Ruak pandiak tabiak darah hu dua tanut: njuel saong trak. Patui yaok tanut bo urang ruak hu mboh karei gauk.

Ruak pandiak tabiak darah njuel: Ruak pandiak tabiak darahnjuel lac tuk urang ruak njom virus Dengue min oh njauk dom ruak tamuh trak karei. Ruak pandiak tabiak darah njuel meda ta-eng taong ruak yau sa ruak bhian di sang.

Bruk kakei ka ruak pandiak tabiak darah njuel bhian nda ka dom janih ruak yau pandiak rup, lagah la-an atau ndaih baoh. Dom bruk rah tabiak rilo abih di ruak pandiak tabiak darah njuel dalam nan hu: pandiak rup saong pandik meta, tating akaok, ndaih baoh, pandik talang, yaglaoh aok, pandik atuk talang,…

Urang ruak pandiak tabiak darah dui atah meng 4 – 7 harei. Meyah ruak pandiak tabiak darah njuel, urang ruak hu sangka njauk meda abih ruak hadei labaih dalam 1 adit kuhria meng bahrau njauk ruak.

Ruak pandiak tabiak darah trak: hu pambuak tal bruk haok darah dalam, srau kadau bruk di dalam rup, ngak tabiak dom ruak kan kandah. Tuk njauk ruak pandiak tabiak darah trak, urang ruak njauk dom ruak yau ye: Rah tabiak dom nem hijao di angaok kalik; Haok darah idung atau di takai tagei; Taglaoh tal aok tabiak darah atau hu darah dalam ia khak; Aok rilo, pandik tian, tangin takai la-an tathah; Rup pandap glaih glar, having akaok. Tuk urang ruak salih tapa ruak pandiak tabiak darah trak brei hu ba tame sang iek ruak kapadrah  , meyah oh samu nyu mbuan si ngak ka ura metai atau caik veik dom bruk kan kandah ka harei hadei.

Ruak pandiak tabiak darah di uranaih: Di uranaih, ruak pandiak tabiak darah bhian brei mboh pandiak glaong meng harei ka 3 ba nao. Rilo amaik ame nda ka lagah la-an atau ruak jalan thuak yava, ba tal ka urang ieik ruak suai si duah mboh ruak, ba nao tal ruak trak.

Ruak pandiak tabiak darah tamuh samar drah, kan si thau, meda ba tal tabiak darah di dalam rup saih, abih di nyu nan lac tabiak darah tung pruac saong glo akaok; Kurang baoh hatai gan, kurang baoh tai than, kurang rilo janih kadha dalam rup. Kayua yau nan meyah hu ba tame sang iek ruak saong taong ruak dil samu jaik di abih urang ruak meda abih ruak.

Tui kakei tacei pato di Mentri Y te, urang njauk ruak pandiak tabiak darah brei nao tal sang iek ruak tuk mboh tamuh tabiak sa di dalam dom bruk hadei ini:

Pandiak rup glaong gam gam labaih 39–40°C min oh pabak haong jru patrun pandiak rup bhian yau paracetamol.

Pandik tian trak atau pa-um tame tian mboh pandik.

Taglaoh tal aok rilo, abih di nyu nan lac aok tabiak darah atau ia mabar sambo kophi.

Tabiak darah oh bhian: tabiak darah idung, tabiak darah takai tagei, tabiak darah di kalik, ma-ik tabiak darah, darah jhak di drei tabiak rilo oh njauk harei bhian.

Glaih rilo, ndih rilo, tangin takai la-an, patuh ia hauk.

Ma-ik takik atau oh ma-ik dalam rilo tukvak.

Ini lac dom bruk brei kakei tahu dahlau ka urang ruak daok salih tapa tukvak trak, mbuan njauk shock, kurang baoh lakei, tabiak darah dalam rup.

Kayua nan dom bac si kakei urang ruak pandiak tabiak darah, nan nao pasang iek ruak piah hu pasang iek. Njauk caik hatai juai taeng drei pandar jru patrun pandiak tabiak darah langiu paracetamol, oh pabak ia dich di sang. Pasang iek ruak veik njauk tukvak, abih di nyu nan lac di harei 3 – 7 di ruak, kayua ini lac tukvak mbuan rah tabiak ruak karei. Tuk halei jeng tui iek tani tanat dom bruk kakei dahlau ka ruak piah ba urang ruak nao tal sang iek ruak drah chip./.