Hadei di mbang huak melam, amuk PhạmThị Dự (daok di Hưng Yên) mboh pandik akaok, glaoh ta-aok, pandik meta. Tapa sa melam, dom kadha brei mboh nan di amuk dak harei dak triak jang, pandik mata dak harei dak khang, nan ye amuk hu urang dalam sang ba tame Sang iek ruak Meta Trung uong piah pasang iek ruak. Hadei di tuk hu gru jru iek ruak, amuk Dự tatuak drei tuk thau drei njauk Glôcôm (yau Yuan bhian ieu lac thiên đầu thống):

“Dahlak tok saneng lac njauk ruak la-ar dom min, nyu nduac tame dalam, oh saneng tal lac ruak yau Yuen lac thiên đầu thống. Nyu yau ngak patuh baoh meta tabiak, pandik akaok rilo, huan akaok, blaoh pandik nyu nao tame dalam baoh meta, pandik oh ciuk nioy, menyum jru jeng oh mboh abih. Dom gru jru pandar taong mek ruak meng lazer saong brei nao sang menyum jru, tui iek 2 adit. Yau nan min, hadei di 2 adit mek ruak, nao pasang iek ruak gilac, ye baoh meta di dahlak oh siam jang nan ye gru jru pandar mek blac riah”.

Gam haong pandik akaok, pandik meta dreih yau amuk Dự, urang ruak ranaih Đỗ Thị Lan Hương (daok di Hải Phòng) mboh sup mbaok sup meta tuk thau drei njauk ruak Glôcôm. Dahlau di nan, sa-ai Hương jeng oh ka njauk ruak hagait pambuak tal meta, langiu di cận thị, lavik lavik meta nyu lakhah lakhoi min tok lac kadha bhian mboh saong ta-eng nyu abih:

“Mboh tuk akaok mereip nyu mboh glaih glar dalam akaok saneng, bhian saneng tal dom bruk oh siam, dom mbang hadei nao pasang iek ruak ngan haong dom gru jru pak ini ye akaok saneng di dahlak mboh hadah hadai jang. Dahlau abih tukvak triak ye adei hu taong mek ruak meng jru pambuak pagam, tui iek yaok adit, yaok bilan ka urang ruak, yau nan min lac ruak meng sit mai nyu triak tagok tui tukvak yau nan ye oh abih hu, hadei di nan baoh meta dahlak oh daok siam tra, gru jru mek blac riah”

Tui dom gru jru, Glôcôm ieu lac sa janih ruak hu kayua kanjah jhak tal talei rak meta saong ba tal glaoh. Ruak Glôcôm jeng lac janih ruak bhian mboh ngak glaoh meta tok hadei di đục thủy tinh thể. Meyah oh thau dahlau saong samar taong mek ruak, jalan mong iek di urang ruak meda padam trun tal tuk oh daok mong mboh hu saong ba tal glaoh.

Gru jru Nguyễn Thị Thanh Hương, jabat khoa Glôcôm, Sang iek ruak Meta Trung uong brei thau, piah samar duah mboh saong pasang iek hu ruak Glôcôm, tok hu jalan ba nao pasang iek ruak:

“Kasa nan lac dom urang hu gauk gar dalam baoh sang njauk janih ruak ini; dom urang njauk ruak taong abih rup yau tagok darah, me-ik saradang, ruak gút, ruak talang… Dom urang njauk ruak tagok darah, me-ik saradang njauk nao pasang iek ruak tui njauk hrei brei di nyu piah pasang iek anek meta, pacang caga nyu salih tapa Glôcôm. Abih di nyu, rilo urang ruak prong thun bhian pandar jru nam… nan ye mbuan njauk Glôcôm nyu tamuh hadei di pandar dom janih jru ini. Taphia di nan, uranaih njauk cận thị ndo glaong, cận thị min nyu tagok samar taka jeng njauk caong khin nao pasang iek ruak Glôcôm kayua lac rilo urang patagok samar drah ndo cận thị ye hu njauk Glôcôm. Dom urang ini jeng njauk caong khin nao pasang iek ruak ka nyu samar drah"

Tui dom urang hu pasang iek duah thau ka ruak Glôcôm, urang ruak njauk diuk rai gam haong ruak luac rai saong bruk meta oh daok mong mboh hu lac oh pasiam veik hu; kayua yau nan ye,  bruk pasang iek taong mek ruak nan lac bruk prong. Urang ruak hu taong mek ruak meng jru ye njauk menyum jru ka nyu njauk tuk, nao iek ruak njauk haong tuk vak gru jru ba tabiak, oh padeih menyu jru tui hatai khin di drei piah khik hu pren meta mong iek daok veik, caga plaih di glaoh mata./.