Hu mbaok di Jabat Khoa taong ruak janih ula kaik di Pasak Raong pala, Roh duah, Ngak jru (lac labik raong ula Đồng Tâm) daok di gah Hậu cần – Ky thuat (Quan khu 9, di xa Long Hưng, tỉnh Dong Thap), khol dahlak hulin mboh hu jaik 10 urang daok taong ruak njauk ula kaik di ini. Ong Đoàn Văn Định, rahra xa Vĩnh Kim, tinh Dong Thap, bahrau njauk ula mbat iku bhong meraih kaik tame tangin daok taong ruak di ini, brei thau:

“Dahlak hulin njauk ula kaik, tame ini hu klauk jru, menyum jru, mboh prein yava jeng yau bhian, pandik lagah sa sit min. Di ini duh biak siam, mboh biak njauk hatai.”

Ong Phan Văn Nghiệp, daok di xa Đồng Khởi, tinh Vinh Long jeng daok taong ruak ula kaik, brei thau lac:

 “Dahlak hulin njauk ula hala mbat iku bhong meraih kaik, urak ini jeng siam mbiah paje. Hadei di ula kaik dahlak hu nao tapak tal ini taong ruak. Mboh di ini biak siam, sangka urang biak tani tanat, drei biak njauk hatai, mboh siam kajap rilo paje.”

Dut haong meng dahlau diah, urak ini dom urang hu njauk ula kaik mai tame ini taong ruak hu tagok labaih 30%; kuhria rah tapa yaok harei taduan urang ula kaik meng 7-10 urang daok di dom tinh dalam bhum Taneran kraong Cuu Long, rilo hu meng di nyu dalam nan lac urang njauk ula hala mbat iku bhong meraih kaik.

Urak ini, Jabat Khoa taong ruak njauk ula kaik di Labik raong Ula Đồng Tâm hu 4 urang taong ruak ula kaik dalam nan hu 2 bac si, 2 y si, hu 20 baoh gaiy caneng brei ndih. Yaok thun, labik ini taong ruak ka labaih 1.300 urang, dom urang abih ruak hu jaik 100% (dom urang hu ruak karei dahlau, njauk ruak pandiak tabiak darah trak brei ba tagok sang iek ruak di pakat angaok).

Bruk taong ruak ka urang, Thuong ta, bac si Nguyễn Văn Tuấn, Akaok Khoa taong ruak ula kaik, brei thau lac:

“Mikva mada hu ula kaik mai tal labik ini ye hu pandar darah huyet thanh caga nọc ula njauk saong siam lagaih abih, samar drah capat tuk halei siam tuk nan piah plaih tamuh jeng ruak karei atau caik inem ruak trak di dalam rup harei hadei. Di ini khol dahlak hulin taduan urang ruak 24/24, tuk halei jeng hu urang ngak bruk, yaom lac harei padeih padei, raya Tet…jeng hu urang duh ka mikva. Rahra njauk ula kaik siam abih brei ba nao tal labik y te hu gru jru chuyen khoa taong ruak ula kaik atau labik y te jaik di abih piah hu daong drah dil samu, hu jalan taong ruak ka njauk.

Di Bhum taneran kraong Cuu Long hu rilo janih ula karei gauk daok dalam bein kayau phun, hamu padai, mbuan taneh… Dalam bilan ia sua, tuk ia tagok glaong, bruk menuac urang haong ula daok taphia gauk jeng mbuan rah tabiak, ngak ka bruk njauk si mbuan brei ula kaik. Kayua yau nan, dalam bruk daok dang saong ngak mbang, grauk urang drei njauk brei caga haong dom janih ula; meyah njauk ula kaik, brei samar chip capat ba nao tal labik y te jaik abih piah taong ruak dil samu./.