Akaok – takuai hu makna praong di dalam bruk ngak patapak taong abih di sa mejam kang saong mbaok. Tuk akaok kandang tabiak gah likuk, dom rilo saong mo laman gah takuai njauk katung njaoh, ngak jeng prein ka gah likuk – ala tagok talang kang. Prein di nyu meda ngak salih labik di kang ala, ngak kan kandah tal atuk talang kaik saong bruk gaok gauk di dom tagei. Cagar veik, tuk akaok kuk trun gah anak, ngak ka kang ala mbuan tachak tabiak anak, ngak salih bruk samu gauk di kreih dua talang kang.

Tagei tuk halei jeng daok dalam labik brei ka pasamu gauk, dalah jhul tabiak langiu, dalam tuk nan cambuai saong mbaok ngak jeng prein kateik tame dalam. Tuk akaok – takuai oh tapak, dom ralo pambuak jeng salih tui yaok tukvak. Gam haong di nan, atuk talang dhei – talang kang pagam haong takuai tapa kang mỏm chẩm saong talei arak chằng, nan tok lac tuk takuai blieng, gah brei prein tapa talang kang jeng hu salih karei.

Dalam nan njauk caik hatai tal uranai jeng ye anek dam bo talang daok dalam tukvak daok prong patagok khang – akaok mblieng – takuai katung dui atah meda ngak kan kandah tal bruk tamuh tagei, patagok talang kang mbaok saong ngak jeng thaik thaot mbaok di harei hadei. Kayua yau nan ye, bruk taong yaom akaok – takuai dalam bruk pasang iek ruak saong taong ruak pasiam tagei dak harei dak hu dom urang maong lac sa banah oh kurang hu dalam bruk gah iek tagei talang kang jaman bahrau.

Ngan haong dom bruk tablat akaok atuk talang kaik, bac si meda ruah jalan taong ruak pasiam tagei talang kang atau pasiam tagei talang kang pagam haong bruk pasang iek cakrok, dalam nan lac di uranaih saong urang dam dara. Tukvak ini, talang kang saong talang akaok – mbaok daok praong yau nan ye bruk pasiam nyu ieu lac bruk biak glaong. Kayua yua nan ye, urang ngak amaik ame brei ba anek bik nao pasang iek tagei gam yaok tukvak caik, piah duah mboh samar drah dahlau di tuk mabuh gaok kan kandah trak jang.

Dalam luac bruk taong padam ruak, brei dut iek takuai – akaok bhian. Meyah mboh urang ruak bhian teik veih akaok tagok atau kuk akaok trun oh yau bhian biasa, bac si brei pambuak haong dom urang gah vat ly tri lieu pasram padhit atau bac si mbeik talang araong piah pasiam ka tapak lagaih.

Mayah mboh nyu chung pablait ralo jeng ye mboh urang mabuh ruak vaiy talang araong atau oh tapak rup saik, bruk tok pasiam tagei saong talang kang lac oh ka ginup. Tuk nan, brei hu pambuak rilo gah di gah pasiam tagei, vat ly tri lieu, mbeik talang mapong araong, gaok mai meik talang akaok – mbaok (meyah khin) mek hu jak jeng siam.

Kayua yau nan dom bac si pachreih kakei, langiu di bruk taong ruak hu ilamo glaong, tacei ba urang ruak salih bruk daok mbang huak lac jeng biak hu makna:

● Khik tani tanat bruk daok saong dang brei ka tapak

● Khik ka takuai – ka bara patapak tuk ngak bruk, jeng ye tuk bac megru

● Pandar patan gap pakre mbiah tuk ndih

● Plaih kuk akaok suai tuk pandar phone, jamariak computer

Hadei tuk pasiam ling tagei atau blac raih pasiam talang kang, urang ruak brei nao pasang iek yaok tukvak caik brei saong thaot iek gilac talang akaok blieng ha oh piah taong yaom dom thaik akaok – baoh takuai. Meyah mboh rup saik rah oh daok tapak, bac si meda pandar pabak pasram tui vat ly tri lieu atau pasiam ka tapak piah khik tani tanat. Tagei – talang kang – talang araong oh calah di gauk hu, blaoh daok dalam sa mejam ralo – talang – talei arak pahasa. Kayua yau nan, sa cambuai klao khang kajap oh lac tagei tapak gauk, blaoh daok lac bruk samu yau gauk di atuk talang kaik, akaok – takuai saong talang araong rup pabhap./.