Laka lakaih ieu lac sa janih ruak hu mboh di grauk thun umo, min ralo 90% lac dalam nan di dom uranaih daok bac mau giao. Biak nao dom amaik ame biak bhian nda karei di ruak laka lakaih saong ruak ndaih baoh ritak ia. Meyah hu pasang mboh samar drah saong taong ruak njauk, ruak laka lakaih hu siam dhit samar saong oh caik gilac inem; daok bruk cagar veik lac ruak meda ba tal ruak trak.

Laka lakaih hu rabha tui yaok bruk kan kandah: laka hu ia saong oh hu ia. Labik bhian tamuh: di mbaok, kalik mbaih, atau di yaok labik halei yau di tangin, takai, oh tuk halei tamuh di asar mata. Di labik kalik akaok, nyu meda ngak ka breik mbuk.

Brei mboh dalam rup pabhap: barah hạch taphia, ruak pandiak rup kan si gaok langiu bruk laka pambak atau tamuh jeng ruak karei. Urang ruak meda katal – garao ngak pambak tal labik kalik karei.

Pahacih dahlau di tuk ba uranaih nao tal sang iek ruak

Menei hacih sa-at brei ka uranaih, meda pandar ia jru tím halai tui 1/10.000, atau pandar dom janih ia menei tui jalan ngak yau rahra bhap bini bhian ngak yau ye ia taiy ngak thu laka lakaih. Laka lakaih mbuan njom mbak kayua bhian ngak katal, uranaih garao dom laka di ini, blaoh nyu  mbak tapa labik karei di dalam rup pabhap. Kayua yau nan ye, tuk uranaih laka lakaih, dom urang ngak amaik ame brei anek padeih di sang piah pasang iek siam jang ka bruk mbak ruak di rup pabhap uranaih saong pacang cakak caga ruak tamuh karei. Langiu di nan, bruk ini jeng daong patakik ruak pambak tapa urang karei.

Laka lakaih bhian oh kan kandah, min gaok mai ba tal bruk tamuh ruak karei kan si mboh biak trak. Laka lakaih: bhian gaok di uranaih, urang taha lavang lavaih trak atau kurang krein caga ruak, ruak mbang tame dalam, tuk abih ruak caik gilac inem ngak kanjah jhak tal bruk ngak gheih di thaik rup).

Pacang caga saong patakik njom mbak praong

Jalan ngak siam abih ieu lac tuk halei jeng luai ka rup pabhap hu laneing lanoi: labik daok praong laneing, khan ao hacih sa-at laneing lanoi, njom ia hauk, plaih hueng kalik rilo ngak tamuh ruak saong njom mbak.

Pacang khik kalik oh saluah. Amaik ame brei pato padar uranaih ma-in ma-eic di labik hacih sa-at, plaih caga di dhun mun, plaih caga ma-in jaik dom janih ndap nda ngak mbuan si salhluah laka, patakik ma-in jaik anek athur raong, plaih caga anek rih.

Khik ka kalik uranaih tuk halei jeng hacih sa-at, menei ia bhian kanyu, manei ka uranaih meng ia hacih, plaih ngak saluah kalik. Salih saong papah hacih khan ao yaok harei, cakak mbuk, cakak kakau tangin.

Menyum ginup ia, ia baoh kayau saong mbang njam.

Plaih daok suai di dom labik tathah, kurang tanrak hadah, oh luai ka anek rih kaik.

Taong ruak samar drah saong siam mekre, plaih taveik, garao ngak ka tamuh ruak karei./.