jabat So Y te Ban raya Ho Chi Minh brei thau:

“Dalam Jalan patagok y te Ban raya Ho Chi Minh, gah y te Ban raya tuk halei jeng brei mboh y te ta-eng menuac urang lac sa dalam dom bruk hu makna di majam sangka prein yava taong abih rahra; pachreih bruk pambuak, bruk maraik gauk saong gam haong gauk klah rabha bruk ngak rahra. Bruk patagok y te ta-eng menuac urang hu brei mboh lac jalan langyah oh lac paglaong prein pabak jitvu y te bo daok daong prein jhul tagok Ban raya Ho Chi Minh pambuak gauk dalam haong labik saong dunya”.

Pambuak bruk karja – bruk menuac urang ta-eng oh lac jalan langyah daong gauk, blaoh nyu daok ieu lac bruk njauk ngak piah brei patagok karo kajap. Bruk pambuak dak harei dak praong dalam di dom sang iek ruak pakat karja – menuac urang daok peih tabiak sa bruk patagok bahrau ka gah y te Ban raya Ho Chi Minh: salih meng “daong gauk” tapa “patagok haong gauk”, gam haong gauk sangka prein yava ka rahra./.