Ruak mblung mebuk dalam hatian ieu lac sa srau kadau di hatai glo akaok, mbuan mboh abih lac mbaok meta drut druai, oh sangka atau chreih chrai hagait, moang suhsah, ba tal glaih glar saong takik bruk pahat padhih rup saik.

Di tuk daok anek uranaih saong tuk brok dam dara, mblung mebuk ngak susah tal bruk bac megru saong bruk daok dang me-in mayit nao mai dalam rahra. Langiu di nan, ini jeng lac sa dalam dom makna ba tal bruk sahaneng atau bruk ngak jeng bala brei ka rup drei, atau ta-eng pamatai drei.

Mblung mebuk bhian nao pagam haong duh hatai saong hu rabha jeng klau tanut: njuel, gap saong trak. Dom uranaih hu mada tapa sa tukvak mblung mebuk, min jeng hu uranaih mabuh ruak rilo mbang.

Uranaih si brok jeng dam jeng dara njauk mblung mebuk mbuan ta-eng ngak kan kandah tal rup drei. Njuel ye uranaih bhian mboh “drut druai” atau “oh bui sambai”; trak ye mbuan sahaneng tal bruk ngak kan kandah tal rup drei atau ta-eng pametai drei eng. Dom bruk ini brei mboh samar drah saong taong yaom tani tanat.

Bruk mbuan mblung mebuk di uranaih tamuh tagok glaong meyah dalam sang hu urang njauk ruak mblung mebuk. Langiu di nan, rilo asal kadha karei jeng ngak tamuh ruak, yau ye:

Mboh yau hu urang kateik geik. Caong takre sahneng biak praong meng di baoh sang brei ka bruk bac megru.

Bhian caik dalam hatian suai dom bruk Oh siam haong ayut cuai sahabat, oh njauk sa jalan sahaneng yau drei

Kurang bruk sangka, maong tal iek glang di sang danaok.

Rah tapa bruk taong paoh kateik geik dalam sang bac, dalam baoh sang atau njauk mabuh tame urang paluo jalan kumei lakei.

Matai Lahik urang drei anit ranam, baoh sang oh ginup trei sir.

Mabuh tame kadha prein yava karei yau ruak hakik, jaoh jro laka.

 Dom bruk brei mboh mblung mebuk, duh hatai di uranaih brok dam:

Mboh drut druai atau kanjah jhak: Uranaih mboh drut druai, mejua balau ta-eng, takik ba drei tame dom danak dak, mbuan sanak tagok atau mesao taong paoh haong urang dalam sang, jeng ye ayut cuai. Bruk ini mbuan meda dui atah yaok adit, gaok mai yaok bilan.

Bhian kamaon ka than rup drei: Uranaih bhian ndom dom panuac kamaon pon yau ye “Anek oh ngak hagait njauk”, “Anek oh hu ayut cuai”… Uranaih mboh drei oh ngak hagait jeng, oh caong hagait atau mboh drei jhak.

Kurang bruk chreih chrai sambai atau kham merat: Uranaih patrun bruk kham merat dalam bac megru saong daok dang yaok harei, bhian glaih glar, mbuan klak bruk, kan pataom glo akaok tame ngak sa bruk. Lahik bruk chreih chrai: Oh daok bui sambai me-in atau ba drei tame dom bruk chreih takre.

Dom uranaih gaok mai ta-eng ngak drei pandik atau ta-eng pametai rup drei eng.

Salih bruk ndih daok saong mbang huak: Uranaih brok dam dara meda lahik ndih, ndih oh truh bangi, atau mboh glaih glar yaom lac ndih oh hu ginup. Mbang huak salih karei, meda alah mbang atau mbang rilo oh yau bhian.

Pandik lagah oh thau meng halei mai: Bhian kamrao pandik akaok, pandik tian, glaih glar blaoh oh thau cambaih laih ruak hagait.

Mblung mebuk, duh hatai di uranaih saong dam dara ieu lac bruk hu biak saong meda caik brei hadei di nyu hu rilo bruk kanjah jhak: bac megru oh siam lagaih, patrun prein bac, patrun bruk ba drei tame, srau kadau drut druai saong bruk di drei (sanak jang, mbuan taong paoh…). Langiu di nan, ini jeng lac sa dalam dom makna ba tal jalan sahaneng atau bruk ngak kan kandah ka rup drei, gaok mai ta-eng pametai drei. Kayua nan amaik ame brei maong iek, sangka, duah mboh samar drah dom bruk rah tabiak oh yau bhian di anek bik. Bruk ba uranaih tal labik y te piah hu brei pasang iek ruak lac biak njauk hu. Urak ini hu rilo jalan piah pacang caga, dalam nan hu bruk thau ka bruk di drei hu taong yaom lac jalan ngak siam lagaih ka uranaih brok dam dara mblung mebuk, duh hatai./.